Sing Ja Korona ané Ngeranaang Jejeh

Olih: Madé Adnyana Olé

Sumber Gagambaran; id.pinterest.com

Suba abulan I Dengkek inguh paling. Ngoyong jumah sewai-wai, sing magaé, sing nyidang pules. Makita pesu, jejeh tomplok virus korona. Ngoyong jumah, sepi lidig. Sing ada ajaka ngorta kangin-kauh.

“Dadi soléh asané umah sepi, ah? Sing ada ajak makedékan, sing ada ajak minum!” I Dengkek granggang-grenggeng sambilanga mecil HP.

Sakadan sekaa ané biasané sliwar-sliwer jumahné saka besik télpuna; sekaa tuak, sekaa ceki, sekaa tajén. Makejang idihina olas apang melali ka umahné. Sing ada nyak teka. Neked I Pelik ajak I Jebug sing taén nengok. Biasané, sabilang wai, pangabih ané paling satya ento cagcag-cigcig pesu mulihan jumahné I Dengek. Mulihan ngopi, pesu meli roko. Mulihan ngamah, pesu meli tuak. Mulihan pules, pesu ngenceh di samping pamesuané. 

“Dija, Lik?” I Dengkek nélpun.

“Ngoyong gén jumah, Bos! Sing dadi pesu jani!” saut I Pelik.

“Serem gén ci!” I Dengkek nengkik, laut HP-né matianga. Sawatara limang detik, HP-né buin idupanga.

“Dija, Bug?” I Dengkek nélpun I Jebug. 

“Ngoyong gén jumah, Bos! Sing dadi pesu jani!” saut I Jebug.

“Mimih, patuh seremné ajaka dadua!”

Suba abulan I Dengkek jumah dogén ngoyong. Inguh paling. Di Kantor Déwan makejang sidang batal. Jumun-jumuné ia marasa demen sing masuk kantor. Awak mula politisi males, awak mula anggota Déwan paling mayus,  tusing masuk kantor mula gaé paling luwung.  Gajih tetep jalan, tunjangan tetep maitung. 

Sakéwala, abulan ngoyong jumah, sakit masé tendasné. Kenehné inguh. Apabuin makelo ia sing maan luas keluar daerah, makelo sing maan malali-lali ka Jakarta, ka Bandung, ka Surabaya. Ané paling ngeranaang inguh, makelo ia sing maan ngedasin mata, makelo sing nepukin anak luh lénan tekén kurenané.   

Sakit sirah I Dengkek makeneh-keneh. Apa ngeranang I Jebug, I Pelik, tekén sekaa tuak, sekaa ceki, sekaa ngorta ajak seka-sekaa ané lénan sing nyak mulihné jani? Apa seken makejang jejeh ajak virus korona? Ah, serem gén!

“Apa ulian iraga sing ngedumang sembako?!” I Dengkek makleteg. “Mirib seken ulian iraga sing ngedumang sembako!”

Prejani I Dengkek nyemak HP. Ia lantas nélpun dagang sembako di peken. “Pesen sembako satus bungkus ané gedé-gedé. Éngalin!” Kéto munyin I Dengkek. 

Sawatara satu jam ngantiang, teka lantas mobil pikap ka umahné I Dengkek. Sopir pikap tuun. Satus bungkus sembako ukuran paling gedé pesuanga uli mobil, laut jéjéranga di balé daja. Suud kéto, I Dengkek nyemak HP. Ia nélpun I Jebug.

“Bug, né ada bantuan masan korona. Orain I Pelik ajak timpal-timpal sekaané nyemak sembako mai. Makejang maan duman pada abungkus gedé-gedé. Makejang orain!” 

“Oké, Bos!” saut I Jebug. 

Sawatara duang jam, sing ada ané nengok mulih I Dengkek. Abesik sing ada. I Jebug masé sing teka. Antianga buin ajam, tusing masé ada teka. Antiang buin limang jam, tusing masé ada teka. I Dengkek lantas nélpun I Jebug. Éh, HP parekané ané paling sayang ento sing aktip. 

“Makejang ajum-ajuman jani!” I Dengkek mamedih. “Mirib makejang suba sugih. Makejang suba sing perlu sembako!” I Dengkek ngopak padidina. Kurenané di balé daja negak di samping tumpukan sembako, sing bani maekin I Dengkek.

I Dengkek negak, angkih-angkih, tangkahné ketug-ketug. Tendasné kebut-kebut. Ia sing bisa makeneh. Apa ngeranaang makejang sekaa pendukungné sing nyak paek?  Sawatara ada ajam bengong, prajani cara nak makesiab I Dengkek. Ia makeneh. Seken-seken makeneh. Buin mecik gidat, buin ngésgés tenas. Cagcag-cigcig.

“Tusing ja ulian korona né! Pasti ulian pulitik” Kéto I Dengkek makeneh. 

Pilkada suba paek. Politikus uli partai ané lénan suba ada ané kampanya, suba ada ané majanji ideh-ideh. Waduh, bisa-bisa I Jebug, I Pelik, sekaa tajén, sekaa tuak, sekaa ceki, tekén sekaa-sekaa ané lénan suba melaib ka partai ané lénan. Ngalain I Dengkek.  

I Dengkek maplengek. Yen seken I Pelik ajak timpal-timpalne melaib ke partai ane lenan, bisa-bisa I Dengkek sing ngelah pendukung. Bisa-bisa ia bangkrut, suud dadi pulitikus, suud kapilih dadi anggota Dewan. 

“Waduh, bahaya ne!”

I Dengkek sing kuangan daya. Ia lantas nelpun I Suat, klian tajen ane paling terkenal tingkat kecamatan.

“Eh, Suat, Hari Minggu adaang tajen bukaan di arena sisin tukade bedauh. Undang makejang bebotohe ane  wayah-wayah”

“Sing dadi ngadaang tajen, Bos. Masan korona, sing dadi rame-rame!”

“Beh, serem gen. Oraang gen Pak Dengkek jaminane!”

“Yen keto, oke, oke!” saut I Suat.

Buin manine HP I Dengkek terus-terusan mamunyi. I Pelik nelpun.

“Bos, makelo sing maan matajen. Puruh tenase. Tulungin baang modal satu juta gen!” 

Suud I Pelik, lantas I Jebug nelpun. Suud keto salagenti sekaa pendukungne nelpun. Makejang nagih modal anggon matajen. 

I Dengkek kenyem-kenyem. Pendukungne sing malaib kija-kija, sing melaib ke partai lenan, sing mase jejeh ajak korona. Ane jejehine; sing ada tajen.

Madé Adnyana Olé
embas ring Tabanan, mangkin meneng ring Singaraja. Kakawiannyané marupa puisi miwah cerpén. Sampun ngamedalang makudang-kudang cakepan luiré Padi Dumadi (cerpén, 2007), Dongéng dari Utara (puisi, 2014), miwah Gadis Suci Melukis Tanda Suci di Tempat Suci (cerpén, 2018). Cerpénnyané taler sareng ring antologi Cerpen Pilihan Kompas 2014, 2016, miwah 2017.