Nyoman Rai Srimben, Méméné “Bapak Bangsa”
 |
| Soekarno riakala Sungkem teken Nyoman Rai Srimben |
Dugasé totonan, sekitaran warsa 1881, tiang sing
nawang apaké langité galang, gulem, utawi ujan bales. Tiang masi sing nawang
apaké semengan, tengai, sanja, utawi peteng rikala anak luh ané madan Nyoman
Rai Srimben lekad. Lekad uli anak makurenan madan I Nyoman Pasek ané dadi
pemangku di Pura Balé Agung lan Ni Madé Liran tuah tukang banten. Nyoman Rai
Srimben lekad di tanah palekadané ané madan Banjar Baléagung, Kelurahan Pakét
Agung, Buléléng, Bali. Ia ngelah nyama muani (beli) ané madan I Madé Pasek.
Rai Srimben lekad uli keluarga ané broken home, ulian bapané buin ngantén
ngajak anak luh ané madan Ni Sukenyéri. Yén alih uli lelintihan, sebenehné Ni
Sukenyéri ngajak Ni Madé Liran nu ada hubungan keluarga, krana ditu anaké ané
ngantén tuah ngajak anak ané paak-paak ditu dogén. Krana tusing nyak maduanga,
Ni Madé Liran ngambul ka umahné bajang ané tusing ja joh uli umah kurenané.
Uli satua ané kapercaya kanti jani, Nyoman Rai
Srimben ngoyong ngajak bapané kanti matuwuh limang tiban. Sisané, kanti ngantén
ngajak Radén Soékemi, Nyoman Rai Srimben kapiara olih Ni Ketut Nésa.
Idadané nawang? Nyoman Rai Srimben tusing taén negak
di bangku sekolah. Ia tusing taén masuk TK, SD, SMP, SMA, apabuin kanti kuliah
cara janiné. Ia tuah milu sekaa truni dogén. Ditu ia liu melajahang déwék lan najak
timpalné lakar ngigel rejang rikala ada odalan di Pura Balé Agung. Tusing ja
duweg ngigel rejang dogén, Rai Srimben masi duweg nenun kain songkét lan endek.
Ah, nasib mula sing dadi kelidin. Warsa 1887-an,
Nyoman Rai Srimben matemu ngajak anak muani—Radén Soékemi Sosrodiharjo, ané
dugasé totonan maan tugas di Sekolah Rakyat (SR) 1 Singaraja, lan jani madan
SDN 1 Pakét Agung. Anak muani totonan uli Jawa, teka ka Bali uli Surabaya mara
dua bulané.
Krana pada-pada demen, Nyoman Rai Srimben ngajak Radén
Soékemi lantas ngantén, sakéwala tusing morahan tekén reramané—kawin lari.
Ulian unduké totonan, kulawargané ané ada di Balé Agung gedeg, lan ngaénang Radén
Soékemi ketuntut di pengadilan rikala Hindia Belandané nu ngigel di Indonésia.
Soékemi kadendain 40 ringgit, krana ngantén tusing maan persetujuan.
Makelo-kelo, kulawargané di Balé Agung nyansan sadar
lan nyak nerima unduké totonan. Kanti, disubané lekad pianakné ané kapertama, Soékarmini,
lan mirib tulis gidatné ané luung pesan, tanggal 6 Juni 1901 buin lekad pianakné
ané nomer dua, madan Kusno ané meganti adan dadi Soékarno. Kanti jani Soékarno
kakenal dadi Bapak Proklamator lan Bapak Pendiri Bangsa.
Nyoman Rai Srimben, ngalain dina Sukra Kliwon, 12 Séptémber 1958. Dadi warga Bali, i raga patut lega, demen, lan bangga, krana yén sing ada Nyoman Rai Srimben, tusing lakar ada anak ané madan Soékarno. Idadané harus percaya tekén unduké totonan. (kabasabaliang olih I Putu Supartika)
Nyoman Rai Srimben, ngalain dina Sukra Kliwon, 12 Séptémber 1958. Dadi warga Bali, i raga patut lega, demen, lan bangga, krana yén sing ada Nyoman Rai Srimben, tusing lakar ada anak ané madan Soékarno. Idadané harus percaya tekén unduké totonan. (kabasabaliang olih I Putu Supartika)
Réferensi:
.jpeg)
No comments