Puisi-puisi I Putu Supartika; Payu Iraga Matemu Bli?

Sumber Gagambaran: oenogallery.com

Payu Iraga Matemu Bli?

 

Dija iraga lakar matemu bli?

Peteng dedet 

Tusing ada galang

Dija mirib oncoré kecagang bli

Magabag-gabagan

Pati grapé, nanging margané ané katuju tusing tepuk

Aliang galang bli

 

Pidan ada déwasa iraga matemu bli?

Paling tiang ngebit-ngebitin isin kalénder

Tusing masih bakat déwasané

Dija engkebang bli déwasané totonan

Apaké di lepitan bukuné ané baca ibi sanja?

 

Payu iraga matemu bli?

Kanti maakah awak tiangé dini

Kondén masih ada lawat bliné

Kadirasa, suba liwat ujan kauluné

Patitakon tiang padidi: apaké iraga tusing lakar matemu?

 

 

Supartika

Ngambar Lawat

 

Aji yéh bli ngambar lawat

Membah

 

 

Supartika

Kénkén Carané Metékin Idup lan Matiné Bli?

 

Galar 

galir 

galur 

di galuré tongos matiné?

 

Kénkén carané metékin idup lan matiné bli?

entegang tlapakan batisé

kidemang paningalané

asanin angkihané

suba bli?

 

Kénkén carané metekin idup lan matiné bli?

asiku

anyari

adepa

kén sikut matiné bli?