Puisi-Puisi I Putu Wahya Santosa; Patapan lacur

 

Gagambaran Olih Nur Ilham

Patapan lacur

Titiang tuah i dusun

Ané ngetohin babonggan

Punyan kayunné elung

Tuara ja payu mabuah apa

Sejaba ada kenyir ligir

Lan kampuh rasa ané byahpara

Puyung glayung glayung

Duh, dijaké titiang purun

Mapunia kenyung

Yéning wantah nénten wénten sané tandruh

Masawitra ring satua déwék titiang sané puruh

Sinah pamuputné yasan titiang pacang masangkur puuh

2016

Satua Cutet

Lawat kénéhé mapapindayan

Sakadi pajalan angin

Ané akijapan nglekadang satua

Katindakang baan solah i kruna

Ané sumusup dadi basa rasa

Disubané cutet pragat

Adaké ané masisa?

Sejaba puyung

2016

Ada Kruna Ané Tan Sida Masamadana

Ngridip dini krunané ulung di tangkah beli

Rikala tuara sida nyambat

Ada kénéh ané nadaksara bungah makedapan

Nalekep di paningalan adiné

Mirib di duri engkagan batu batu andus gunung baturé

Ia mengkeb nyilibang raga

Kanti ngaliwat makudang-kudang sasih

Lan sué gatra i raga matilar

Krana galahé suba ngalih pajalan padidi

Kanti jani tuah enu sisan-sisan kritisan ujané di natahé

Anggon beli nitipang rasa ané kadirasa nugtug lawat adiné ngumbara

Dini beli tuah marasa suwung

Disubané kruna karmané tuara sida buin makunyit di alas

2016 

I Putu Wahya Santosa
alumnus Jurusan Pendidikan Bahasa Bali sering nyurat puisi Bali modérn lan ésai basa Bali sasuratané sampun kawedar ring Bali Orti lan Médiaswari.