Karma Phala

Olih: I Putu Supartika

Gagambaran olih Anak Agung Gde Rai Konta

IRIKI RING DÉSA BANGBUNG, SAMPUN SAKING SUWÉ  WARGA DÉSANÉ NÉNTEN NGASANIN SANÉ MAWASTA BAGIA, SABILANG WAI IPUN BENGONG NYONGONG TAN MADUWÉ GAIRAH IDUP, SAMIAN MASEMU BERU.

SABILANG PETENG ANAK ALIT NYERIT SEDUK TAN NAANIN NGAJENG, SAWIRÉH RERAMAN IPUNÉ TAN SIDA NUMBASANG SUSU, RERAMAN IPUNÉ TAN MADUWÉ JINAH.

INDIKÉ PUNIKI MAWIT SAKING KAPILIH NYANÉ PAN BANGGRAS DADOS KADÉS RING DÉSA BANGBUNG. IPUN NGAWI UGER-UGER SANÉ NGAWINANG SAMIAN WARGA DÉSANÉ KAJEPIT DADOS ENTIP.

SAKANCAN JUDI KAWEDAR RING SAJEBAG DÉSANÉ, KADI TAN PASEMU DÉSANÉ SANÉ MANGKIN. WARGINÉ SANÉ NÉNTEN SENENG MAJUDI KAASINGANG, NÉNTEN KARUNGUANG. NANGING YÉNING SARENG MAJUDI PASTIKA LAKAR KALAH YÉNING NGELAWAN PAN BANGGRAS

WARGA SANÉ PRO SARENG PAN BANGGRAS SINAH HIDUPNE PACANG BAGIA, DUANING KONG-KALI-KONG KAJUNGJUNG, SISTEM SOGOK-SOGOKAN KAAJEGANG. NANGING, SANÉ NGELAWAN PACANG KAJEKJEK TUR KAILANGANG SAKING JAGATÉ.

SEMENG PUNIKI RING GENAHNE NYOMAN RINGRING, TANGIS ANAK ALIT MABYAYUHAN, JERIT-JERIT NÉNTEN RÉRÉNAN. SEKADI RING PASAR TANGISAN NYANÉ. SANDINGAN NYANÉ SAMIAN PADA PADERONGOK NGATONANG, WÉNTEN SANÉ NGETÉLANG TOYAN PANON SAWIREH IPUN SENASIB. KURENANE NYOMAN RINGRING SANÉ MAWASTA LUH SULATRI NGENDUH-ENDUH TANGIS PIANKNE MANGDA MENDEP.

LUH SULATRI

(nyangkil pianak) “Kekéné suba dadine bli, ulian beli tusing nuutang munyin tiangé, yén saja beli nyak satinut sareng munyin tiangé, minab tusing kekéné penadine”

NYOMAN RINGRING

(bengong, sambil ngusap-usapin bokne)

LUH SULATRI

“Jani suba kekéné bli! Panak ngeling jerit-jerit semengan, baas jakan tusing ngelah, kadirasa bungut paon tusing ngidaang ngedusang. Lakar kénkénang! Uling pidan tiang suba melid-melid mamunyi. Da, da.....! Da pesan ngelawan kepala désané ento. Apa buin ngelawan majudi, i raga pasti kalah. Ia ngelah daya prikik. Jelék dadine keduriane! Apa buin iraga ngelah pianak cerik. Yén suba kekéné penadine, tiang tusing bisa ngorahang apa. Apa buin ané jani makejang suba telah, petaman leluhur suba dadi gelah pisaga ulian tohang beli di tajen, umah uwug. Tuduhan! Pis tambunan suba telah metarik. Ané masisa jani tuah utang bli! Utang ané matumpuk cara bukit!”(Ngeling sigsigan)

NYOMAN RINGRING

“Kéweh Luh!”(ngusapin yeh paningalane)

LUH SULATRI

“Mula kéweh jani bli, makejang kéweh!

NYOMAN RINGRING

“Mirib suba paduman Widhi”

LUH SULATRI

“Makejang mula paduman Widhi, sakéwala né ulian beli. Beli ané ngaé kakéné!”

