Balai Bahasa Provinsi Bali Ngalaksanayang Rakor Revitasilasi Basa Bali, 251 Guru Basa Bali Pacang Kaicenin Pelatihan Guru Master

Parikrama Rakor Antarinstansi dalam Impelemntasi Model Pelindungan Bahasa dan Sastra Daerah di Provinsi Bali sane kalaksanayang olih Balai Bahasa Provinsi Bali (dok. Balai Bahasa Bali)

Salami tigang rahina, ngawit Buda kantos Sukra, 13 – 15 April 2022, Balai Bahasa Provinsi Bali ngalaksanayang Rapat Koordinasi (Rakor) Antarinstansi dalam Implementasi Model Pelindungan Bahasa dan Sastra Daerah di Provinsi Bali, Revitalisasi Bahasa dan Sastra Daerah dan Festival Tunas Bahasa Ibu. Parikrama punika kamiletin antuk 55 uleman saking praktisi basa lan sastra Bali, Dinas Pendidikan sa-Bali, dosén, guru, miwah Penyuluh Bahasa Bali tur kalaksanayang ring Dénpasar.

Rakor punika ngamolihang 14 rekoméndasi ngenénin indik tata titi ngalestariang tur nglimbakang basa, aksara, miwah sastra Bali. Ngawit saking parindikan ajah-ajahan basa Bali ring sekolah, pengangkatan CPNS utawi PPPK guru basa Bali, kantos pelatihan guru master majeng ring 251 guru basa Bali SD miwah SMP sa-Bali. Sausan polih pelatihan guru master, 251 diri guru punika pacang mawali ka sekolah soang-soang jagi nglimbakang parindikan sané sampun kapolihang ri kala ngamiletin pelatihan.

Sajabaning punika, Balai Bahasa Provinsi Bali taler pacang ngalaksananyang Féstival Tunas Bahasa Ibu sané kamiletin sisia SD miwah SMP. Wénten makudang-kudang lomba ring parikrama punika minakadi ngwacén aksara Bali, nyatua, nutur ring tiktok kantos nyurat miwah ngwacén puisi Bali.

Wénten taler rékoméndasi sumangdané basa Bali punika kadadosang silih tunggil syarat ri kanjekan pacang ngadegang pejabat ring lembaga pemerintahan, lembaga pendidikan, wiadin ring lembaga tradisional.

Manut Kepala Balai Bahasa Provinsi Bali, Toha Machsum, pelindungan basa, aksara, miwah sastra daérah puniki dados silih tunggil program prioritas Balai Bahasa Provinsi Bali tur sampun karanjingang ring rencana strategis Badan Pengembangan dan Pembinaan Bahasa. Program pelindungan basa lan sastra daérah taler sampun dados program Merdéka Belajar épisode 17 antuk téma révitalisasi bahasa daerah.

“Komisi X DPR RI taler sampun cumpu pisan ring program puniki. DPR RI taler mapengapti mangda basa daérah ring Indonésia karanjingang ring muatan lokal. Yéning ring Bali, indiké punika nénten malih dados pikobet, duaning sampun ngaranjing ring kurikulum ngawit saking SD kantos SMA. Sakéwanten, yéning selehin ring Indonésia timur, sakadi Maluku wiadin Papua, akéh wénten basa daérah sakéwanten durung wénten sané ngaranjing ring muatan lokal,” baos Toha ri kala ngicénin sambrama wacana ring parikrama punika. 

Manut dané, basa Bali kantun ajeg kantos mangkin, pateh sakadi basa Jawa miwah Sunda. Indiké punika sangkaning kantun akéh kramané sané nganggén basa Bali. Lianan ring punika, palestarian miwah pelindungan basa Bali sampun kakuatang antuk program-program pemerintah provinsi, kabupatén/kota sa-Bali miwah pemerintah pusat antuk Balai Bahasa Provinsi Bali. “Révitalisasi basa Bali puniki taler pinaka panyokong kebijakan Pémprov Bali ring widang pelindungan basa Bali antuk parikrama Féstival Tunas Bahasa Ibu,” baos Toha.

Kepala Dinas Kebudayaan Provinsi Bali, Prof. Dr. I Gedé Arya Sugiartha, cumpu pisan ring parikrama sané kalaksanayang olih Balai Bahasa Provinsi Bali. Manut Sugiartha, basa Bali pinaka basa ibu, sampun sapatutnyané kalestaraing tur kalimbakang sareng-sareng. “Sumangdané basa Bali puniki sayan-sayan nglimbak tur ajeg. Basa Bali puniki taler mangda dados basa ibu ring Bali,” baos Sugiartha.

Arya Sugiartha ngawewehin, Pémprov Bali antuk visi Nangun Sat Kerthi Loka Bali, utaminnyané ring widang basa Bali, sampun ngembasang utawi ngamedalang Pergub Bali Nomor 80 Tahun 2018 ngenénin indik Pelindungan dan Penggunaan Bahasa, Aksara, dan Sastra Bali, serta Penyelenggaraan Bulan Bahasa Bali. (tim)


No comments