Puisi-puisi I Gedé Angga Para Darma; [Meli Ijazah]

Sumber Gagambaran; id.pinterest.com

[Meli Ijazah]

Uli cenik I rarama ngasukang I pianak ka sekolah

Arepané apanga I pianak nawang ajah-ajah

Apang nénten malih kajajah

Mun punapiang yén anaké kasekolah,

Tan nyak malajah?

Anggapa kasekolah ané penting nyidang mayah

Tusing penting malajah

Punapiang apang sida molihang ajah-ajah?

Sira ané salah?

Ahhhhhh

Meli gén suba ijazah!

Apd, 15/08/2019

[Nguntul]

Padidina ngutul

Diraméné masi nguntul

Kadén apa ané ka untul

Tuah ngetul hp layar ketul

Iteh padidi sing ngarambang anaké di samping

Lamun nu ngelah kuota, nguntul ané paling penting

Wiréh di layar ketulé ento ada info,

Hiburan ané sida ngaé kenyam-kenyem ngilangin muané seming

Ahh bes lebian nguntul, ngaé baongé sakit gering

Sirahé uring-uring

Ahhh pusing

Apd, 14/08/08/2019

[Magarangin Kursi]

Éhh nawang cai?

Apa ané pagarangina di jamané jani?

Tusing ada lén tuah asiki

Kursi

Prajani alus, meyadnya, ileh-ileh nyakupang tangan ngaturang bakti

Nanging di sirahné tawang apa ané misi?

“Pokokné icang apang maan dogén kursi!

Sing masalah jani ileh-ileh ngaturang bakti

Kema-mai meliang kader nasi

Ané penting kursiné ento cang ané ngisi.”

Uli prebekel, Lurah, DPR, présidén, miwah bupati

Makejang magarangin kursi

Kursiné ada tuah asiki

Ané magarangin ajak dasa tali

Magarangin kursi, ngaé déwék mabalih ngantos haha hihi

Apd, 12/08/2019

I Gedé Angga Para Darma
mangkin kantun kuliah ring Jurusan Pendidikan Matematika Undiksha. Polih jayanti II nyurat cerpen basa Bali PKB XLI warsa 2019.