NYOMAN RINGRING

“Arah.....! Ane suba liwat, liwatang Luh. Da buin gedenanga jani!”

LUH SULATRI

“Salah tiang nyambatang? Tiang ngorahang kasujatiane!”(yeh paningalane ngeretes melusin pipine Luh Sulatri)

NYOMAN RINGRING

“Yen Luh jani matbat beli, pianake nyak lakar mendep? Masih tusing, tetep dogen ia ngeling Luh. Yen dadi suud I Luh matbat beli. Beli ngaku awak beline pelih, beli masih ane ngetohang tanah leluhure di tajen, nanging ne makejang ulian jengeh. Kaliwat jengah Luh!”(Ngeling)

LUH SULASTRI

“Jengah kenapa bli?”

NYOMAN RINGRING

“Jengah ulian sesai ningeh munyin anak buahne I Bangras.”

LUH SULATRI

“Nanging, sepatutne tusing keketo carane bli. Jani i raga ajak pianke ane lakar nanggung.”

NYOMAN RINGRING

“Suud luh! Suud malu uyut dini, diolas suud, sesek tangkah beline Luh, depang beli dini pedidi!”(Nada membentak)

LUH SULATRI

(magedi ngalahin kurenane)

NYOMAN RINGRING

(Bengong sakadi anak mapangenan) “Yan saja jani ada galah lakar menain, jani lakar benain. Jani suba! Jani suba...........!(Makejang sandingane bengong ningalin tingkahne Nyoman Ringring) Jani lakar pragatang. Jani suba! Jani.....! Apang ilang jengah kenehe, apang sepalanan.(macelup ka kamarne, mewali pesu ngaba keris) Nenenan ane lakar nyuudang, nenenan ane lakar ngawinang ilang jengahe.(Ngedengang keris, lantas magedi)

NYOMAN RINGRING NEWEK MAMARGI KA JERONE PAN BANGGRAS KEPALA DESA BANGBUNGE.

NYOMAN RINGRING

(Saking pamesune Pan Bangras) Ihhh iba manusa cicih! Pesuang ibane! Ne kai I Ringring teka mai, lakar ngilangang jengah, diolas pesuang ibane. Satonden kai ngusak-asik tongose dini!

PAN BANGGRAS

(Pesu sareng ajudan nyane Nyoman Wirya lan Ketut Wirang) “Hahahahah......! Man, adeng-adeng malu! Mai malu negak dini. Kenken sujatine, adi tusing wahwih jeg uyut mai? Lamun Nyoman lakar nyilih pipis orahang dogen, kuda lakar nyilih? Hahahahahah......!”

NYOMAN RINGRING

“Manusa bejat, lamun iba wanen mai masiat lawan kai, kai mai tusing perlu pitulungan caine. Kai mai ngilangang jengah!”

PAN BANGGRAS

“Hahahahah.....! Masiat? Suud ngipi Man, bangun malu, kedatang matan caine! Nyen ajak cai nyatua jani. Cara manusa tusing ngelah tata cai mai gelar-gelur. Ne Pan Banggras kades Desa Bangbung, tusing ada ane maninin. Nguda cai awak lamun legune slangkab-slangkab mai ngajakin masiat. Aengken cai bisa ngeleak tumpang satus plakutus nantangin awake masiat. Yen dadi adeng-adeng Man! Pedalem kurenan caine dadi janda. Pianak caine ubuh! Hahahahah.....! Men cai sing dot nyilih ken awake, lakar baang awake ngidih Man!”

NYOMAN RINGRING

Tusing perlu kai ngidih pipis uli manusa bejat. Yen cai sing nyak ngelawan kai masiat, diolas mai aba sertifikat tanah kaine!”

NYOMAN WIRYA

“Sertifikat tanah? Kaden cai suba kalah dugas ni ngetohin I Sangkur? Nguda cai mai nagih sertifikat tanah?”

KETUT WIRANG

“Cai jelema punyah apa buduh?”

PAN BANGGRAS

“Tenang Man, tenang dogen. Lamun Nyoman perlu tusing masalah! Sertifikat tanahe nu di lemarine. Tusing perlu inguh Man. Hahahah.....! Wirya, jemak sertifikat tanahne Nyoman Ringring ane di lemari kamar tamune!”

