Puisi-Puisi Tudékamatra; Nyénké ané Ngelah Pelihé?

Nyénké ané Ngelah Pelihé?

:kapining Luh Gedé Rina Puspitasari

Tusing taén tiang makeneh satondéné ené

Tusing taén tiang makeneh buka kéné

Apa ané rasayang jani

buka sing bisa buin ngelidin

Apaké pelih i raga?

Apaké pelih tiangé?

Apaké pelih i luhé?

Nguda i raga matemu dugasé ento?

Apaké ané ngaba pejalané kema?

Miribké Sang Kala?

Miribké Hyang Jagatnata?

Miribké Sanghyang Semara?

Sing pesan taén kakeneh baan tiang

Mirib i luh masih patuh

Matemu i raga ditu :

Macapatan, sing ja makeloan

tekén anaké matawahan di peken

Akesep!

Ngorta tuah buka anaké matakon di jalan

Akesep!

Nanging akesep ento sing ja dadi akesep

ané nyidaang baan tiang ngengsapang

Nguda kanti kayang jani

nu bakat ingetang?

Nguda kanti kayang jani

nu bakat rasayang?

Nyénké ané ngelah pelihé?

Tiang apa i luh?

Lepég Ulian Tresna

Sajaké tresna patut ngelah liu pinget?

Koné, a tebih gulem nyidaang ngulungin ujan

Kangen mentik di ati nglekadang ipian

Ajak dadua ditu memanying-manyingan

Yén nu marasa padidi, tolihin kuusan ujané

Dalem keneh ujané sing tawang bongkolné

Langit masaut “Yén bas dalem bisa ngeling”

Liep – liep gulem nglekadang bales ujan

“Tusingké tresna kapining déwék tiang?”

Sing ngantos pasaut, ujan tuah mragatang pejalan

Tiang dot pesan nresnain buka ujané ento

Gribis-gribis ujan ngulungang pasaut “Eda!”

Ujan tuah ling langit, tetep belus ri kala kebus

Ri kala ujané marérén, apa sujati antosang?

Boya belus padang, boya belig lumut natahé

Masih boya beseg tanah enduté ané antosang

Dini, awak tiangé ngejer ngetor padidi

Di tengah, atin tiangé lepég ulian tresna!