Bongkling (LXI - LXVI)

Sumber Potrekan: https://pixabay.com

Kaketus saking manuskrip duén Ida I Déwa Gdé Catra, Karangasem

/61/ 

Né jani ya ada selam,

né maadan Pan Dhurahim,

ya sengit uling makelo,

mabuddhi manglawan cahi,

kenehang uli jani,

pang da kuciwa pangawruh,

krana cahi kaséngan,

pacang metuk Pan Dhurahim,

da ja hibuk,

pacang metokang karuna.

  

/62/

Pan Bongkling raris manyumbah,

tityang sandika I Gusti,

manawi tityang kapencok,

mangdé sampun tityang sisip,

mantuka ring I Gusti,

déning ipun kasub wruh,

soroh selam punika,

yan tityang ndikayang nyangkit,

nawi pelut,

antuk tityang makaruna.

/63/

Gusti Agung mangandika,

kénkén ja cahi Pan Bongkling,

bwatang manggawé guguyon,

mametuk ya Pan Dhurahim,

ya nu katundén ngalih,

Pan Bongkling kenyung mahatur,

becik ratu gelisang,

tityang melajah nimpalin,

déning ipun,

selam putus saking Mekah.

/64/

Sagét teka uli kaja,

néné madan Pan Dhurahim,

mahiringan ya marérod,

soroh selamé kiyayi,

watek né ririh-ririh,

pacang mapetuk pangawruh,

sarawuhé di bancingah,

Gusti Agung manyapatin,

iba dukuh,

mahi pahekang manegak.

/65/

Baan iba kasub bisa,

di selam twara nandingin,

mené ada janma hiyos,

néné madan ya Pan Bongkling,

iya jani tandingin,

i dukuh selam mahatur,

hédalem tityang pisan,

kuciwa antuk Pan Bongkling,

dija ipun,

keni tityang sahuninga.

/66/

Pan Bongkling sumahur getar,

icang né madan Pan Bongkling,

icang mabuddhi matakon,

tekén tingkah gama suci,

meled macitta huning,

dé kukuh kenyung masahur,

lawutang ja matakon,

pang kereng juwa nakonin,

héngkén malu,

né jani bakat takonang.

(pacang kalanturang…)