Puisi-puisi I Wayan Arthawa; Candidasa

Gagambaran Ni Kadek Rika Riyanti

Candidasa 

 

Ombaké magulungan tan pegat-pegat

kadi pemargin zamané 

candidasané masiluman 

bendéga-bendégané kalelep 

jukung-jukungné keni sihir kailut zaman 

kenehé ngengsut ring jaringé tas-tas 

sarwa ebéné sampun telas 

i kedis camar ngetélang yéh mata 

tan wénten rasa ring paidepan 

 

Candidasa kagerayangin turis-turis

masahsah ring biasé kasenget panes suryané

ring panginepané masuara lagu disko

cenik-ceniké sané ngarereh omang-omang 

bengong mabalih turis 

poosné ngetél sambilanga kitak-kituk 

 

Zamané sampun mamargi 

titiang tan pamanah 

 

Amlapura, 1990

 

 

Buitan 

 

Wengi punika 

majalan ring pasisin pasihé 

kadirasa anak ubuh 

tan polih kasujatian idup 

meték bintang ring langité 

titiang kadi anak alit 

nyuhjuh langit 

 

Wengi punika 

titiang tan pagenah miwah umah 

ngutang enjekan murang-murang 

kadi botoh kalah 

maselselan ring manah 

antuk idupé

 

Amlapura, 1990 

Catetan: Kaambil saking Kulkul (Jurnal Basa & Sastra Bali) No. 1 Th. 1 Fébruari 1997