Tuah di Ipian

Olih: Ni Ketut Renes Muliani

 

Sumber Gagambaran

Saniscara dinané ento, dugas tiang mbalih voli ngajak timpalé. Ditu tiang katemu sareng muani bagus, ento tuah mantan tiangé Yan Wirta. Ditu lantas tiang saling takonin, nakonang sakancan unduk uling bongkol ngantos neked muncukné. 

"Eh Luh Sukréni, tumbén tepuk mabalih voli, éngkén kabaré?'' Kéto patakon Yan Wirtané sambilanga ngenjuhang lima ngajak masalaman.

"Yéh bli Yan!" Luh Sukréni nyautin sambilanga ngenjuhang lima ngwales salam Yan Wirtané. "Tumbén masih tepuk tiang beli héhé, wajar kapah tepuk bli, tiang nak kapah pesu jani, kabar tiangé biasa-biasa bli, men beli éngkén kabaré jani?"

"Aduh Luh, kabar beliné jeg jelék Luh, buruk kabar beliné!"

"Ah, adi kéto bli? Apa makada?"

"Tusing ada nresnain beli jani Luh, miriban beli suba bodo."

"Ah ngudiang bogbog kéto, amento nyen bagusé, meh nyan ten ada nresnain!"

"Ae Luh, saja saja to Luh! Beli sujatiné enu demen ngajak I Luh, sabilang inget tekén I Luh, ngancan wai ngancan ada tresna di atin beliné, ané katuju tuah tekén I Luh."

"Ah mauk, da ja dini beli nga-gombal, tiang tusing lakar percaya ngajak beli, diastun siu jurus andalan beliné anggon ngarayu tiang!"

"Da ja ngomong kéto Luh!"

"Ento tukang sampaté dogén suba tusing nganggoang tiang ulian tiang tusing nawang mayasin paukudan, nganti tiang kaplaibin nguber anak luh mulusan,
apabuin beli ané suba dadi pegawai negeri!"

"Ah, tusing ada kéto Luh, tresnan beliné ané jani nak sujati tekén I Luh, beli seken-seken ngajak I Luh! I Luh enu demenkan jak beli?"

"Ah, eda ja beli mogbogin keneh beliné padidi, yén sing demen jak tiang, yén sing tulus nresnain, diolas eda buin ngarepang tiang, apang tusing buin tiang nyakit ati buka malunan, tiang tusing ngidang percaya tekén beli!"

"Seken-seken Luh, beli seken nresnain I Luh. Diolas terima buin tresnan beliné. Diolas Luh!"

"Ampura bli, tiang boya ja pemadam kebakaran ané alih beli diperluné dogén, tiang boya ja powerbéng ané anggon nyetrum di ngedropé dogén. Tiang anak luh ané ngelah pangrasa, tiang anak luh ané stata ngarepang bagia."

"Lamun I Luh tusing percaya ngajak beli, antiang duasa melah dogén Luh, beli lakar ka umah I Luhé ngaba basé kaputan ngajak bapan beliné, ditu beli lakar ngidih I Luh, lakar ajak beli ngantén, ditu apanga mabukti tresnan beliné suci ngajak I Luh!"

Kukuryuuukuk. Kukuryukuk. Kok kok ketekok, kok kok ketekok. 

Kéto munyin siapé. Semengan suba pada pakuryuk nyiriang guminé suba lemah.
Buin kejepné saget ngadébras Luh Sukréni, bangun uling sirepné, lantas makesyab.

Ehem hem

Yéh suba tengai sagetan, yéh dija Yan Wirta, nguda tusing ada négak di sampingé, apa tiang tuah mangipi?

To nguda buka kené, nguda ipiané ento ngaénang tiang nyakit ati. Nyansan wai nyelselin déwéké padidi, sawai-wai stata ngrasayang belogé tan kadi-kadi, bes kaliwat tuara déwék tiangé buka jani, ngantos muaniné sami dadi ati nyakitin atin tiangé puniki, kemu mai plaibina nguber anak luh ané mulus, ané ngulangunin trunané sami. Adi buka kené buin tepuk tiang jani. Rasayang tiang saja, sakadi seken makejang ané tepuk tiang, kadénang saja Yan Wirta buin ngajak tiang nyambungang tresnané ané ipidan, béh dong ento makejang tuah di ipian.

09 Agustus 2016