Sekar Gadung

Olih: Jatiyasa

 

Sumber Gagambaran

Kajampi i tambulilingan

Ngambu i sekar gadungé kembang

I Kekupu pangkah nyasab ngencegin

Ngamaling kaluihannyané i sekar

I Tambulilingan namprak ngepungin

I Kekupu makeber ngejohang

Katangehan nyuang bebuktian

Sekaré maplisahan layu dudus

Telas kaisep sarinnyané sami

Klopékan bunganné pakrétés ulung

Kakeburang angin sasihé

Enu ia katikné ngaceceng

Ngantiang tuh ulian panedeng panesé

Kisut gading lingker puer

Kagentosin baan sekar anyar

Kusuh seger oger ngantiang kembang

Ngantiang masanné miik ngalub

Ngantiang i tambulilingané kadaut

Baan warninnyané ngelangenin

Baan manis sarinnyané muduhin

Sekar gadung...

Tan naenin sepi katekain

Tan naenin suud karasanin

Baan kahayonnyané sujati

Tumingal, 8 Novémber 2016