NYOMAN WIRYA

“Kenken maksudne bos?”

PAN BANGGRAS

“Jemak enggalin!” (membentak)

(Nyoman Wirya nyemak sertifikat tanahne Nyoman Ringring)

PAN BANGGRAS

“Sabar Man, nu nyemak malu. Hahahaha.......!”

NYOMAN WIRYA

“Ne bos!”

PAN BANGGRAS

“Neh segseg Man!”(Nagelang sertifikat ke arepane Nyoman Ringring)

NYOMAN RINGRING

(nuduk sertifikat tanah  lantas magedi tan pasaut)

PAN BANGGRAS

(mamunyi disubane Nyoman Ringring magedi)“Bangsat! Jelema lekad itelun sanja ngawag-ngawag ngaba bikas mai. Antiang dogen! Hidup ibane tusing lakar metuwuh telu wai! Ne I Banggras kades desa Bangbung, pasti lakar nyabut urip ibane.(macelup ka umahne, katutugin olih ajudan nyane)

NYALUK SANDIKALA, RIKALA GUMINE NGESNGES NGENGESIN. SUARAN DONGKANG RING DESA BANGBUNG TAN RERENAN. ANGIN DINGIN KADI NYEGUT NGUTGUT. PAN BANGGRAS SARENG AJUDAN IPUNE MAKA KALIH MAMARGI, NGARURUH PAMANCUT URIPNE NYOMAN RINGRING

NYOMAN WIRYA

“Ne suba bos, umah balian saktine. Adan baliane Ki Ageng Bedug. Makejang anake ngorahang ia balian tenget. Menguasai segala ilmu. Ilmu perbalianan, persantetan, perguna-gunaan, perteluhan, perdestian, perleakan, miwah per-per ane lenan. Matimpal ajak sekancan ane ada di gumi sekala niskala, apa ane takonang jeg tawanga. Ane lekad bin mani, ane lakar mati bin mani, ane lakar cerae, ane kereng selingkuh jeg pasti tawanga. Ia suba berpengalaman dalam segala bidang perbalianan, dugas perang Bharatayudhane, ia suba ane ngadukang pandawa ngajak kurawa sangkala miyegan. Men sing ada ia meh tusing ada perang beratayudha. Lenan teken ento,ia masih suba taen makirim ke irak, lebanon, mesir dalam misi pengleakan internasional. Ia masih suba taen milu penataran ke jerman, paris, leiden ngenenin indik cara ngelemesin anak luh. Jeg mara kejitina dogen anake luh pragat majukut di natah. Dugas itiban ane suba liwat ia masih ngadaang silaturahmi ngajak sarwa isin pepetengan, apang mempererat tali persahabatan kone adane. Tusing ja ento dogen, ia masih tamatan sarjana perdukunan, maan predikat coum laude, ngelah titel S.Pd. Adan lengkapne Il. Ki Ageng Bedug, S.Pd.”

KETUT WIRANG

 “Adi S.Pd. titelne? Sing sarjana pendidikan ya artine!

NYOMAN WIRYA

“Pelih to, S.Pd. kepanjangane tuah sarjana perdukunan. Yen titel Il ane di malu kepanjangane Inan Leak. Pang nawang masih cai, beg nawang sarjana pendidikan dogen. Anak jani jaman suba pada maju. Mekejang dadi ngelah titel sarjana, kayang tukang nuduk saang ada titelne, ane madan S.T.T.S

KETUT WIRANG

“Apa kepanjangan S.T.T.S?

NYOMAN WIRYA

Sarjana tukang tugel saang.

KETUT WIRANG

“Campah cai!”

NYOMAN WIRYA

“Nyen campah, seken-seken ne baliane ngelah titel S.Pd”

PAN BANGGRAS

“Mih wayah adi baliane. Uli dija asal baliane ne? Asli dini?”

NYOMAN WIRYA

“Tusing, ia uli Gianyar kone!”

