Bongkling (XVI-XX)

Sumber Gagambaran

Kaketus saking manuskrip duwén

Ida I Déwa Gdé Catra Karangasem

/16/

Parandha mangdibegang,

ban krodhané tani gigis,

tangan sukuné manggetor,

belig raga kadi julit,

tong bakat ban manggisi,

takut kakétak ban helu,

ada mahatur halon,

nunasang Pan Bongkling sisip,

ipun buduh,

tan wénten nyandang resepang

/17/

Ipun mangkin pahid tityang,

mangdé pun mati mapahid,

ngabet nyangetang mangoros,

parandha ndohos malinggih,

parandha tan kawarnni,

Pan Bongkling malih kawuwus,

luwas masangang daya,

ka jumah Dé Senggu Pangi,

teked ditu,

Pan Bongkling ya mapi buta.

/18/

Kawuk-kawuk ya di wangan,

managih bukain kori,

hénggal tulung tityang jero,

dandhanin tityang digelis,

Dé Senggu manyagjagin,

nyén to cahi kawuk-kawuk,

Pan Bongkling matur halon,

éngkén dané Senggu Pangi,

I Jro Senggu,

olas ngénggalang manjemak.

/19/

Pan Bongkling raris kadandhan,

énggalang manglawut mahi,

Pan Bongkling halon matakon,

kén ja dané Senggu Pangi,

né mirib betek batis,

tidongké dané Jro Senggu,

sinya huluk-huluka,

hengkén jron danéné dini

I Jro Senggu,

raris nyemakang adegan.

/20/

Pan Bongkling kenyung angucap,

boya ja umah puniki,

tampul wastan ipun reko,

Dé Senggu raris nyahurin,

hené cahi Pan Bongkling,

mahi ngédéngang pangawruh,

hédalem maman kalah,

hidong-hidong Senggu Pangi,

mula putus,

mangitung ndepukang sastra.

(.....pacang kalanturang)