Pustaka Ékspresi

Logo Pustaka Ekspresi

Pustaka Ékspresi wantah silih sinunggil penerbitan sané wénten ring Bali lan magenah ring Tabanan. Genah sujatiné wantah ring Jalan Diwang Dangin No. 54, Banjar Lodalang, Désa Kukuh, Kecamatan Marga Tabanan. Penerbitan puniki kakelola olih wartawan miwah pangawi sastra Bali modéren Madé Sugianto.

Pustaka Ékspresi puniki embas warsa 2007 lan ngamedalang Majalah Ékspresi sané kaluncurang tanggal 3 Novémber 2007. Peluncuran punika kalaksanaang rikala acara Anugrah Band ring lapangan Désa Kukuh, Kecamatan Kerambitan Tabanan lan acara punika taler kameriahang olih bintang tamu Nanoé Biroé. Majalah Ékspresi punika madaging gatra ngenénin indik pendidikan lan sastra mabasa Bali wiadin mabasa Indonésia. Yadiastun akéh sané seneng ngwacén, nanging majalah puniki terbit ngantos Désémber 2014, sangkaning sané nuénang (Madé Sugianto) kajudi dados rédaktur NusaBali ngawit 1 Januari 2015.

Warsa 2009 Pustaka Ékspresi ngamedalang cakepan sané kapertama mamurda “Jangkrik Maénci” pupulan satua cutet kakawian IGP Bawa Samar Gantang, pangawi sénior saking Tabanan. Sausan punika, Pustaka Ékspresi tetep konsistén ngamedalang cakepan saking pangawi Bali, napiké marupa cakepan mabasa Bali wiadin mabasa Indonésia.

Ngantos mangkin, akéh cakepan mabasa Bali sané sampun embas saking Pustaka Ékspresi, napiké marupa puisi, satua cutet, wiadin novél mabasa Bali. Saking penerbit puniki taler embas pangawi-pengawi anom sané pacang dados penerus sastra Bali modéren sakadi Wayan Paing, Putra Ariawan, Tudékamatra, Madé Suar-Timuhun, AlitJuliartha, miwah sané lianan.

Kantos mangkin, penerbitan puniki kantun konsistén ngamedalang cakepan mabasa Bali lan ngwantu pangawi sastra Bali modéren rikala pacang ngamedalang kakawiannyané manados cakepan, sajabaning penerbitan puniki taler ngamedalang cakepan mabasa Indonésia. Sangkaning embasnyané penerbitan Pustaka Ékspresi, sastra Bali modéren kantun prasida maurip lan nglimbak kantos mangkin, yadiastun pangwacén sastra Bali modéren sida kaketékin antuk jrijin lima. (*)