Engsap
Olih: I W. Wikana-Seraya
 |
| Gegambaran Olih Supartika |
Guminé jani mula suba
malénan. Makejang suba magentos. Ipidan tiang menék bukit tuun pangkung lakar ngalih
pondok, disubané teka uli masuk. Ané jani tuah negakin onda, kema mai suba teked di genah ané lakar alih.
Ané ipidan bukité
katandurin kayu, nanging jani bukité katandurin beton. Ané pidan tegalé
katandurin jagung, sarwa umbi-umbian, ané jani katandurin besi. Ané pidan cariké katandurin
padi. Ané jani katandurin semén. Ané pidan sisin pasihé majajar jukung bendégané madéret. Ané jani
suba magentos umah beton majajar. Tuah hotél
lan villa, ané ngentosin
genahé ento. Uli kangin kantos kauh, lan uli kelod kantos kaja, makejang madérét
hotél tekén villa.
Meh.., jeg bingung tiang
bengong negak di ampik umahé. Inget tiang dugasé ipidan negak paliaté joh, duur
segarané tusing ada ngalangin. Kenehé milu joh ngulayang tegeh ka duur ambarané.
Yén jani ané tepuk tiang tuah umah matingkat. Tusing buin sida kenehé tegeh
makeber ka ambarané. Sawiréh suba kaalangin umah, tur tusing buin ada angin ané
ngeberang déwéké nuju ambara.
Ipidan brayané semeng
teked sanja, saling kaukin di malun umahé. Patakoné sing ja elén tuah, suba
ngudiang né? Suba lebeng sélané? Suba lebeng nasiné? Nanging, ané jani pisagané
liwat suba pada ngaba mobil méwah makaca selem. Tusing buin saling kaukin cara
ipidan. Ané jani tuah mobilné ané makaukan. Boya ja matakon enu ngudiang? Suba
lebeng sélané? Suba lebeng nasiné? Patakoné tusing sida baan nyautin.
“Tinn....!! Prongg...!! Om
télolét om...!!”. tusing ngerti baan nyautin, aban-abané I Madé Lecir pisaga
dajan umahé.
I Madé Lecir jani magaé
di genah jukung bendégané ipidan. Di genahé ento
I Madé Lecir ngalih pangupajiwa. Sabilang wai, I Made Lecir luas kagenahé ento.
Magediné satondén endag ai,
tur mulihné suba engseb ai. Kanti karasa kangen keneh tiangé apang sida matepuk
ajak Madé Lecir.
Inget dugasé enu cenik,
sabilang wai saling alihin. Sabilang wai saling uberin maplalian
montor-montoran. Saling alihin rikala maplalian makelid-kelidan. Tatkala sanja
nyaluk sandikala, inget tiang majanji ajak I Madé Lecir lakar ngaturang canang
miwah segehan, di pateluan dangin
umahé.
Apabuin tatkala rainan
purnama miwah tilem, sasai tiang saling antosang di malun umahé lakar nangkil
ngaturang bakti ka pura désa. Salantang jalan nuju purané iraga masatua saling
kedékin.
“Yan...to nguda Wayan
bengong?” I mémé
teka makaukan di sampingé, nundun tiang tatkala ngingetang unduké pidan.
“Wah mémé.. sing mé. Tiang cuman
marasa kangen tur inget tekén paundukané pidan, dugas enu cenik. Dini di malun
umahé tiang maplalian ajak I Madé Lecir. Kadirasa cara manyama tugelan, déwék tiangé
ngajak I Madé Lecir. Mirib mémé enu inget ajak unduké ento?”
“Enu Yan. Mémé tusing
ja lakar nyidaang ngengsapang unduké ento Yan. Sabilang wai Madé Lecir teka
mai, nelokin Wayan nelokin mémé.
Nasiné a piring
kadirasa edum Wayan ajak dadua,”
kéto mémé nuturang unduké pidan. Minab patuh mémé ada rasa kangen ajak Madé
Lecir.
“Yén tiang jeg inget
pesan ajak unduké ento mé. Miribang Madé
Lecir ané suba engsap tekén pajalané imalu,” bengong tiang ngarasaang sedih.
“Yén orahang engsap,
miribang tusing Yan.
Soalné ané
jani Madé Lecir tungkulan sibuk ngalih gagaén. Tur dingeh-dingeh mémé, jani Madé Lecirsuba angkata
dadi ménéjer koné di tongosné
magaé.”