KETUT WIRANG

“Sing percaya cang ia balian sakti. Lamun uli Gianyar paling ia tukang amplas ane ada di artshop sisin margane. Ane maan uapah molas tali awai, krana kuangan pipis, ngalih ia penghasilan tambahan dadi balian. Di Gianyar sing ada produk balian, ditu tuah ada produk kerajinan dogen!”

NYOMAN WIRYA

“Ngawag cai mamunyi, onden taen cai meloloh cetik.”

KETUT WIRANG

“Men cai taen meloloh cetik?”

NYOMAN WIRYA

“Tusing ya, kanggoang di warung meli temu lawak dogen apang ada anak melinin dagange, soalne pedalem dagange enggang ngep rebut buyung sing ada melinin.”

KETUT WIRANG

“Suba ya sing taen, adi ngorahin timpal nganggon cetik dadi loloh!”

PAN BANGGRAS

(Nampel muane Nyoman Wirya lan Ketut Wirang) “Cai liunan munyi, setut tendasne, kaukin malu baliane!”

NYOMAN WIRYA

“Wirang, kaukin baliane!”

KETUT WIRANG

“Adi cang? cai ngaukin!”

NYOMAN WIRYA

“Pengecut cai, men cai sing bani cang ane lakar ngaukin (nigdig tangkah). Pekak balian............pekak balian......pekak balian..............niki tiang parekan pekak rauh tangkil iriki ring rahina kajeng kliwon nemu tilem nemu purnama, medal dumun usanang dumun ngerumus togel”

BALIAN

(medal saking kamarne)”Eheem! Nyen cai? Adi wong tawah mai gelur-gelur sandikala. Lakar ngadu kesaktian ne, ane lemah apa ane peteng? Lamun ane lemah taripne dua ratus, men ane peteng taripne lima ratus!”

NYOMAN WIRYA

“Niki tiang I parekan sayang Wirya. Tiang meriki nak ngatehin bos tiange.”

BALIAN

“Keto nake uli tuni, adi gelur-gelur cara ngaukin cicing, ne dipintune ada bel, to dogen pecik ping telu pekak pasti pesu. Sing perlu cai gelur-gelur cara ngelurin cicing. Ken bos caine? Ane basangne bengkang nenenan apa ane gigine langah?”

NYOMAN WIRYA

”Ane basangne bengkang nika kak! (matolihan sik Pan Banggrase) sori malu bos”

BALIAN

”Peh, kekene jenengne dadi bos, suba awak cara alutan, misi basangne bengkang, mata délep, bok kriting , misi lengar bagian atas. Pasti pait ne! Mai negak malu dini!”

NYOMAN WIRYA, KETUT WIRANG, PAN BANGGRAS

“Suksma kak” (malinggih malinderan)

BALIAN

”Kenken ne adi tumben mai nangkilin pekak?”

PAN BANGGRAS

”Niki kak, tiang wenten pinunas kidik”

BALIAN

“Pinunas apa? Lamun ngajak pekak da ngomong atenga-tenga, orahang dogen apa ane ke tagih. Kak sing demen nepkin anak mamunyi atenga-tenga.soalne pekak suba berpengalaman puluhan tahun. Lamun ngajak pekak sing dadi mamunyi tenga-tenga kualat dadine. Kak demen ane instan-instan.

PAN BANGGRAS

“Tiang nunas mangda pekak kayun nyedaang musuh tiange, sawireh ipun ngawe dewek tiange sakit hati”

BALIAN

“Ooooo! Oke, oke tenang dogen! Nyen jelemane totonan?” ( ngusuin jenggot, sambil anggut-anggut)

PAN BANGGRAS

“Nyoman Ringring nika wastane!”

BALIAN

“Sakti jelemane?”

PAN BANGGRAS

“Nenten nika kak!”

BALIAN

“Bah pasti jelema mara lekad telun sanja ne, ane bungutne tetean, bruak-bruak di jalane kangin kauh, kaja kelod groang-groeng ngaba motor ulian nyicil map-mapi sugih di jumahne ngamah uyah embo ne. Masalah keketo lamun jak kak tenang dogen, ne penting ada penukarne.”

PAN BANGGRAS

“Napi penukarne?”

