Puisi-puisi I Ketut Sandiyasa; Pis Toris

Sumber Gagambaran; pixabay.com

Pis Toris

Toris  liu ngaba  pipis

Ngaé nak bali nyujur manis

ngalap pipis toris

nanging tusing makejang bisa basa inggris

ulian pongahé  gigis

ngaé tetep naar uyah lengis

pis toris

tusing setata ngaé gemuh

anak digunung lan désa tileh munuh

lacuré mapunduh

lacur nak mali tuara sida nyujuh

pis toris duang keluhkuh

Dolar

ulian dolar

ngaé  égar

tindak rumasa  gangsar

nanging tanpa sadar

ada ané matilar

pasisi babar

pasisi maurug ulian dolar

abing tiding sami tan éling

ulian dolar

pacang kaalap pamuput suung

karang  suwung

pasisi béji segara makurung

cariké pacang puyung

sami pacang dadi kidung

sami pacang dadi tutur imalu dugasnu suung

Katuturan Jinah

Peteng lemah

Diguminé linggah

Ada ané kaborosin

Wantah jinah

Kanti ngéndah polah-polah

Morosinan jinah kadirasa galah telah

Nanging tawah

Jinahé telah ngulurin indria katah

Jinah kocap ngaé liang

Nanging sampunké uning wénten sané ilang

Apa di jinahé nongos liang

Yén kéto ngujang jinah katah

Nanging tuara bungah

Nanging akidik jinah

Bungah ring manah

Sapuniké katuturan jinah

Yén kamanah sampunang dados panjak jinah

Nagging jinah anggén ngaturang ayah

Pacang bekel ka gumi wayah

Duaning utang tan telah-telah.

Macet

            Kangin kauh

            Jaran jaran besi mapunduh

            Kaja kelod

            Jaran jaran besi marérod

            Mekejang ngalih selah apang elah

            Ulian galah lakar telah

           

            Keprat keprit

            Pada nyerit

            Saling cureng mangereng

            Montor saling odor

            Tusing ngidaang nglempasin

             Serat seret ngawi rered aget

                      

 Ulian Buung

            Keneh magantung

            Nanging makungkung

            semara ané puyung

            Sekadi ring don candungé

            Pangapti nemuang rasa ané makutang

            Kambang sakadi katang katang

            Ulian buung nyangkepang tresna

I Ketut Sandiyasa
embas ring Désa Ngis, Kecamatan Manggis, Karangasem, pinanggal 29 Méi 1983. Kakawianipuné kawedar ring Bali Post (Bali Orti) miwah Pos Bali (Médiaswari).