Ngenteg Linggih

Olih: Raka Suari

"Temple Festival" Gagambaran I Gusti Ketut Kobot

Semengan suba pakruing munyin hand phoné Komang Pada. Ia mara suud manjus, nu nyaluk baju, lakar mabecat-becatan ngajahin. Dinané jani ada tugas ngajahin jam kapertama di universitas. Sing maan ia ngrunguang télpon totonan, kéwala buin telponé kruing–kruing tusing siep-siep.

“Télpon penting miriba,” kéto kenehné Komang Pada, mawanan ia ngaukin kurenanné.

“Luh tulung ja angkat télpon beliné, nyén ye nélpon semengan gati, ada penting  jenenga,” kéto ia ngorahin kurenané Luh Kalpika. Luh Kalpika macelep tur nyemak télponné. Sambilanga meséh masuah, lan nyiapin buku saha matéri ané lakar anggon ngajahin, uli pasaut kurenané tawanga nyén ané nélpon, tur unduk ané omonganga di télponé ento.

Tepukina kurenanné jebet-jebet, becat-becat nyemak kertas lan pulpén lakar nulis ané orahanga tekén anak ané nélpon totonan.  Mirib ento pabesen ané penting.

“Nggih bli, sira adan ketua sekaa kidungé nika? Kadék Sugtra, nggih, kuda nomer hand phoné-né beli? Nggih...081246551.... Nggih bli suksma, “ Luh Kalpika nutup télpon tur nyerahang télponé ka Komang Pada. Ia masih nyerahang kertas ané misi tulisan nomor télpon ento ka kurenané, kéwala Komang Pada makitukan, ngorahin kurenané ngejang catetan totonan di méjané laut majalan bakal ngajahin. Buin kejepné, Komang Pada suba macemplung di telaga ning tresnan mahasiswannyané ané seleg malajah tur jemet matakon. Marasa saja ia demen dadi dosén.

Pesu uli kelas suud ngajahin, mara Komang Pada ngidupang HP, saget suba bek ada pesen macelep. Ada SMS adasa tur ada télpon lalima uli uwanné, Rai Nata.

“Béh cara ada ané genting sajan,” kéto kenehné. Kéwala kondén pragat ia makeneh, télponné buin kruing-kruing.

“Hallo Swastiastu, kénkén Wa, tiang mara suud ngajahin, ada genting apa?” Ia matakon.

Kondén mategtegan rasané bayunné Komang Pada, Rai Nata suba mamunyi cara blabar gedé, sing pegat-pegat tur cara ngemaang printah. Tuah abedik ané nyidaang ingetanga baan Komang Pada, ané cutetné mabesen apang ia becat tangkil ka Ida Pedanda krana galahé suba cupit nyiapang karya ngenteg linggih di sanggahné.

“Uwa suba matur ring Ida Pedanda, jumah lakar makarya ngenteg linggih, Ida Pedanda ngorahin Komang apang becatang tangkil krana Ida Pedanda sibuk sajan, bek ngelah siswa, inget, becatang tangkil nah,” kéto uwanné nutup télponé. Komang Pada mendep, kenehné dangsah.

Teked jumah, ia kasambut kenyir masem Luh Kalpika kurenanné.

“Pocol tiang ngalih libur beli, sing payu tiang nyidaang mateg-tegan, ipah-ipah beliné, kurenan misan beliné konyang mai. Beli Putu Wijaya, belin beliné koné lakar nyumbang jaja anggon sekaa gambelané, Beli Madé Susila koné lakar nyumbang bé guling aukud, terus misan beliné, Beli Karta koné lakar mesuang sakancan sampian gantung. Beli Lanus nyumbang jaja, Beli Darta nyumbang minuman gelas, Beli Kodik nyumbang arak berem, Beli Kantun nyumbang canang, Beli Lasia nyumbang pasucian, Beli Mideh nyumbang dupa, né ada masih catetan sekaa arja, sekaa wayang, sekaa kidung, lan ané lénan beli, konyangan suba ada dini,” kéto Luh Kalpika nyerahang telung lembar kertas catetan misi tulisan sambil masebeng jengis.

