Kukuruyuuuk

Olih: Ida Madé Giur Dipta

Sumber Gagambaran: id.pinterest.com

Manawi ta saking wawu kentel jagaté sampun wénten beburon. Silih tunggil beburon inucap wénten sané mawasta ayam. Ayamé sané luh kawastanin pengina, suaran ipun ngatekok ri kala pacang mataluh wiadin usan mataluh. “Kok, ketekok, kok, katekok.” Yén ayamé ané muani kasontrah kawastanin pangelumbah, yén makurung mawasta ayam kurungan suaran ipun makruyuk “kukuruyuk, kukuruyuk, kukuruyuk.” Kantos mangkin suaran ayam inucap nénten naen magentos. Durung naén wénten ayam masuara jatma miwah ngembék sakadi suaran kambing. Punapiké pakenoh suara kukuruyuk inucap majeng ring kauripan I Manusa? Makéh anak sané tan lingu utawi tan urati ring suaran ayam pinaka sipta inucap ngiring paosin gending raré ring sor puniki:

Das lemah makruyuk siap/samar sawat saling tambungin/munyin kedis ramia pisan/dianing kayuné nguci/mirib nundén kayeh mabersih/wiréh pacang luas masuk/ngungsi balé sakolahan/ I Bapa luas mretiwi/ia I Mémé, ka peken luas mamasan/ Kéto pisan/tuyuh I Mémé miwah I Bapa/ tuah makardiyang pianak/mangdané ngelah penawang/ Sangkan kéto, sangkan kéto/jani selegang cening malajah/cucud bakti ring paguruan/mangdané dadi suputra//

Malih asiki wénten/ pasemengan siapé sampun makruyuk, kruyuk, kruyuk/kedisé ia pada girang mecanda, uyut, uyut, uyut/mémé, Bapa luas ngalih upajiwa, jiwa, jiwa, jiwa/titiang murid sami ngungsi sakolahan, malajah, malajah, malajah//

Gending cecangkriman inucap wewarisan saking kuna kuni becik pisan anggén paurukan ring alit-alité, ring kulawarga muah ring sakolahan anggén sarana ngajegang budaya Bali. Nanging sané mangkin sampun jarang i rerama kalih para guru pangajiané ring sekolahan ngurukang alit-alité ngendingang gagendingan sané ring ajeng. Manawi ta para lingsir utawi guruné mangkin sampun lali utawi nénten uning ring gending cecangkriman ring ajeng, duaning sampun kabawa déning modérenisasi. Sajawaning anggén ngajegang gending Bali, gending-gending Bali inucap akéh madaging pitutur sané adiluhung anggén ngegiras alit-alité mangdané seleg mlajah mangda uning tata titi karma ring pamiyanan.

Yan incepang punapi daging pengenikan anaké lingsir sakadi ring ajeng samian punika kalintang utama pisan. Ngiring sareng sami ngutsaha ngajegang kapagehan. Yén dados sisia ring sakolahan patut pageh malajah, yan dados pejabat patut pageh ngamel pituduh ngenekang jagat sampunang kagoda antuk arta brana kantos korupsi, yén dados petani patut pageh mretiwi miwah sané lian-lianan. Asapunika pikenoh suara kukuruyuk I Ayam sané patut tiru kapagehan ipun. Dumogi kasidan.