Jupé
Olih:
I Gusti Lanang Sutéja Naréndra
Sanja mabalih tivi. Ada berita
unduk artis I Jupé mati. Béh, kurenan tiangé jeg sedih kingking. Pedalema koné,
wiréh ia demen pesan tekén artisé ento.
"Béh, liwatan Nyai. Eda ja bes
sanget, kanti sigsigan kéto!" Tuturin tiang masé ia akepitan, apang sing
ja bes lebay, buka tutur bajang trunané jani.
"Aduh, icang nak demen pesan
ngajak I Jupé"
"Nah, Bli ngerti. Bli nak
demen masé!"
"Ah, tawang Icang Bli tuah
demen nolih nyonyo lan gémpol jitné!"
Badah...jeg corokina tiang. Ah,
endepang suba déwéké, yén ngaku jeg bisa bangka mapingseg!
"Nak kénkén matiné I Jupé
Bli?" Matakon I Luh sambil ngusap yéh mata, tengas tengés ngéngésné
ganting.
"Nak kanker sérvik koné"
"Mbéé...kanker apa ento?
Kanker modél baru ento?" Tuléngéka matan tiangé, jeek pesaja.
"Ento kanker ané di
kakétoné!" Sautin tiang sambil nujuhang bongkol siksikané.
I Luh gideg gideg, klemah klemih,
tolah toliha kakétoné.
"Anak ané kénkén bisa kena
Bli?" Kéto patakoné sambila enu nolah nolih pagelahané ané pingit.
"Makejang bisa kena, sing
pandang bulu. Nyak kriting, nyak sohsoh, nyak inggel, ganti kena ya kena!"
Mbéé...I Luh sayan jeek,
paningalané nengéng nagih makeplos. Sagét, ia kisik kisik ngelés tali celana
kolorné.
"Icang jejeh kena Bli.
Tegarang peréksa,nah!"
"Adaaah... Nyai jeg sing
nawang sikut. Dini nagih ngédéngang kakéto? Ento I Wayan enu nengéng. Buina,
taén tawang Nyai Bli masekolah di kedokteran, kénkén? Wééé... Luh, unduk ané
kéto dokter ané nawang. Yén Bli meréksa, makejang bakat gadab!"
I Luh majadengan. Buin ia negak
nyampingin tiang.
"Atehang Icang mapréksa nah,
Bli!" Boé... asal suba ada tagiha, prajani bisa manying gatiné. Misi
maselédoh, kakir kakir Nyai!
"Nah, mani ajaka mapréksa! pap
smear adané"
Sagét munju bibihné I Luh, kadéna
tiang jail. "Aiiih...éwér! Masak ento semirin!"
"Pameréksaané unduk kakéto
madan Pap Smear Luuuh. Boya masemir!" kéto bibih tiangé makucas kacisan
nyambat ma inggrisan.
I Luh mendep, buka makeneh keneh.
"Tingkanganga maréksa, Bli?
Mbéé... dong tuléngéka gelah icangé? Aruuuh..." Kéto makeplos munyiné,
soléh pesan ngaé basang gerimutan.
"Yén meréksa bibih, patut
enggang. Meréksa song jit, patut nungging. Meréksa kakéto patut ningkang. Yén
cikupang Nyai, bisa KALPANAX Nyai resépanga teken dokteré, ulian bulénan kebo
di paha Nyainé joblég joblég!" Kéto saut tiangé sigug. Ngilngil basangé!
I Luh berangti, sahasa jeg nyuled
paha. Aduuuh... kanti ngatijang tiang. Léngkongé!
"Yén kéto, eda ka rumah sakit
mapréksa. Ramé ditu dokter lan perawaté muani muani. Bilang aukud teka
ngungkabang. Lek icang! Ka spesialis laku nah!"
Mbéé... madeepan tiang mireng
tagihané. Bes ka spesialis belingan, dija jani selukang pis? Ah, bes kurenan
sayang. Jeg nyakang dogénan.
Silihang tiang pipis ajuta di LPD,
enu kekeh makacip mebo brankas suba serahin tiang ia.
Dinané mapréksa teka. Semengan
neruput tiang suba maséh, malengis keprés. Ada nang duang jam antiang I Luh,
sing pragat pragat maséh. Suba pesu uli kamaré, booéé... jeg maséh ia buka
penyanyi dangduté! Das makeplos matan tiangé nolih. Tondén ilang kesiaban bayuné,
sagét I Luh ngeraos manying.
"Nyak Icang cara I Jupé,
Bli?"
"Nyak! Numadi I Jupé sik
Nyainé!"
"Iiisssh... Bli gombal!"
Kéto raosné sada nyolék jagut. "Bin jep bayahin icang di dokter nah!"
Mbéé...das serangan jantung tiang
mireng raosé ento.
"To...suba serahin pis ajuta.
Kija maba?"
"Suba bayahang icang bajuné
ené sik Mbak Éndangé. Nyak jegég cara Jupé kan, Bli?"
Mbééé... gantina jani kucit lan
godélé sita LPD! Peluh tiangé pakritis, kilen kilen tiang magelekan buka nguluh
batun kedongdong! Celekotokan Nyaaaiiiiii......
.jpeg)
No comments