Suba iyur satuané, kayang odalan, nuju Purnama Kadasa ané lakar teka, di sanggahné Komang Pada lakar makarya ngenteg linggih. Lakar ada arja, topéng, wayang, lan ané lénan. Saja sanggah totonan sanggah gelah anak ajak liu. Komang Pada dogén manyama muani ajak tatelu, ada Wayan Wijaya, Madé Susila, lan adin-adinné Luh Selasih, Luh Sukerni, lan Luh Sekarini, yadiastun suba ngantén tetep nulungin ngodalan di umah bajangné. Ada buin misan-misan lan mindon-mondonné. Kéwala konyangan nengil di sisi, tuah Komang Pada lan kurenanné ané nengil jumah, ngrunguang rerama lan mayasa di sanggah. Dadinné yén ngodalin, Komang Pada ané mokokin ngodalin, ané lénan tuah matulung dogén.

Jani dipiodalané ené makejang marencana bakal makarya ngenteg linggih di sanggahé totonan. Makejang ngaku bakal nyumbang kéné, bakal nyumbang kéto. Ada ngorahang nyumbang jaja, bé guling, minuman, bebantenan, sampian, ajeng-ajengan lénan, kayang lakar basa suba ada ané ngorahang bakal nyumbang. Satondéné karya ento kamargiang, Komang Pada, misan-misanné, mindonné, lan panyamanné ané nengil joh pada mapupul bakal ngraosang karya ngenteg linggih ané bakal kalaksanayang.

Petengé ento, kapimpin olih uwanné, Rai Nata, belinné, misan-misan, mindon-mindon, lan ipah-ipahné cara majanji, teka sibarengan mabaju adat ngajakin Komang Pada lan Luh Kalpika rapat ngomongang karya ngenteg linggih di sanggahné ané bakal kemargiang di piodalan Purnama Kadasané.

“Uwa suba nunasang ring Ida Pedanda, Ida ngandika di sanggah mula harus ngenteg linggih, krana suba makelo tusing taén ngenteg linggih,” kéto Uwa Nata nyumunin mamunyi. Luh Kalpika nolih Komang Pada kurenanné, Komang Pada manggutan.

“Inggih suksma sampun mriki uwa, beli-beli, lan mbok, tiang uning Ida Pedanda sampun wikan turin prasida pacang ngawikanin indik pitakén sisyannyané. Yéning iraga tangkil nakénang indik antes néntennyané makarya ngenteg linggih, pastika Ida pacang nganikayang patut tur antes, sakéwanten yén tiang raris matakon yéning ngenteg linggih nénten madué prabéa, sapunapi minab panyawis Idané? Saja tiang lan somah tiangé magaé dadi dosén ajak dadua, kéwala tiang sing ja sing kuangan pipis, tiang nak sesai masih kuangan, kéwala biasa tiang nyaruang ngaba. Yén linggih di kasarné cara nak negak, kondén sajan tetegakan tiangé enteg, apabuin yén ukur nganggon pipis, man tetegakan tiangé sing tegteg, maan pipis tingé sing tegteg, kénkén tiang nyidaang ngenteg linggih? Man uwa, beli-beli, lan embok marasa suba enteg pipisé, jalanang suba karyané, nak saja luung to, né masih sanggah gelah ajak liu, nak bakti majeng Ida Bhatara utama sajan ento, nyanan tiang ja nulungin bantes nyumbang lamak sampian!” Kéto Komang Pada ngraos dabdab.

Suud Komang Pada mamunyi buka kéto, makejang tusing ada ané bani masaut. Tusing ada ané bani mamunyi. Prajani mamegeng cara togog. Ané paling simalunin ngorahang nyumbang bé siap, nyumbang bé guling, nyumbang jaja, nyumbang kopi, nyumbang sampian, bebantenan, nyumbang balih-balihan minakadi arja, wayang, bondrés, tari-tarian kanti ané ngorahang bakal nyumbang dupa, canang, lan lakar basa tusing ada ané bani masaut. Ané teka makejang masebeng layu. Pamuputné, sing ada ané nyidang enteg negak. Konyang macuet, tuah Komang Pada lan Luh Kalpika ané nu negak ditu, enteg, tegteg.

NB: Satua cutet kakawian Raka Suari sané mamurda “Ngenteg Linggih” puniki naanin kamuat ring rubrik Bali Orti  (Bali Post) rahina Redité Wagé, 20 Maret 2016