Puisi-Puisi I Nyoman Buda Arimbawa

Gagambaran Olih I Nyoman Buda Arimbawa

Laraning Tembang Smara (I)

Ring acarik pangapti

Sané makepur ampehang angin

Bli manyantosang…

Sianambi nyukat lawat

Tur nerawang sayan samar

Ring ajeng laraning tembang smara

Ngiring lalampahan Babah Sampik

Adi…

Ring ajér kenyung legawa

Nyilib apetik rasa sané tan sida kawacén

Sané setata malawat ring manah

Sané setata ngumbara ring angen

Sané setata mangusik ring prana

Napiké galah pacang nelatarang?

Napiké sabeh jagi nguningang?

Napiké sayong lédang ngélingang?

Bli kantun ngulati…

Dumogi bénjang semeng

Adi ten nyakit ati…

Kubutambahan,

Redité Pon Dukut, 8 Januari 2017

Laraning Tembang Smara (II)

Duk sunaran matanai makenyah di selagan intaran

Crukcuk manguci saling sautin

Ngawitin lelampahan ri kala semeng

Kantunké Adi matedung satya?

Apang melah Bli majalan…

Dijaké pangaptiné ulung?

Pajalan angin ten sida katon Bli…

Siraké sané olas nujuhin?

Munyin I Kerkuak ten sida piragin Bli… 

Adi…

Bli kantun manyantosang

Diastu wengi ten nyobiahang

Diastu bulan ten ngawi égar

Lascarya Bli iriki…

Ring ajeng laraning tembang smara

Adi…

Ring galah Adi jagi mamargi

Diolas élingang rereh pangaptiné

Diastu ten manut ring angen Adi

Yéning sampun Adi uning sané sujati

Bli nyadia manindihin…

Bli ten puput ngulati…

Dumogi ri kala sandikala

Adi ten nyakit ati…

  

 Kubutambahan,

Soma Wagé Dukut, 9 Januari 2017

I Nyoman Buda Arimbawa
Embas ring Selat Peken, Susut-Bangli, 21 Oktober 1998. Sané mangkin kantun masekolah ring SMA Bali Mandara.