Puisi-puisi IGB Wéda Sanjaya; Jalan A. Yani Nadak Sepi

Sumber Gagambaran; id.pinterest.com

Jalan A. Yani Nadak Sepi

Jalan A. Yani nadak sepi

Tuara ada puisi malali

Ané ngliwat tuara nyambat sara

Ané nyambat sara tuara saja

Telung jam tiang ngantiang

Jalané nu masih sepi

Motoré pasliwer

Tuara ngaba ramé

Mirib raméné ané tuara ada

Kudang tiban suba iraga matemu?

Tiang nyujur kampus

Idéwa ada kala nika

Matanja kenyung wangi sekar gadung

2006

Jalané ené manyama ajak tiang

Anggo tiang tugelan

Ngantih ipian

Ah, kampus tiangé suba ilang

Jepuné ilang

Tresnané ngambang

Di betén jepune pidan

ada anak luh maplalian smara

Tiang kasmaran

A.Yani ramé ulian puisi

Né jani

Saget nadaksara sepi.

Nandur

Bulihé suba sedeng tandur, Gég.

Kéwala entegang kenehé mangantosang.

Mani ada déwasa, barengin tedun di carik.

Yadian ceriké tuara pagelahan.

Ngendon uripé, patilesang ragané.

Yén bulihé suba dadi padi,

Paselegin nyukutin.

Di disné manyi, 

ditu liangé édéngang.

Negak

Melahang negak, Gég

Eda bes tegeh,

anginé ngesir bisa ngilangang ngeh

Yan baduur,

jalané masisa tuah nuunang

Ngancan tegeh,

saget ulung sakité nyajang

Tongos negaké pilihin

Eda negakin gedebong

Apang tusing kuni anak ngomong

Gég né masa jité belus

Melah yan negak di dampar

dampar kayu, dampar besi

tegeh andap, luan tebén dadi

Kéwala eda kanti nglikadin anak lén

ulian tegak bisa ngaé salah panampén

Yadian ada tegak baduur,

negaké apang nganutin sulur.

Yén dadi alih,

Ané betén pilih 

Belog ajumé tejek tegul 

ané ngliwat apang nguntul.

  

Sikep

Kebatang kampid idéwa

Mangda teeb manah sang ngaton

Kéwala sampunang lali

Ketékin buluné saka siki

Rikala nyujur muncuk

Selahang matinggah ring carang

Sisik buluné,

wilangin iwangé

Mangda tan baat keberé

I déwa sikep

Mautama genah ring akasa

Kéwala sampunang lali

Wit pranan idéwa ring pretiwi

Yéning tegeh idéwa mangumbang

Paliaté sampunang ngambang

Manahe sampunang bimbang

Uleng ring pangapti

Lawat idéwa ngetisin gumi

Kélangan

Kélangan batis

Kélangan lima

Kélangan awak

Nadaksara makejang ilang

Batis tukung

Lima buntung

Awak putung

Panumaya makejang limpung

Kesyab akesyaban

Sebet asebetan

Kéwala urip patut majalan

Jalané jalanin

Uripé jalanang

Ané gelahang jani aduang

Eda kanti nguredang.

I Gusti Bagus Wéda Sanjaya
guru Basa Bali ring SMA Negeri Bali Mandara. Kakawian dané naanin kawedar ring Bali Post miwah Suara Saking Bali