Pelih Malaksana
Olih:
Ni Ketut Renes Muliani
"Huék.... Huuuékkkkkk...
uhuuukkk.. uhuuukkk.... Méé, Pa... Tiang gelem" Luh Sari ngaukin
reramannyané.
"Nak Kénkén né Luh, ngudiang
Panes kéné déwéké, maimbuh nagih ngutah biinan?" Patakon Mén Sariné sada
mapecukan alisné.
"Ten tawang Mé"
"Pan Sari.... Paaaa.... panaké
gelem, mai atuhin ka Rumah Sakit"
Éngal-énggal Pan Sari ngidupang
montor lantas ngatehin pianak ipuné ané gelem.
Neked di rumah sakit, Luh Sari
preksana tekén Dokteré, lan raosanga luh Sari tuah kebus dingin.
Duaning buka kéto raos dokteré, Pan
Sari sareng Mén Sari ngajak pianakné mulih ka pondok.
Benjangné delokina pianakné ka
kamar, enu masih kebus, pragat nagih ngutah. Sabilang preksaanga, méh-méh suba
pang telu, terus orahanga ipun tuah kebus dingin.
Abulan ada makeloné Luh Sari gelem,
lan pragat masaré, ada kénéh reraman ipuné ngajak Luh Sari ka Rumah Sakit Umum.
Neked di Rumah Sakit dandana Luh Sari tekén Dokteré, ajaka ka ruang pasien.
Buin kejepné pesu Dokteré uling ruangané nika lan ngaukin Pan Sari sareng Mén
sari.
"Bu, Pak, mrikiang negak ajebos".
"Bu, Pak, mrikiang negak ajebos".
Énggal reraman Luh Sariné maekin
Dokteré. Lantas dokreré ngaraos Banban.
"Pak, Bu, sujatinné pianak Ibu
lan Bapaké sampun madaging" konden suud Dokteré ngomong, énggal Pan Sari
nyautin.
"Madaging napi nika Bu?, kena
napi pianak tiange?" Makasiab Pan Sari nyambilang matakon.
"Sabar Pak, Pianak Bapaké
sampun Beling, minab kuang lebih abulan sampun makelonné."
"Napi....? Ten dok, ten
mungkin, tiang ten precaya" Barengan Pan Sari sarwng Mén.Sari makasiab.
"Jati nika pak, mriki sarengin
nyingakin hasilnyane".
Mara ngaraos buka kéto dokteré,
énggal-énggal Pan Sari naur biaya pameréksaan pianakné, lantas maid pianakné
ngajak mulihné.
Tusing makelo neked lantas jumahné,
kapaid pianak ipuné, kedenga limanné, kocoka iban pianakné saha ngaraos
"Tuara madalem ukudan, tuara
madalem rerama, nyama, ngulah aluh nyemak gaé ané tidong-tidong. Sabilang wai
natakang lima, sabilang wai suba jakanang, gaénang jukut, apabuin panganggo,
sabilang wai isinin Bapa kénéh nyainé. Dong dadi ati nyai nyemak gaé kakené.
Tuara inget tekén legan rerama dewek nyainé". Rengas munyin Pan Sariné ngajak
pianakne Luh Sari.
"Bapa, mémé, men kudiang
tiang, tiang suba kadung pelih, suba kadung jemak tiang gaéné, eda Mémé bapa
nyelselin ngelah pianak buka tiang, ampurayang tiang Mé Pa". Buka kéto
raos Luh Sariné, sambilanga ngetelang yéh mata, ulian ipun maselselan tekén
unduk ipuné suba beling yadiapin ipun wawu kelas 2 SMA.
"Bas amoné jegég nyainé, semu
kalem, kenyem manis, dong ngidaang nyemak gaé ané kéné, cara tuara ada muani
lénan. Panak nyén nto tingkangin? Pianak nyén? Ba gedé basangé mara nyai ngeling
mai mulih, dugas liang nyainé ditu .... dituuuu... di tongos nyainé mademenan,
ingetkeh nyai tekén Bapa? Inget?, Bas ngencotang sajan beleré dadi pianak, nyén
ngelah belingané ne? Amun tondén ada ngakuin eda ba matakon ajak Mémé Bapa,
awak kéto, cara panak bebenyat.". Bangras raos Pan Sariné ulian gedeg
ipune tan kadi kadi tekén pianakne.
Uling sukat ningeh raos bapanné ané
bangras, sabilang wai Luh Sari ngeling tuara rérénan, ipun mapangenan tekén apa
ané suba kapabuat nganti ipun beling, apabuin ipun sedeng ngranjing ring SMA.
Minab masa pubertas ané ngaranayang, napi malih ipun sampun polih rajahan
nganinin Sistem Reproduksi.
Ada minab telung dina makelon ipuné
dikamarnyane ngoyong, stata ngeling sigsigan, ulian tusing bani matakon tekén
reramannyané. Ada lantas kénéh ipun ngajakin gegélannyané ngantén.
"Bli Yan".
"Tiang Luh jegég, ojangin biin
yuk!"
"Auk Bli, tiang suba beling,
ngantén mai bli, beli harus tanggung jawab" buka kéto BBM Luh Sariné,
sambilanga ngeling.
"Apa...? Beling.... dija
mepreksa Luh? Men kenken abet reraman I Luhé?"
Makesiab gagélan Luh Sariné saha nyalélég
di sakan balé bengongné.
"Ah to sing penting bli, tiang
butuh tanggung jawab beliné".
"Nah Luh, jani beli lakar
nyambatang tekén reraman beliné, ngorahang beli lakar nyuang I Luh".
"Janji bli?"
"Pasti Luh".
Mara buka kéto liang pesan atin Luh
Sariné. Tusing masaré ipun ulian liangné tan kadi-kadi.
Minab ring paek-paekan dinané dugas
ento melah melah duasanyané, sagét benjangnyané ada nang jam 3 sanja, teka
Kaluarga geglan ipuné, lakar ngidih Luh Sari tekén reramannyané.
Tuara makelo indiké ento, sagét
suba makurenan jani Luh Sari tekén gegélannyané, minab bagia pisan ipun,
ngaenang reramannyané nyansan ilang pedihné ngajak Luh Sari, lan nyambatang,
dumogi i Luh stata rahayu, melahang makurenan Luh, melahang ngajak matuané, eda
i Luh Bani bani ngalawan matwa, apabuin kurenan. Dumogi I Luh Stata langgeng
lan bagia. Buka kéto raos Mén Sariné lantas ngelut pianakné lan ngalahin
malipetan ka pondokné.
1 Désémber 2016
No comments