Suud Peteng Endag Galang

Olih: IDG Trinandita

Sumber Gagambaran; id.wikipedia.org

Minaban wénten sané maduwé pikayun sekadi sané kepidartayang puniki. Ngaksi panglimbak informasi lan téknologi sekadi mangkin majanten akéh sané kabaos kemajuan. Ritepengan aab jagaté puniki yéning umpamiang jatma sané buta huruf utawi nénten uning nguwacén menados pretiwimba kerasayang sekadi aget pisan. Punika naenin dados karengkengan ring manah. Napi awinan, mapan sangkanin buta huruf mejanten tan prasida nuutin  pakibeh jagaté. Ipun tan naenin miragi hoaks, nénten ngikutin médsos, internét, lan informasi lianan. Cutetné informasi napi ja sané ngawinang bendu ring kayun pastika tan dados pikobet sané kerasayang. Ipun nénten naenin tolah-tolih ring margi sané akéh wénten informasi, baliho, iklan lan tiosan. Sinah ipun uleng ring tatujoné. Ipun rumasa degdeg ring manah nénten ngerambang pakibeh jagat.  

Punika naenin kemanah ring angga, sekadi mapakéling ring akéh nyané pikobet lan wicara sané mawit saking panglimbak ilmu pengetahuan lan téknologi sekadi mangkin. Utamin ipun ring Médsos. Panglimbak sané pastika madaging jelé lan melah.

Jatmané mangkin sekadi kalikubin antuk informasi. Sané ngeranjing sekadi toya ring segara sané tan telas-telas. Nénten wénten galah pacang bébas saking informasi sané ngalikub punika.  Informasi sané iwang lan patut abot pisan katepasin. Taler informasi tan mawiguna sakémawon sekadi toya blabar  nibénin jatmané. Mawinan sekadi kemegmegan lan tan sida nampénin. Minab yéning indayang sekadi Sang Buta huruf sinah ipun rumasa degdeg ring manah mapan informasi sekadi punika majanten nénten ngeranjing ring angga.

Sané dados pidabdab ritepengan sané mangkin wantah mapakeling ring iraga sami. Ngenénin buta huruf pastika  sampun kapidabdabin olih pamerintah. Ring desa lan kota kebaosang pastika  sampun sayan becik utawi arang wénten sané kantun buta huruf. Yéning wénten akéhan sampun mayusa lingsir pisan.

Napi mawinan buta huruf prasida katepasin. Sinah sangkanin wénten pidabdab saking nguni. Ring sejarah  kejantenang pidabdab saking Ibu kita Kartini sané prasida ngembasang pidabdab becik majeng krama istri sumangdané polih peplajahan pateh sekadi krama lanang duk dumun. Sangkaning utsaha punika awinan wénten kebaos émansifasi wanita. Panglimbak punika sané ngranayang lanang lan istri sané mangkin sampun maduwé amongan lan gegamelan sané tan banget matiosan. Lanang istri pateh hak nyané ngamolihang ajah-ajah ring sekolah lan genah tiosan.

Punika mawinan ritepengan mangkin patut kapidartayang jasa ibu Kartini antuk panglimbak ilmu pengetahuan. Puniki patut dados uratian, mapan ring pinanggal 21 April 2019 puniki wantah Hari Kartini. Bebaosan ngenénin panglimbak informasi sané kedartayang ring ajeng reriptan puniki sangkaning ajerih ring manah. Sakéwanten punika wantah pakibeh jagat sané patut kadabdabin. Pidabdab punika  antuk rasa sutindih ring ajah-ajah sane manut patut lan becik. Sané sampun kapicayang saking ibu kita Kartini. Sané sampun mautsaha ngicalang katambetan ring jagaté antuk ilmu pengetahuan. Sida raris ngametuang kewicaksanaan jatmané. Ngelantur  prasida milah tur milih informasi sané patut lan iwang. Kebaos habis gelap terbitlah terang. Ring Bali kebaos suud peteng endag galang.

Wong sané buta huruf pastika nemu pikobet sané makéhang yéning saihang ring jatmané sané sampun bébas saking buta huruf, ritatkala ngemargiang parikrama kahuripan puniki. Unteng nyané suud peteng endag galang. Galang sangkaning  ajah-ajah kewicaksanaan. Rahajeng Dina Kartini.

31/3/2019

I Déwa Gedé Trinandita
wantah makarya dados guru. Dané ngajahin ring Klungkung. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Post wiadin Pos Bali.