BALIAN

“Peh cai katrok ne! Jani madan jaman modern, pasti cai nawang apa kebutuhan orang banyak”

PAN BANGGRAS

“Nasi kak?”

BALIAN

“Nasi! Aluh cai mamunyi, tendas caine lengar kaden nak dueg, tautaune lengar ulian sesai rebut gadgad ne! Pis tagih kak! Apang payu apa mani kak luas ke salon lakar pedicure ajak diribonding jenggot pekake.”

PAN BANGGRAS

“Masalah nika tenang dogen kak! Ne penting I ringring mati”

BALIAN

“CGT, Cenik Gae to, ken edengang malu kuda cai ngaba pis”

PAN BANGGRAS

(ngedengang pis) “Niki kak tiang makta satak tali rupiah!”

BALIAN

“Adi bedik, kadenang cai aluh memantra, matra ngematiang jelema nak lantang maal to ajine, kudang pis suba telahan pekak anggon kuliah apang maan mantra totonan, sing cara mantra ngematiang cicing bawak gati, buina aluh ngalih, di badan sampine ngaliin maan”

PAN BANGGRAS

“Niki anggen DP malu kak, mani bayah tiang sisane.”

BALIAN

 “Ah kak sing demen cicilan, uang cash mara kanggo. Men cai nyicil, mantrane cicil pekak masih.”

PAN BANGGRAS

“Beh pekak! Cai Wirang, kuda cai ngelah pis, baang malu nyilih mani ulianga ya?”

KETUT WIRANG

“Ngaba satus tali rupiah bos ukana anggon meliang I Putri enci!” (Nyeluk kantong tur mesuang jinah)

PAN BANGGRAS

“Mai bos malu baang nyilih, I Putri ane bungutne nganjuh sing perlu beliang enci, nyanan nyajaang nganjuh”(Nyemak jinahne I Wirang laut kaenjuang ring baliane) Kanggeang telungatus tali nggih kak?”

BALIAN

“Ah! Cai ngajak timpal dadua, to bin sik takonin kuda ngaba pis?”

PAN BANGGRAS

“Wirya, kuda cai ngaba pis? Nyilih malu kesep.

NYOMAN WIRYA

“Ngabo karobelah bos, ukana anggon meliang I Susi pupur.” (Nyeluk kantong tur mesuang jinah)

PAN BANGGRAS

“Arah I Susi ane selem to tusing perlu pupurin nyanan kena yeh ujan poleng dadine, mai aba pipise!” (Ngambil jinahne I Wirya)

BALIAN

“Kuda maan makejangne?”

PAN BANGGRAS

“Niki kak, kanggeang samas seket tali rupiah (Ngenjuang pipis) niki malih wenten logam limang atusan aketeng!” (nyeluk kantong baju tur ngemaang baliane pipis logam)

BALIAN

“Nah ane jani kanggoang pekak malu, mani-manian lamun cai mai ingetang ngaba sokasi, ditengahne isinin baas, lan canang sari. Canangne kanggoang atanding, sesarine labiin! Eda mai ngaba dakin gigi. Ane jani baang pekak malu soalne cai pelanggan baru, anngap dogen pekak ngemaang cai diskon.”

PAN BANGGRAS

“Suksema pisan kak!”

BALIAN

“Jag aluh bibih caine ngorahang suksma! Ken sing ada fotone ane lakar matiang?”

PAN BANGGRAS

“Niki kak!” (Ngenjuang fotone Nyoman Ringring)

BALIAN

(nampi foto) “Tenang antiang malu kesep! Pelayan, abaang pekak mai pasepan, canang sari telung tanding, dupa, keris, tikeh, buku catetan mantra, dompet wadah pipis, kelungah nyuh gading mererajah cewek melalung, roti sisir selae nanas, enggalin aba mai. Jemakang masi pekak minuman kaleng ane di kulkase ajak dunhil ane di duur mejane abongkos. Men sing ada ditu mutang malu di warung.

PELAYAN

(Uli di kamar) Nggih kak!”

(Pelayane alon-alon memargi maktayang napi sane katagih pekak balian) niki kak!”

BALIAN

“Nah, dini di arepan pekake pejang!”

