Dénpasar 2013

Olih: I Gusti Putu Bawa Samar Gantang

Sumber Gagambaran

Warsa anyar langité ngalgal

Santukan alasé balbal Tukad telabahé belbelan Jlinjinganné sampetan Lulu ngambet bet sebet Aad aud luluh

Aas nyauh kreteg

Aang iing tiing ligir

Makejang sanglir makejang sengir

Carik rikrik tegalan liglig

Kulak kulik kulak kulik kélangan umah Kakelik sesambat ngeling ngukir langit Jelun iaké ngelimbak

Iwaké sengal-sengal Makejang saplar amah dollar Tan ngelah telajakan jalan Tan ngelah telajakan tukad

Pariwisatané mamata bhuta kala

Idup kaé mati iba

Ajak nyama macongkrah  warisan Ajak wong neka néka-néka Dénpasar 2013 sayan ngeraméang Bromocorah ngangsan ngeliunang Léak lemah sundel tanah makalé Kafé, bungalow, homestay, vila lué Dadi sebun HIV/AIDS

Grapa grépé ngejotan bangké

Sang kuasa wawa wéwé

Sang pangutsaha ha ha hé hé

Dénpasar 2013 sarat invéstor! Kepongor!

Dénpasar 2013 gorgor bikul gondong! Dija lemahé tan pamatanai

Dija petengé tan pangipi

Dija regajiné tan pagigi

Dija langité endep ditu bhutakalané kedék

Ingetan madéwa di pura, maratu di puri, mabui di tangsi

Ingetan ya bhuta ya Déwa ya Rwa Bhinéda

Ingetan onyo lakar mati

Ingetan ngrestiti Ida Sang Hyang Widhi Wasa

Apang makejang sidha sadhu santhi santha

Tabanan, Buda, 9 Januari 2013