“Méh seken to mé?”
tiang buin nyekenang ortan méméné.
“Ituni pas mémé ka
peken, ditu tuni mémé nepukin, méméné Madé Lecir. Ditu méméné Madé Lecir ngorahang
pianakné mara angkata dadi ménéjer.
Ento makada Madé
Lecir magaéné kanti kapeteng,”
kéto mémé nyaritaang paundukané di peken ngajak méméné Madé Lecir.
“Méh...! Sayan engsap
ya lakaran Madé Lecir ngajak timpal,”
sarasa sumangsaya keneh tiangé mireng ortané mémé.
“Nak mula kéweh Yan. Apa buin Madé Lecir
tuah magaé ngajak anak uli
dauh tukad.”
“Anak dauh tukad kénkén
maksud méméné?” makesyab
keneh tiangé ningeh ané orahanga tekén mémé.
“Genah ané tongosina
magaé ento nak tuah uli dura negara
ané ngelahang Yan”
“Aahhh...??!” Buin tiang sayan
tengkejut ningeh ortan méméné. “Koné ipidan anak uli panegaran iraga ané nginvéstasi dini mé?” tiang nglanturang
matakon ajak mémé
“Dingeh mémé ento tuah atas nama dogén yan. Ento tuah apang
nyidaang meli tur mangunang hotél
dini di gumin iragané. Ané ngelahang tetep anak uli dauh tukad Yan”
Bengong tiang kamemegan
mirengang ortan méméné. Dikenehé jeg sayan bingung tur sayan jejeh. Yén
makejang anak uli dauh tukad lakar malaksana kéto, sinah sakabedik tanahé lakar
gelah anak uli joh. Apabuin ajin pipis dolaré joh masanding ajak ajin pipis
rupiahé. Mirib tusing tanahé ané di sisin pasihé dogén telah maadep. Bisa kanti
tanah ané dadi tegak purané di bukité lakar ulaha tekén anaké uli dauh tukad. Dija
lakar panak cucuné magenah kapungkuran?
“Yan..., suud naé malu
Wayan bengong. Guminé suba sayan sanja. Masiram malu, laut mabanten,” i
mémé raris majalan ka paon.
Tusing telas baan tiang
ngingetang unduk ané sambatanga ajak mémé. Buin lakar sambungang tiang unduk ané
kenehang tiang tuni. Mara lakar majalan makeneh, sagétan buin bangunanga. Ané
mangunang boya ja i
mémé buin. Nanging ané teka dimalun tiangé tuah PanTumbén . Pan Tumbén tuah dadi juru ayah di pura désané.
“Béh...nak nguda Wayan
bengong?” kéto patakoné Pan Tumbén maekin tiang ka ampik umahé.
“Éehh... Bli Tumbén? Tumbén niki
bli nekain tiang. Meriki menékan bli. Kanggoang genahé uug,” kéto tiang ngajakin Bli Tumbén
“Bli tuah ajebos Yan.., kanggoang bli uli beténan.”
“To nguda bli ajebos?
Meriki té malu negak. Masih kapah-kapah bli nekain tiang meriki.”
“Tusing Yan. Jeg kanggoang bli
ajebos. Durinan
bli malali.”
“Oh nggih bli. Yén bli
mula maénggal-énggalan. Nak kénkén sujati patekaan bliné mangkin?”
“Kéné Yan..., bli nekain Wayan,
tuah ngaba pawarah-warah.”
“Pawarah-pawarah napi
nika bli?” tiang
nyekenang.
“Dinané buin telun,
nuju rainan anggara kasih. Pura Désan
iragané lakar piodalan. Nah unduké ento, dinané mani Sekaa Truna-Truniné lakar katedunang
ngaturang ayah. Manut kelian Sekaa Truna-Truniné, dinané mani melah ngaturang
ayah, sawiréh dinané redité. Lanang istri ané enu masekolah, tur ané suba magaé sinah
lakar libur. Apang liunan ané ajak ngaturang ayah,” kéto lantang Pan Tumbén nlatarang
pawarah-warah dina nyanggra piodalané di Pura
Désa.
“Méh melah sajan dinané
mani bli. Jam kuda nika jagi katedunang?”
buin tiang matakon. Nanging tondén maan pasaut uli Pan Tumbén, sagétan teka uli
kelod mobil méwah selem. Nanging tusing ngenah anaké ané nyetir di tengah mobilé.
“Tin...tin...!!” kéto
mobilé nyapatin tiang ajak Bli Tumbén, liwat dimaluné.
