Lawat-lawat; Ilmu Kedék

Olih: IGA Darma Putra

Sumber Gagambaran; dadaenfantterrible.blogspot.com

Di gumi ané lebian sengsara ené, luung asané iraga malajah ilmu kedék. Kéwala sing dadi kedék guyu-guyu. Musti sekenang malu kedéké apang teka uli rasa hasya. Nak kéweh jani ngalih kedék ané seken-seken. Suba liunan anaké cara pamain drama. Mapi-mapi kedék, sujatiné di tengah kenehné sedih kingking ulian baat mondong sengsara.

Malajah kedék patuh tekén malajah bagia. Sing luung yén bagia mapi-mapi. Ané madan bagia, sing perlu iraga uyeng-uyengan ngenehang isin basang. Sing buduh ngitungang kasugian anak lén. Sing kéweh ngenehang idup anak. Kadén suba orahina, apanga iraga bisa ngaba keneh. Kenehé ané ngempu iraga apang tusing ngawag. Iraga masih dadi pangempun keneh apang tusing singsal. Awak ajak keneh apang ngidang saling empuin.

Seken sajan pitutur para lingsiré ngundukang keneh. Uli di keneh iraga apang bisa ngaba luung. Keneh luung ento wantah keneh hening. Keneh hening ngidang bakat yén suba biasa negdegang keneh ané ngaléncok cara sagara. Sing aluh, sing kéweh yén iraga dot negdegang keneh. Sagét kenehé buut ulian ngenehang utang, di utangé ento masih tongos ubad buuté. Énggalin bayah, dasarin baan utsaha. Sagét buut kenehé teka uli gegaén, énggalang pragatang gegaéné ento. Eda buin misi bin mani bin puan. Suba ketah, buuté lekad ulian awak padidi.

Malajahin ilmu kedék, apang bisa masih ngejang dikénkéné dadi kedék, dikénkéné dadi ngeling. Sing beneh masan anaké kedék, iraga ngeling sengi-sengi. Masan anaké ngeling, iraga kedék ingkel-ingkel. Apa buin ngedékin timpal ané sedeng ngeling ulian kena sengkala, ento sing dadi orahang beneh.

Jani apa buin liu anaké marebutin kedék. Ada ngedékin agaman anak. Ada masih ngedékin sang ratu nyakra warti. Sing bedik anaké ngedékin para Pandita ané maraga putus. Kadénanga patuh paragan idané ajak lelampahan bebanyolan.

Lén anaké kedék, lén buin anaké bes serius. Sing kuangan anak bes kaliwat duegné kanti makejang ané tepukina kadéna harus pragatang aji serius. Alisné pragat mapecukan. Bibih pragat ngumik. Sebengné pragat nges tekek. Anaké ané kéto, sing bisa ngedékin awakné padidi. Yén suba iraga pragat serius dogén, sing bisa ningehang anak ngemang panyadcad. Sing ngidang ngayasang layahe apanga nyak mendep. Pikolihné cara I Kakua di satua Tantriné. Ulung maglebug dadi tetedaan cicing.

Yén iraga mabakti masih pinunasé apanga nyak kedék. ‘Ratu Bhatara, titiang nunas ica’, keto abeté ngregepang saa mantra. Uleng kenehé mapinunas apang nyak kedek. Kudang banten bebangkit, guling bawi, manca sato kadén suba bakat aturang apanga iraga maan paica kedék. Tegarang kenehang, ulian iraga dot kedék, angkihan beburoné bakat aturang. Sing to madan ngedékin angkihan?

Bisa lantas iraga ngalih-ngalihin pabeneh di lontar-lontar salinan ané gaéna tekén nyén kadén. Pragat mamisuh dogén gaéné suud maca lontar salinan. Pisuhé bisa masih dadi pisuna. Né madan buduh amah sastra. Sing nyak cara tetujoné makatang sarin-sarin sastra. Justru awaké anyud, punyahin sastra. Sing ngelah panyaringan anggon nyaring ané kén dadi anggo, ané kén sing dadi. Jeg makejang aud kélorang dadi jlema belog. Iraga ané maca sastra mara madan dueg.

Suba suud kéto lantas, makejang anaké temah. Orahang tusing beneh pajalané imaluan, wiréh tusing kadasarin baan sastra. Kéto iraga ngumik padidian di karang suung. Terus iraga kedék, nepukin pelih-pelih anak. Punduhang pelihé ento kanti cara gunung paling gedéna. Adanin gunungé ento gunung tegeh pelih-pelih. Terus bakat punduhang, nyansan tegeh gunungé. Pragat suba gunungé negeh-negehang. Sabilang negehang, terus kedék marasa bagia ngidang munduhang pelih-pelih anak. Apaké kedék buka kéto ané alih? Sing nyen ento ciri iraga punyahin panugrahan kedék? Bes terus kedék bisa masih dadi ling.

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.