Puisi-puisi Arya Darsana; Nuléngék Menék
 |
| Sumber Gagambaran; id.pinterest.com |
Ditu, di tongos ané sesai entasin
Ditu, di tongos ané sesai kasinggahin
Ditu masih tongos ané nyak ngadungang rasa
Ngadungang tresna ané maimbuh misi masemaya
Punyan waru ané setata manimpalin masurya girang
Punyan waru ané setata bungah yéning kalalinin
Punyan waruné pinaka saksi ngucapang rasa
Rasa ané tusing buin kapercaya
Enu ké inget tekén jukung bendégané dugas ento
Ané setata dadi témbok, sesai kaselélégin
Masambilan meliat kelod ningalin ombak ané ening
Ningalin bintang ané maberarakan di langité
Ditu suba tongos iraga masadu ajeng
Nanging, ané jani buka kedékin desiran angin
Makeber ngindang kanti tusing katingalin
Enuké adi inget ?
Singaraja, 2 Juli 2020
Nuléngék Menék
Mula tusing ngidaang kanti nuléngék
Nuléngék, tuah baong né ané lemuh
Kadirasa tusing bani nolih ané di betén
Tusing ja lén, ento ulian nuléngék menék
Menék baduur kanti tusing ada nyujuh
Ané nyujuh tuah ané nawang tuyuh
Tuyuh né énto mula saja masuang peluh
Peluh ané makada landuh
Da pati nguberin ané tusing pantes uberin
Apanga tusing katanjung ulian becat malaib
Baang ia malain kanti tusing ada ngimpasin
Ngimpasin ané tusing pantes impasin
Indriané tusing dadi palebihin
Apanga tusing cara ulungan durén
Pamuputné payu magelebug
Demen ké yén suba kéto ?
Singaraja, 8 Méi 2020
Bungah Kaliwat Ngéndah
Guminé suba mayusa wayah
Mabikas melah sasimbingné ngéndah
Pada uyut magarangin ané tusing ngenah
Kanti engsap tekén wates umah
Sabilang tolih ngansan tawah
Maimbuh panganggo sarwa méwah
Mula saja makejang ia ngelah
Napi ené kaorahang bungah
Bungah dimuncuk, kanti tusing ada nunggah
Ulian meled ngisinin keneh jengah
Jengah ané tusing ngansan telah
Kanti engsap tekén kawitan sanggah
Duuh, kewéh yén setata ngaba keneh corah
Corah ané ngaé keneh bungah
Napi ené kaorahang tulah
Sajaké ento ah ?
Singaraja, 22 Fébruari 2020
Dharmaning Dharma
Bekel idup wantah karma
Patut iraga ngamargiang swadharma
Swadharma tekén rerama
Ngantos swadharma tekén pisaga
Marcapada genah ngarastiti
Mulat sarira anggén sutrepti
Majalaran antuk manah suci
Sampunang engsap tekén mabakti
Solah manusa kadi raksasa
Keneh corah lebihan daya
Tuah ngitungang ané madan indria
Kanti engsap tekén sesana
Pageh déwék patut kagisi
Agama wantah anggen tati titi
Sira ané mabéla pati
Nika manusa sané sujati
Singaraja, 9 Novémber 2019
mahasiswa STAHN Mpu Kuturan Singaraja
No comments