“Jam kutus semeng Yan,” kéto bli Tumbén
nyautin tiang sambilanga milu baongné majalan nuutin pajalan mobilé
uli kelod kanti kaja.
“Sira ja to Yan?”
“Oh ento...? Ento I Madé
Lecir bli.”
“Mih Madé Lecir ento? Madé
Lecir pianakné Mén Rai to?”
“Nggih... Madé Lecir pianakné Mén
Rai suba bli.”
“Mééhhh.. subasuksés jani ia? Ccekkk... ccekkk,” sambil kitak-kituk baongné bli Tumbén.
“Nah mun to malu Yan
nggih. Bli lakar mrika malu ngalih Madé Lecir,” lantas Pan Tumbén ngojog maekin mobilné
Madé Lecir.
“Nah astungkara ja,
dinané mani Madé Lecir nyidaang bareng ngayah. Apang nyidang tiang matepuk
ajak MadéLecir”
Dinané suba maganti. Galahé
suba nuju setengah kutus semeng. Sekaa truna
lan truniné suba pasliwer di malun umahé. Tiang masih suba sayaga lakar
majalan.
Ané jani tiang suba
teked di pura. Ditu sekaa truna-truniné suba pada makumpul. Ada ané negak-negak
sinambi masatua. Ada masih ané suba ngamalunin nyemak gaginan ayahané. Nanging,
Madé Lecir masih tusing ja ngenah ditu.
Ané jani sami sekaa
truna-truniné nyemak gagaén ayah-ayahané. Ada ané ngarya pénjor, ada ané masang
wastra palinggihé, tur ada ané nyampat luuné. Sami anteng magarapan. Ngawinang
tusing ja makelo, ayahané puput. Tur ané jani panyarikan sekaa truna-truniné
lakar nyarca sekaa truna-truniné ané rauh ngayah, miwah ten rauh.
“Wayan Wika...!!”
“Tedun,” kéto tiang masaut
“Madé Lecir..!!”
“Ampura bli, Madé Lecir
ten mrasidaang tedun. Saantukan ipun kantun makarya. Niki ipun ngaturang punia
anggéna ngayah,”
kéto misané Madé Lecir, nyambatang pabesené Madé Lecir.
“Méh.. aéng soléhné. Kuting
ngayah ané jani suba pipis maanggo. Jeg engsap tekén ayah-ayahan mabraya,” kéto dikeneh tiangé ngrémon.
Becat majalan, ané jani
suba teka dina anggara kasih. Suryané ngendih. Tur anginé ngasirsir alus. Di Pura Désané suba mabriuk
kapireng tatabuhan gambelané. Kidungé masautan satia ngiringang pamargin piodalané.
“Mirib ané jani, tiang
lakar matepuk ajak Madé Lecir. Tusing ja mungkin Madé Lecir kanti ten rauh nangkil ngaturang bakti,” arepan tiangé apanga nyidaang matepuk ajak Madé Lecir.
Ané jani tiang suba suud
nyaluk panganggo sarwa putih tur bersih. Majalan lantas tiang ka pura. Pemedek
sané lakar ngaturang bakti, sampun kosek pisan. Ditu tiang nolih méméné Madé
Lecir, ané sampun malinggih. Lantas tiaang maakin, tur negak di sampingné.
“Mé.., sampun ituni?” kéto
tiang matakon
“Yé...Wayan. Meriki Yan, driki negak ajak mémé”
“Nggih mé,” tolah-tolih tiang
ngalihin Madé Lecir. “Mé nguda Madé ten ada
ngenah?”
“Méh... Madé ten nyidaang
bareng nangkil Yan.
Magaé di Hotél jeg kéweh sajan ngalih liburné. Apa buin magaé ngajak anak uli
dura Negara yan. Time is money apa
adané to sambatanga sabilang wai ajak Madé kala lakar majalan magaé Yan. Buina ané jani Madé
lakar lembur kanti mani koné Yan”
“Méh kanti kakéto??
Tusing ja iraga dogén artiné ané engsapanga tekén Madé Lecir. Kanti kayang Ida
Betara tusing karunguang ulian gagaéné. Mééhh....!!” keneh tiangé ngrémon.
Guru basa Bali ring SMKN 1 Amlapura. Kakawiannyané naanin kawedar ring Bali Orti (Pos Bali), Jurnal Suara Saking Bali, miwah Médiaswari (Pos Bali).
.jpeg)
No comments