Bongkling CXXI - CXXVIII

Sumber Gagambaran; commons.wikimedia.org

Kaketus saking manuskrip duén Ida I Déwa Gdé Catra, Karangasem

/121/

Kocap bin mani semengan,

sang prabhu mahyas dén aglis,

ngrangsuk bhusana kaprabhon,

madastar taluki kuning,

mabapang sutra wilis,

makulambi sutra dadu,

mawastra sutra barak,

masaput péremas putih,

tuhu bagus,

tan péndah danawa raja.

/122/

Raris mijil ka bancingah,

punggawa hatap manangkil,

sang prabhu ngandika halon,

jalanang panjaké jani,

né iba Citrarukmi,

pareng ajak I Mastrangkul,

to iba nabdabang, 

pajalan panjaké sami,

teked ditu,

apang da magaliyuran. 

/123/

Belog iba maningkahang,

iba kumandelang kahi,

sekenseken ngalih tongos,

pan iba mula prajurit,

kasub uli né nguni,

tuwa-tuwa manggih kéwuh,

kucut mandus ban erah,

malamurud baan mimis,

twah kasumbung,

baan langité di Mekah. 

/124/

Humatur mantri prasama,

kéwanten ratu cingakin,

bhaktin tityangé manyokor,

mambétél rawuh ka hati,

amwit kahula mangkin,

ngater kawulan i ratu,

sang prabhu mangandhika,

nah kema majalan jani,

da sud-suhud,

iba kurang-kurang yatna.

/125/

I Panjaké suba madabdab,

majalan matindih-tindih,

gumuruh nyurah mangrodok,

tan pegat mawanti-wanti,

rasa bubur kang bhumi,

kadi i gelap matarung,

sang prabhu paling huntat,

sampun manunggang padhati,

gedhé luhur,

kakedeng ban sampi wadak. 

/126/

Sang prabhu malinggih nyuréngkang,

madekesan ban ngerati,

kebus hatiné mangorob,

pra rabi sami nampekin,

ada mangabin batis,

ada manongos di pungkur,

mandadi pasadahan,

lén ada juru ngepetin,

hayu-hayu,

tuwi wantah daging pura. 

/127/

Sampun manglintangin désa,

manincap alasé sepi,

dekdek rebah pakaropod,

kayu asing kahentasin,

buron padha malahib,

manjangan senggah lan wijung,

macan kalawan bojog,

pétu miwah béri-béri,

buka kepung,

malahib pati badagal. 

/128/

Tan kocapa prabwing Mekah,

mangkat pareng para istri,

sang mantri ring alas mondok,

I Gusti Agung balikin,

caritayang né jani,

miragi pacang kagebug,

antuk raja di Mekah,

salahé nundén ngembarin,

selam dukuh,

kéto ban anak ngorthayang. 

(pacang kalanturang...)