Puisi-puisi Putu Ardana Bukian; Sabeh Asih

Sumber Gagambaran; https://id.pinterest.com

1. Masadu Ajeng

rumasa gargita
rikala kapaica galah
prasida masadu ajeng
kakenyemin manglé nur candra
magegilik ring purnama kapitu

rumasa égar ring pakayunan
rikala manah lan cita masikian
ring unteng-unteng babawos
melarapan antuk pilpilan kosabasa

rumasa rumaket
matemu wirasa, pakedék pakenyung
tan ngandapang lan ngasorang
sami mepajar sakadi toya danu
banban alep
naging nyiratang çantih
lantut prasida nemugalang.
 
                     (jayasabha,10/01/2020)

2. Puisi

wénten genah becik anggén masayuban
wénten genah luih anggén nuréksain pikobet jagat
dados kaanggén pratiwimba..
rikala layang angelayang rasa ring raga
wénten genah nyuriakang sehananing pikenoh sungsut
kalimbakang dados jimbar

niki sampun genah becik
anggén nandur-nandur kasukacitaan ati
siki-siki kapilpilang
sekadi majejahitan kosabasa
nyuarayang indik saluiring sané wénten
ring garba angga.
  puisi

                   (krobokan /0120)

3. Sabeh Asih

Tedun nyunyur manis mangerèka asih
Nunggilang kama akasa pertiwi
Semeng meraga dayuh kedas nyamplas
angin nyirsir suirsuir
Ngerumaketang i kukur masesaput kampid sabeh
Manesil ring muncuk bungsil
Metékin siki- siki bulih-bulih sabeh nyapa ngusudin alus bibih danyuh
Mogi pemargi ten ngametuang nirdon

Semeng meraga nyom
Sekadi nyawis pikobet krimik daging gumi
Nunas dayuh nunas peneduh mogi ngelantur jaggaté landuh

banyuning/2020

Putu Ardana Bukian
embas ring Bungkulan, 1982 lan magenah ring jalan Pulau Obi, Singaraja. Mangkin kantun makarya dados guru ring SMKN 1 Kubutambahan.