(pekak balian nyiagayang alat-alat sane jagi keanggen) Jani suba tingalin keampuhan pekake, malahang negak eda uyut nyanan pekak sing konsentrasi salah sasaran dadine!”

PAN BANGGRAS

“Nggih kak!”

BALIAN

“Sorrrrr.......sorrrrrrrrr........kasor! Ning......ninggg....krining! Sengggg...........! Senggg............! Geseng! Torrrrr.........! Torrrrrr.......! ngetor! Parewangan, jin papetengan, sarwa gumat-gumit saru. Medal-medal saking genah singid ilid, nampekin aku nampekin. Aku nunas tulungan, tulungin aku. Iki pedekan nira rawuh sareng tetiga, sane kaping siki wetengne bengkang, kaping kalih gigine langah, sane kaping tiga cangkemne liwatan bin limang senti jagi nunas pamancut uripnya Nyoman Ringring, rawuh saha katulusannya. Taler rawuh saha sesari samas seket nanggu pis krecekan limang atusan berek aketeng, sisane sampun baang aku diskon. Aku mangkin ngaturang lelabaan pasepan, canang sari, kelungah nyuh gading merajah cewek melalung, miwah roti sisir selae nanas. Lumaris nampekin aku, kumpul ring cangkemku, ring cangkemku kumpul. Kenak-kenek-kenak-kenak.....(wacen kadi ngewacen mantra).

Kenken suba seken kenehe lakar ngematiang Nyoman Ringring, men suba seken ker lepas, lamun batal pis hangus!”

PAN BANGGRAS

“Sampun kak!”

BALIAN

(Wacen sekadi anak mamantra) “Oke, jin parewangan, gumata-gumitit saru raris tulungin aku, bancut uripnya nyoman ringring. Yening durung tatas pedas jagi natasang, lumaris cingak-cingak fotonnya ukuran 3 R full colour. (Ngaud keris lantas nebek fotone nyoman ringring) Hahahahah.....! Antiang dogen malu, mani semengan pasti ada kabarne.

PAN BANGGRAS

“Suksma pisan kak, hahahah.......! Mati iba Ringgit! Keto suba rasane wanen ngajak kades desa Bangbung I Banggras(Nigdigin tangkah). Hahahah......!”

BALIAN

“Nah ane jani suba adana pekak nulungin cai! Pipis ane suba baang cai lakar celupang malu ke dompete kalanga jine ane kirim pekak ngematiang I Ringring konden teka! Nyaan nagih bagian fifty-fifty ajak pekak.”

PAN BANGGRAS

“Suksma pisan kak, niki yening nenten sangkaning pekak minab tiang nenten jagi pacang sida ngicalang jengah tiange”

BALIAN

“Oh ento mula suba kewajiban pekak dadi balian. Jani pekak ngidih tulung abedik nah!”

PAN BANGGRAS

“Ngidih tulung napi kak?”

BALIAN

“Kene, cai ken suba nawang jani gumine maju, makejang serba canggih. Unduke ento masih ngranayang profesi balian nyasan-nyasan tusing ada anak rungu. Tusing cara ipidan anake liu ngalih balian. Ane jani sabilang sakit, keweh anake nyak lakar ngalih balian. Gengsi kone, apa buin bajang-bajang cara janine. Mara senget nyinyik dogen suba ngalih dokter. Baliane kanggoang suba ngoyong di bucu makento tusing ada anak nangkilin. Meh jani men lakar ngalih nak luh mara anake ngalih balian. Men sakit pasti ngalih dokter. Nah jani ane dadi pengidih pekak, diolas promosiang pekak nah! Men nyidaang gaenang pekak sepanduk lan pasang ditu di pempatane, apang liu apa anake ane nawang pekak. Nyen nawang ulian ento penghasilan pekake lakar nambah. Pekak masih lakar berusaha ngalih langganan, men sing maan langganan ker cetik tebongne pisagane dauh umahe pang nyak ia teka maubad dini. Sakewala tulungin masih pekak bedik-bedik.”

KETUT WIRANG

“Masalah kenten, tenang dogen kak. Bos tiange pasti lakar nulungin. Sakewala tulungin nake tiang apang tiang nyakina teken I Sari janda mudane ane seksi to kak.”

