Puisi Madé Suwéta Aryawan; Tresnan Maguyang Makayang Kayang

Sumber Gagambaran; id.pinterest.com

Tresnan adi

Nelekep di muncuk alis adi

Meliah nuluh bucun peningalan

Mengkeb di sujénan pipin adi

ngudiang demit makenyir

Ngetél poos beli

edot ngadab keneh adi

Liang idepé

Galang kenehé

Néjani ujan

Kerug tatit krébék galak

nguyak keneh beli jengah

Sing sida beli ngelépat

awak beli teteh sedih

aget enu ada ngedekol

Sisan angkian di kekolongan

ento tekek ngisangin beli

Kedeh nundén beli idup

Apang sida nulungin

Entikan tresna sujati

Né nyandah di keneh adi

Beli satia maguyang

Makayang-kayang ngajak adi

Élingang tresnan beli kén adi.

 

Singaraja, 161107/191009.

Pk. 06.30.

Gang Bumi Indah 19 Pemaron

 

Kaambil saking cakepan Tresnané Mabunga Mati kakawian Madé Suwéta Aryawan