Puisi-puisi Ida Madé Giur Dipta; Peteng Kalawan Lemah

Sumber Gagambaran: id.pinterest.com

Peteng Kalawan Lemah

 

Peteng,

Lemah,

Peteng,

Lemah,

 

Né pastika ada

Boya dadi tawah

Papinceran Cakra Panggilingan

Bhuana Agung

Pakardin Hyang Widhi

 

Lemahé makada peteng

Petengé makada lemah

Ulian lemah ada peteng

Ulian peteng ada lemah

 

Lemah galang malilang

Petengé peteng dedet tur sipeng

Petengé kedasin baan lemah

Lemahé nyunarin peteng

 

Lemah,

Peteng

Peteng,

Peteng,

 

Peteng,

Lemah,

Lemah,

Lemah,

Sangkaning yasa kerthi

I manusa

Olih Putu

 

 

Sekar (1)

 

Sekar Gumitir,

Warnanné bungah, ambuné miik sumirit

Nanging, tan dados anggé mauran

 

Sekar pudak.

Lembut tur samah, ambuné miik sumirit

Nanging among dados anggé basé wakulan

 

Sekar jepun.

Warnanné bungah tur muntab, tan paambu

Sangkaning warna, i tambulilingan buduh paling

Ngisep madu i sekar jepun

 

Sekar sandat.

Warnané tuna lintang, genahé tegeh ngalik

Ambuné miik ngangobin

Sayan layu sumingkin miik sumirit

Marebut anaké nyimpangang

 

Sekar bintang.

Warnanné sumringah, tan paambu

Tumbuh dinatar, mulisah

Asing liwat ngempok

Bisa-bisa kajekjek kanti benyah

 

Duh.... Ni Nengah Sekar

Sang maraga pawestri listu ayu

Sekaré encén né kasumpangang?

 

Sekar (2)

 

Sekar bangké.

Warnanné putih, ambuné kalintang bengu andih tur alid

Asing-asing ngadek, nyeneb mecek cunguh tur makecuh

Mula pakardin Hyang Widhi, Rwa Bhineda di guminé

 

Sekar pucuk.

Lambéné ngancab, warnané bungah sumringah ngangobin

Sangkaning warna, i tambulilingan buduh paling

Ngisep madu i sekar pucuk

Mula pakardin Hyang Widhi, Rwa Bhineda di guminé

 

Sekar Jagat.

Miik ngalub ngalingkup pantaraning bhuwana

Asing ngrasayang kapitresnan tur satinut

Mula sangkaning swadharma, mangguhang kawibawan

 

Duh... I Nyoman Sekar.

Sang maraga truni, siteng tur bakuh

Sekaré encen ne kasumpangang?

 

 

Puyung

 

Puyungé waluya malalung,

Puyung, makada buwung,

Puyung, mapuara suung

Puyung, mangawe bingung.

 

Payuk puyung mamunyi mrungpung,

Padi puyung, sunggar sumbung,

Di manyine kajekjek linglung,

Payu limpung katulung-tulung.

 

Uduh cening

Da baanga awaké puyung mamung,

Isinin puyungé aji kaweruh luwung,

Apang dadi adi luhung,

Tusing bingung. 

 

Lawat

 

Lawat semengan lantang nyelémad

Lawat sanja tan pabinayan

Lawat jegjeg surya, bongkok tur bawak

Rikala peteng, melawat sangkaning sunar

Lawat di yéhé ngeléncok

Lawaté maélogan, satmaka pragina pascat

Lawaté di meka, ngenah bocor.

Makané kapantigang

Lawaté stata nutugin

Nutug selampah laku

Satmaka sawitra mitra atwang

Kaliwat tresna, tan mapalasan

 

Uduuuuuhh....., sang kinucap manu

Yan jati bersih tur bhakti

Ngudiang nakutin lawat ?