BALIAN

“Cai, lamun lakar ngidih tulung ingetang ngaba baas mai, isinin canag sari, nanging sesarine minimal suba limang atus tali.”

KETUT WIRANG

“Adi mael kak?”

BALIAN

“Jani dija ada barang gratis, barang bangka dogen mael ajine, kalingke barang melah ane cara gelah pekak, jeg pasti mael!”

KETUT WIRANG

“Pait pekak!”

PAN BANGGRAS

“Tiang pamit nggih kak, sawireh niki sampun wengi pisan.”

BALIAN

“Nah-nah, mani lamun lakar ngidih tulungan jeg mai dogen suba, pekak pasti lakar nulungin.”

BENJANGNE, SEMENG PISAN GUMINE SAMPUN GULEM RERREM NENTEN JA SAKADI BIASANE. PUNIKA TALER LANGIT RING DUUR DESA BANGBUNGE REMREM TAN PASEMU.

PAN BANGGRAS

(Ring obag-obag pamesune) “Gulem suba semengan jani, bila perlu ujan bales apang bangkene I Ringring ujanan tendasne.”

(saget saking kelod rawuh anak nganggen pakean adat madya sareng kalih)

WARGA I

“Om Suastiastu pak, rahajeng semeng!”

PAN BANGGRAS

“Suastiastu Man, lakar kija ne? Nguda tumben semengan suba marerod!”

WARGA I

“Niki, tiang jagi madelokan sik Nyoman Ringringe.”

PAN BANGGRAS

“Ngujang-ngujangin di jumahne I Ringring? Adi sing ada kabar” (Nyaru-nyaru nenten uning)

WARGA II

“Bapak nenten miragi Nyoman Ringring ngalain. Tiang sandingane tunyen ngorain.”

PAN BANGGRAS

“Ah, masak? Ibi te tepuk seger oger. Sakit kenapa kone ia? (Mapi-mapi tengkejut)

WARGA II

“Ten uning pak, jeg dapetanga sampun ngalain teken kurenane, orahanga awakne sebuh kone nika.”

PAN BANGGRAS

“Bih, ganas penyakite jani, pasti kena serangan jantung ento, jani ken liu anake mati ulian kena penyakit jantung.”

WARGA II

”Minab kekentan jenenga, tiang nenten uning masih. Magih tiang jagi sik Nyoman Ringringe dumun.”

PAN BANGGRAS

“Nah-nah, malunan suba kemu, nyanan tengai-tengaian bisa bapak kemu.”

(Wargane sareng kalih sampun magedi ngantos nenten kecingak malih olih Pan Banggras)

PAN BANGGRAS

“Hahahah............! Yan hana wong tawah, parek ring aku ngapak-apak saha ngopak pastika lakar lina......! Ne rasanin suba Ringring, rasanin......mati iba hahahahaha.....!”

(Saget krebek rawuh saha tatit pacebetbet nyarengin, maselang amenit saget sabeh baret tedun ka mercapada)

RING GENAHNE NYOMAN RINGRING, TANGISNE LUH SULASTRI TAN RERENAN SEGUT-SEGUT, KADIRASA TELAS TOYAN PANON IPUNE NGETEL MELUSIN PERTIWI. LAYONE NYOMAN RINGRING KAKOCOK OLIH LUH SULASTRI.

LUH SULASTRI

“Bli, bli Nyoman, nguda beli tan pawangsit ngalahin padewekan tiange. Kerasa tan pabayu mangkin dewek titiange, kerasa tan paangkihan dewek tiange tanpa beli. Bli, diolas bangun, bangun bli. Tingalin bli pianake cenik tusing ada ane ngerunguang. Nyen ane lakar ngaliang tiang sareng pianake baas jakan bli. Bli diolas bli bangun........!(Nangis tan rerenan)

DADONG SENGKER

“Luh, suud malu ngeling. Tan wenang luh mangelingin anak ane suba mati. Depang suba ia mejalan kemu. Ni tuah suba titah suwung ane tusing dadi lawan luh! Ane jani, pianake dogen runguang. Melahang miara apang kurenane tenang di kedituan nyalanin karmane.”

