Puisi-puisi Ni Kadék Juliantari; Nang, Ning

Sumber Gagambaran; https://www.pictorem.com

Basa Ibu

Ibu...

Ibu sané nuntun

Ngucap kosabasa sané santun

Sor singgih basa nénten dados kalémpasin

Asah, asih, asuh pada isinin

            Ibu...

            Ibu sané ngardi

            Jagaté rahayu lan sutrepti

            Antuk kawéntenan tata titi

            Sor singgih basa sané nyihnayang rasa subhakti

Ibu...

Ibu sané mituturin

Kruna lan lengkara manyunarin

Sami jangkep mategep ngiasin

Pasang aksarané kaplajahin

            Mabatun buluan, manahé masikian

            Subhakti ring ibu sinamian

            Sampunang ngantos kasépan

            Mangda nénten makamen di sunduk, maselselan

Wayang

                       

Lawat-lawat marawat-rawat

Di kenehé suung joh sawat

Mangigel di durin langsé saling siat

Ketog semprong damuhé saat

            Uli malu ngenah masiat

            Sujatiné apang ada rasa saat

            Mabalih wayang

            Rasa angobé kantos ngulayang

Kebyah-kebyah sundihé manyunarin

Manah indriyané kadulurin

Ngaksi I Wayang mangigel

I Dalang nyuarayang tan parasa kenyel

Nyalanin Karma

Pajalané luntang-lantung

Luntang-lantung malalung

Nyujur tongosé suung

Mabekel keneh puyung

            Ané ipidan tepuk luung

            Ané jani karasa suung

            Ané ipidan tepuk melah

            Ané jani karasa jengah

Jelé melah masolah

Jeléné makada dini ditu kaulah

Melahé makada jalané élah

Nyujur tongos ane melah

Nang, Ning

Ning... Ning... Ning...,

Cening.

Pagehang manahé ening,

Cening.

            Nang... Nang...Nang...,

            Nanang.

            Manah tiyangé uyang,

            Nanang.

Ning... Ning... Ning,

Cening.

Ngudiyang masemu seming,

Cening.

            Nang... Nang... Nang...,

            Nanang.

            Sampun tusing sida baan tiyang naanang,

            Nanang.

Ning,

Nang,

Ning,

Nang,

            Cening...

            Nanang...

Cening.

Pirengang malu Nanang,

Cening.

Gelung

elung balung

ulian marebutin luung

elung balung

ulian marebutin gelung

disubané elung

mara kauk-kauk “tulung...tulung...”

            di luungé ngaé manah linglung

            mameteng manahé ngrebutin balung

            tusing karungu kén luung, kén puyung

            gelungé makejang tepuk luung

bungah magelung

kanti engsap tekén suwung

manahé satata puyung

kénkénang lakar nepuk ané luung

Ni Kadék Juliantari
embas ring Ulakan pinanggal 3 Juli 1987, dados Dosén ring Prodi Pendidikan Agama Hindu, STKIP Agama Hindu Amlapura.