Raré Angon Ngungsi

Oleh: I Gusti Agung Rai Jayawangsa

Sumber Potrekan: blogs.voanews.com

Sang Hyang Bayu sampun masolah, pantun ring bangketé sampun kapanyi, punika cihna masan layangané sampun rauh, cingakin ja ring ambarané gumanti ring Gianyar, Dénpasar, Badung, miwah Tabanan akasané kakerebin antuk layangan sané mategep rupané.  Layangan, nénten ja sawates ameng-ameng anak alit kémanten. Anak sané sampun kabaos “Tua” kantun seneng malaib-laib majemuh jagi nunjuk tur ngedeng talin layangan. Sampunang nikaanga kirangan pikarya, angga sampun aném kantun taler seneng malayangan. Yéning sampun polih malayangan, waduk puyung nénten karasa, kadi rasa sampun waneh ngayunang angin. Carmané badeng sengeh nénten dados pikobet, mangda saruan, nikaang manten sakadi turah mangkiné, kulit éksotis. Indik rambut sané patutné selem malengis masiluman dados barak ngéprak waluya memedi. Yéning wénten anak ngetarang nikaang manten keni semir akidik. Kawéntenan féstival layangan ngawinang sayan ngalimbak pamarginé puniki. Layangané kairing antuk tetabuhan baléganjur, makonvoi ring marginé kagiat banggi manahnyané ngaberang layangan, nénten lali hadiahé ngenyud-ngeyudin sekaané mangda ngarya layangan sané pinih becik. Kawiaktiannyané ring Bali malayangan sampun wénten saking sué, kantos wénten wangun-wangun layangan khas tradisional Bali sané nénten wénten nyaménin. Pinaka imba, layangan janggan sané nulad rupan naga, layangan bébéan sakadi rupan ulam, miwah layangan pecukan, wanguné sakadi bindu ring aksara ong kara. Lianan ring punika wénten layangan kreasi sané nénten nginutin sepat siku layangan tradisional Bali, wénten marupa dedari, paksi clepuk, paksi sesapi, kantos wénten sané marupa sampian pénjor. 

Layangan miwah Agama

Yéning iraga jagi maosang layangan Bali, pastika taler maosang carita Sang Hyang Raré Angon pinaka déwan layangan. Kacaritayang Ida Bhatara Siwa sané maparagayan Raré Angon tedun ka mercapada malantaran antuk layangan, kairing antuk suaran suling sané prasida ngarauhang Sang Hyang Bayu (angin), punika mawinan sang sané jagi ngunggahang layangan pius-pius nulad suaran suling rikala nunjuk layangan, gumanti jagi ngacep-acep anginé mangda rauh ngeberang layangané ka ambara. Risampuné layangané makeber, irika raris tedun Sang Hyang Raré Angon jagi nyuburang bangket genahé malayangan. Kadinika kasukseman anaké malayangan ring Bali. Sampunang raris klangen nyingakin wénten layangan mapasupati, kandugi kantos wénten anak karauhan rikala malayangan, krana kawiaktiannyané malayangan nganggé dresta Bali punika madaging tattwa-tattwa agama sané dados bantang urip krama baliné.

Pauwahan Pikarya

Krama Bali, dumun ketah tur kaparinama mapikarya ring widang agraris utawi matetanduran, nanging sané mangkin sampun mauwah ngambil pikarya ring widang industri pamekasnyané ring industri pariwisata. Wicara puniki janten makta  ius ring kauripan parajajané. Ngiring cingakin sané mangkin, akéh bangketé masiluman dados paumahan, dados villa, penginapan, miwah hotél genah para wisatawané malilacita. Anak sané mapikarya sakadi punika néten dados iwangang santukan iraga, “Pada-pada ngalih makan,”  kadinika Anak Agung Raka Sidan artis lagu pop Bali maosang ring silih tunggil tembangnyané. Pauwahan bangketé puniki kawiaktiannyané sampun dados wicara saking sué, nénten pelad taler sekaa layangané “ngaremon” manggihin wicarané punika riantukan pakarangan genah ngeberang layangané sampun ical. Tambis-tambis anak sané jagi malayangan magingsir ka pasisi marebut genah sareng bendegané ngenahang jukung.

Bangket waluya umah sané kapingkalih olih para pamitresnan layangan. Bangket laksana kalangan Ida Hyang Raré Angon, yéning kalangan punika icalang  ring dija raris Ida pacang masolah? Napiké musti ngungsi ka pasisi?, pitakén salanturnyané napiké wénten Raré Angon ngangon ring pasisi? Panyawisné pastika nénten wénten. Mawit mangkin ngiring iraga sareng-sareng ngarajegang budaya malayangan duéné, malarapan antuk uning ring tattwa layangan. Tan lali taler ngiring rajegang kawéntenan karang sawah duéné. Mungguing ring pamerintah mangda ngamedalang awig indik nepasin alih fungsi lahan, sumangdénya sayan sué sayan rajeg kawéntenan karang sawahé maka genah patedunan Raré Angon masolah.