Mister So Mad
Olih: I Gusti Lanang Sutéja Naréndra
Pitung tiban né liwat, pianak tiangé luh
juang toris. Uli sukaté ngantén, tumbén ibi ia mulih ka Bali liburan, ngajak
pianakné enu raré. Mirib sambila nelokin reramané ulian ortaanga Gunung Agungé
meletus. Béh, tumbén jani tiang ngempu cucu terehan toris, bokné gading kulitné
putih nyempuah, paningalané béru. Mimiih... Sing pesan ia nurasin tiang nang
ausap.
“Grénpader!” kéto ia ma-kaki tekén tiang.
Bingung tiang nyautin raréné. Apa laut orahang? Kanggoang kenyemin dogén, laut
singal.
Enjuhin tiang jaja sangaita, méméné
nongbaang.
“Sing bisa ia nahar kakéto, Pa!”
Jemakang jaja mangkok lungsuran di puseh, masé
tungkasina tekén méméné.
“Kalingan jaja kakéto, sing ia bisa nahar.”
Mbééé... Apa koné dedarané di kedituan, sing
suba tiang nawang. Mirib buka kucit léndris tiangé, sing bisa ngamah dagdag
bali, séntrat dogén amaha. Toris mula lén dedarané, nganutang tekén kebiasaané
di gumin gelahné. Ah, baang méméné ngitungin dedarané. Tiang kendel pesan
tekain pianak cucu. Liu pesan raosné, seroméh pesaja. Kéwala tiang sing ngerti,
pragat kejengat kejengit buka bojogé ngamah lunak.
Wiréh sing ada ajaka ngorta, raréné ngidupang
tivi. Béh peleng saluran tivi wan ané kontaka, sedek nyiarang pak guru agamané
uli Indonésia ané tulaka uli Hongkong.
“Wu is dét, Mom?” kéto patakoné bingung.
“Dét is mister Somad,” masaut méméné sambila
ngorta ajak kurenan tiangé ané sedek nyait cempér.
“Oh, Mister So Mad. Maé ticer sais, bikérepul
wit de Mad Mén,” ngerenggeng raréné pedidina.
Apa kadén tuturanga, tiang sing resep. Apang tusing
tiang takonina, milu tiang mapi mapi nuléngék tiviné mabalih pak somad koné tundunga.
Aiiiih... Pedalem. (*)
No comments