Puisi-puisi I Nyoman Sutarjana; Sapta Timira
 |
| Sumber: id.pinterest.com |
Tri
Tatiga
Tatiga Bantang
Sané mentangin kaluihan Bali
Hita
Bagia
Lega liang
Gelarang moksa lan jagadhita
Karana
Unteng
Tetuek sané ngadakang
Bali kasengguh luih mautama
Tri Hita Karana
ajahan luhur paripurna
Parhyangan, pawongan, palemahan
Tatiga paiketan sané patut ajegang ring kahuripan
nov 2019
Sapta Timira
Kaliput peteng sintru
Beneh pelihé dadi saru
Parilaksana tanpa sepat siku
Sakadi tan maguru
Maseteru paturu satru
Makanti momoné di malu
Mamokak pada jumbuh
Timira ing tengahing dalu
Manados jalu ngenain ampru
nov 2019
Tri Rna
Idupé mabekel utang
Utang ané tusing
kena ban ngitung
Magantung ring tungtungin urip
Puntang-panting utangé tusing purup
Purupin uripé ulian yasa lascarya
Mogi-mogi renané sayan rina
januari 2020
Sad Ripu
Mesehé masaih
meseh masiliban
tongosné tan madoh
masisipan ring ati
rikala ripuné mamurti
kenehé momo ngarapu
matsarya ngaraksa
krodhané ngarubéda
kaoné kayunin
solahé suluhin
slikisikin saka siki
apang mesehé sami somia
péb 2020
Catur Guru
Yén ragu
mai maguru
ring raga
hyang guru malingga
yan lali
mai malali
malila ring aji biyang
guru ané ngaréka
yén bingung
mai di bengangé
ada benang apang beneng
ajah-ajah guru pangajian
yén jejeh
mai jujuh
dharmané negarané kukuhin
guru wisesané ngaraksa
péb 2020
guru ring SMA Negeri Bali Mandara. Malajah nulis angge sarana ngubadin tatu-tatu tangkah
No comments