Mantu

Olih : IDG Trinandita

Sumber Gagambaran; https://id.pinterest.com

Sampun majanten ring parikrama warginé yéning maduwé  pianak sampun ngamargiang gréhasta asrama sangkaning sampun alaki rabi sinah reraman ipun kasengguh sampun maduwé mantu. Indiké punika mapidabdab becik ring keluarga inucap. Riantuk i pianak sampun ngawentuk keluarga anyar sané kaarepan olih reramannyané prasida ngalanturang  kahuripan puniki.

Wénten mantu istri lan mantu lanang. Yéning pianak istri sinah jumenek ring jumah matuan ipun. Yéning  pianak lanang  mantu istri punika sané jumenek ring jumah anak lanang. Taler wénten sané kasengguh ngantén pada gelahang.  Mantu puniki maduwé tategenan ring jumah matua lan ring jumah ipun pedidi. Ngantén pada gelahang puniki kamargiang sangkaning reraman sang istri maduwé pianak adiri. Yéning ngantén nyentana mapidabdab sang istri sané ngambil sang lanang raris jumenek lan polih amongan ring jumah sang istri. Punika parikrama kramané ring Bali.

Mantu sujatiné wantah pianak sané katemu gedé. Pianak sané ngeranjing ring keluarga anyar risampuné yusané bajang  truna. Mantu punika dados pianak anyar ring jumah matuan ipun. Pianak sané pastika maduwé amongan lan tanggung jawab sané patut dados uratian. Amongan sané kagamel pastika abot. Akéh pidabdab lan gegamelan sané patut kamargiang lan kalaksanayang.

Ring genah sané anyar i mantu pastika jagi maduwé matua. I mantu pastika durung tatas uning napi sané kasenengin lan napi sané tan kasenengin i matua. Punika taler i matua. Mawinan i mantu lan i matua sekadi wau kenal lan melajahang raga mangdané nénten iwang penampén akur lan  nénten malaksana iwang midabdabin parikrama sané  kamargiang ring keluarga anyar punika.

Iriki pastika i mantu maduwé pikobet niténin angga sumangdané prasida dados mantu sané kaarepang. Pidadab  dados mantu sujatiné boya ja  pikobet sané abot yéning i mantu prasida nyelehin raga. Mapratiaksa ring angga sarira. Napi sané kabuat tur kelaksanayang majeng matua punika wantah tambunan karma sané jagi kapolihang ring kahuripan selanturnyané. Becik i mantu maparisolah majeng matua becik taler sané kapolihang ripungkur wekas. Sang wikan maosang napi sané kelaksanayang mangkin asapunika sané katemuang bénjang pungkur.

I matua pastika ngarepang parikrama becik sané kelaksanayang i mantu. Kaarepang prasida ngelanturang parikrama nagingin pidadab anaké sané sampun makurenan.  Wénten amongan maagama, maadat lan manyama braya. Ring pidadab maagama patut uning majejaitan, nanding canang, mabanten, nyiagayang rerahinan, odalan, Galungan, Kuningan, Nyepi, Purnama, Tilem, Saraswati, lan akéh sané tiosan. Ring pidadab maadat sekadi ngelaksanayang parikrama adat ring Désa, wénten ngabén,  gotong royong,  ngayah ring pura désa lan akéh tiosan. Ring parikrama manyama braya sekadi matetulung ring pasametonan, wénten anak ngantén, nelubulanin, ngotonin, makutang bok, potong gigi , lan sané lianan.

Ritatkala sampun maduwé pianak sinah i matua maduwé cucu. Irika nyangsan akéh amongan sané kagamel.  Mawinan mantu kasengguh maan tuyuh. Minabta sane kasengguh tuyuh punika maartos akéh pidadab sané patut kagamel lan kalaksanayang. Mantu kanikayang maan tuyuh. Punika sering kapireng lan dados gendu wirasa kramané ring parikrama kahuripan sané kamargiang ring Bali.

Sami pidabdab becik punika majanten nénten sami prasida kadabdabin. Sangkaning jatmané tan luput saking kekirangan. Prasida ngelaksanayang atenge sané kawedar sampun kasengguh becik. Yéning tan prasida niténin sané kawedar ring ajeng. Sakémawon prasida ngaruruh pangupajiwa sinah indiké punika taler mabuat. I matua  pastika nyuksemayang kawéntenan punika. Riantukan i matua punika sampun dumunan ngarasayang dados mantu.

I Déwa Gedé Trinandita
urati lan seneng ring parikrama Bali.