Puisi-puisi Putu Sedana; Pitik Bengil

Sumber gagambaran; www.deviantart.com

Gatra Saking Padukuhan

Ri kala angin padukuhan aris ngwangun wirasa

sangkaning papolosan

mauder-uder ngruruh panyawis

wulan parahyangan sepi ring tepi siring, sepi

bintang-bintang katarka nyekeb semara

I ratu ajeg mlingga ring puri kangin

semeng

sinambi angentas kangen

nyemita drawa

pelambang manis jagat gemuh raharja

kasunggi laras wadua

ri antuk sadina bakti tan papuara

Teruna lara muspa ring bencingah

negesin kayun i ratu

mapiranti iseng ngicalang lanji

Hate anurak lemah.

Sura Mauah-Uah

Meseh              : sura dira

Pawestri          : sura semara

Hyang Widhi : prani kipa

Bétél lumimpad

pupulan sari

kasurat angin merdangga

Pitik Bengil

Mungkah sarga madamar jarak

nasi semeng ngejohin lawan

darpana masaput angen

cuntaka sadina kadampeh angin di rasa

Akudang purnama nyentana di karang pakandelan

ngalih panawangan teked ka gumi Cina

buyar buyar satua ngepik kendang warisan di tanah plekadan

gendér seronca

ada pematut ané pantes itungang

Raket sekadi kadi asing pula sarwa nadi

pitik bengil ngelangi di langit

masugi di pasih

Lovina Jiwan Titiang

Angin pagunungan sumilir nglukat segara

nyerita sarwa puspa

pasir petak ngerem tresna

rambut pirang basuh ombak dilah surya saga

wangi wangi milet cerita

masundih bulan gedé désa pangaruman

Lovina murda manis jagat Buléléng

kasinebké puniki?

tangkad karang kembaran dolpin semeng

Lekes lumrah katang-katang matali panjang

nglukar iseng embahan segara pinaruh

merem-merem semitané ngentikang sari

Jari arenik muspa subaya ring pasarén

nyampuh wirasa sanangken purnama

Lovina tanah lelanguan.

Putu Sedana
embas ring Pengastulan, tanggal 17 Désémber 1932. Dané namatang pendidikan ring Sekolah Tinggi Ilmu Sosial lan Ilmu Politik Wirabhakti Dénpasar. Naanin dados Staf Pengajar ring Universitas Panji Sakti Singaraja. Dané nyurat makudang-kudang puisi, prosa, drama, sandiwara radio mabasa Bali wiadin Indonésia. Lianan ring punika, dané taler makarya lagu mabasa Bali wiadin Indonésia. Kakawian-kakawian dané punika naanin kamuat ring surat kabar wiadin kasiarang ring TVRI acara Pusat, RRI (studio Yogyakarta, Semarang, Surabaya, Dénpasar, lan Singaraja). Cakepan dané sané sampun kawedar inggih punika “Bali Suar Tanah Dumilah” pupulan puisi mabasa Bali.