Surupa

Olih: I Nyoman Agus Sudipta

Sumber Gagambaran

Jelé goba jelé ati

Makejang jelék di awak pedidi

Tusing nyén ada luungné gigis

Apa buin mantas makenyem manis

Luungan suba jelé goba

Nanging atiné luung ngaé lega

Makejang demen setata liang

Liu anak tresna ngorahang sayang

Jelé goba dadi payasin

Jelé ati tusing dadi kelésin

Mulat sarira tusing maguna

Ulian engsap dadi sengsara

Ajum ulian goba ento biasa

Ulian jelé ati dadi surupa

Sinah lakar nemuang duka lara

Sawiréh goba tusing utama

NB: Puisi kakawian I Nyoman Agus Sudipta puniki naanin kamuat ring rubrik Médiaswari (Pos Bali) rahina Redité Kliwon, 10 April 2016