Gitanjali (17)

Olih: Rabindranath Tagore

Sumber Gagambaran; pixabay.com

/65/ 

Berem déwatané sané engkén sané senengin I Ratu, Ratu Sesuhunan titiangé, ring lumur urip titiangé sané meliah ngabéhin puniki? 

Ratu Sesuhunan titiangé, puniki minab sesenengan I Ratuné sané mangkin, nyuryanin damuh I Ratuné metiti antuk matan titiangé, taler melekeneng ngadeg ring song kuping titiangé ngepil miarsaang sarin kidung I Ratuné sané nerus? 

Anggan I Ratuné ngulat kekecapé sané ring manah titiangé, raris lédang kayun I Ratuné ngewuwuhin antuk sarin kidung. Antuk sih swécané I Ratu micaang anggan I Ratuné ring titiang, raris mintonin mekabungkul legit I Ratuné ring sikian titiangé. 

/66/ 

Ipun sané setata megenah ring sikian titiangé, ring penelas terang miwah cecingaké sané aseledétan; ipun sané nénten naan ngelugas tedung ipuné ring terang semengé, puniki sampun aturan titiangé sané pinih ungkur ring I Ratu, Ratu Sesuhunan titiangé, ilid ring sarin kidung titiangé sané pinih ungkur.

Sampun lemesin ipun, sekéwanten nénten keni antuk; ényor-ényorané saat ngenjuhang liman ipuné sané iseng ring ipun, sekéwanten nénten kesidan. 

Ngumbara titiang ring pedésaan, sekéwanten ipun sepel titiang ring sarin manah titiangé, sareng ipun titiang ngerasanin bagia miwah lacuré, kepit miwah pademé. 

Ipun ngéncakang manah miwah solah titiangé, pedem miwah pengipian titiangé yadin asapunika, pedéwékan tur ngempi ipun. 

Sareng akéh ida danéné nogdog jelanan kubun titiangé nakénang ipun, raris metulak mebekel salahasa. 

Nénten wénten ida danéné sané naan manggihin ipun. Kantun ipun ngempi ngajap-ajap peswécan I Ratuné. 

/67/ 

I Ratu sampun ambarané, genah sané pinih becika anggén pesayuban. Inggih Ratnayu, ring pesayubané punika sampun sih I Ratuné ngaput manah titiangé antuk warna, suara, miwah ambu.

Semeng rauh, buntut kenawan ipuné ngamel wakul emas medaging sekar taman sané ngulangunin, nyelebseb ngelungin jagaté. Wenginé tedun, ngelintangin ambengan saih-saihan, sepi singid kaonin raré angon, ngelintang ring marginé sané durung naan kelintangin, makta toya tabah sané tis ring tékot emasé kambil saking segarané sané demdem sané ring bedauh. Sekéwanten i rika, ring genah ambarané sané kebat jimbar, genah uripé melaib mengkeb, i rika jumeneng sunar putihé sané nénten medaging kotéh. I rika nénten wénten raina utawi wengi, pepindan utawi warna, taler nénten wénten baos, nénten naan wénten. 

/68/ 

Sunaran suryané tedun ring jagaté, tangan ipuné kebat, raris araina bentet ngadeg ring embakan kubun titiangé, jagi ngantukang ring cokor I Ratuné, sasabé sané mekudus saking toyan mata, pedeep, miwah sarin kidung titiangé. 

Antuk sih swécané bedbedang I Ratu sasabé punika ring dadan I Ratuné sané medaging bintang, raris ipun selediang I Ratu dados pepindan miwah tampih-tampihan sané nénten keni antuk ngewilangin akéh ipuné, taleripun warnain I Ratu antuk warna sané setata megentos-gentos. 

Kelintang ingan ipun tur dangan kecas-kecos, lemuh, ngelangenin, tur remrem, asapunika sampun sané ngawinang ipun sihin I Ratu, inggih Ratu sané nirmala turmaning nénten medaging kotéh. Asapunika sampun sané ngawinang ipun kelugra ngembanin sunar I Ratuné sané kebinawa putih, medaging lawat sané ngulangunin. (masambung...)

Catetan: Kabasabaliang olih Komang Berata lan kawedar antuk Sanggar Buratwangi warsa 2002