(Sausan layone Nyoman Ringring kapandusang, raris ka bakta ka setra)

MATUWUH TELU BULAN SESAMPUNE NYOMAN RINGRING NGALAHIN, IDUPNE LUH SULASTRI NYSAN-NYASAN MEWEH. UNDUKE PUNIKA MAKSA LUH SULASTRI NITIPANG PIANAKNE RING PEKAKNE ANE ADA DI BADUNG. INDIK IDUPNE LUH SULASTRI SANE NYASAN MEWEH KAPIRENG OLIH PAN BANGGRAS.

LUH SULASTRI

“Ratu Betara, nguda sekadi puniki nasib titiange numadi ring mercapaa? Tiwase bas keliwat, kadirasa sabilang wai naanang seduk. Meweh rasane tiang pacang nyalanin urip titiange puniki. Yan dados titiang mapinunas, rarisang sampun bancut urip tiange niki.”

PAN BANGGRAS

(Ngempreng saking pamesune Luh Sulastri) “Luh Sulastri jegeg adi Luh mamunyi keto, sing pantes anak luh jegeg buka I Luh nagih mati.” (nyolek jagutne Luh Sulastri)

LUH SULASTRI

(Ngisidang limane Pan Banggras) “Wenten napi jerone rawuh meriki, durung med jerone ngawinang dewek tiange sakaluwarga sebet?”

PAN BANGGRAS

“Adi galak-galak keto luh, nyanan ilang jegege. Beli tusing taen ngaenang I Luh sebet. Beli mai lakar ngaenang I Luh bagia. Ipidan Luh setata sebet ento krana kurnan Luhe ane tusing ngelah apa.”

LUH SULASTRI

“Ngujang jerone meriki?”

PAN BANGGRAS

“Cara rawos beline tunyen lakar ngaenang I Luh bagia.”

LUH SULASTRI

“Bobad, manusa jalir”

PAN BANGGRAS

“Hahahahaha......! Percaya ken beli Luh, beli tusing lakar ngaenang Luh sebet. Apa ane tagih I Luh lakar isinin beli, mobil mewah, mas, pepayasan ane bungah, shoping ke mall, kesalon. Pasti lakar isinin beli, sakewala I Luh harus nganten ngajak beli!”

LUH SULASTRI

“Tiang tusing nyak nganten ngajak jerone. Sane mangkin, rarisang jerone magedi sadurung tiang nyeritin wargane iriki.”

PAN BANGGRAS

“Luh pang kenken buin beli mai, beli dot nganten ngajak I Luh, diolas, mai Luh nganten ngajak beli. idup luhe pasti lakar tenang cara di suargan.”

LUH SULASTRI

“Pokokne tiang ten nyak, diolas magedi, magedi.........!”

PAN BANGGRAS

“Luh, eda ajum mara ngelah kajegegan. Beli tusing ja lakar suud-suud ngelemesin Luh, apang kanti iluh tekuk lutut di batis beline. Ingetang dogen Luh mani pasti I Luh lakar dadi gelah beline. Ingetang ento Luh, resepang munyin beline.......!(Magedi)

LUH SULASTRI

“Pokokne kanti mati tiang tusing nyak nganten ngajak manusa jalir! Tiang kari satia sareng Bli Nyoman!” (Ngeling)

SEDEK DINA REDITE RING BALE DESANE AKEH PISAN ANAKE MATAJEN, SIAPE PADA MAPALU, KRAMANE PADA NGETOHIN. UYUTE KRAMANE SANE NGETOHIN SIAP TAN RERENAN. SAGET RAWUH PAN BANGGRAS SARENG AJUDANE NYOMAN WIRYA.

PAN BANGGRAS

(Nyoman Wirya ngaba krepe nongos di durine Pan Bangras) “Siep.....! (sami kramane mendep tur miakang jalan) Nyen wanen nyen? Lamun wanen mai aduang! Ne I Ijo gading ane lakar nandingin.”

BEBOTOH I

“Ne I Srawah lakar nandingin I Ijo Gading”

PAN BANGGRAS

“Kuda bani?”

BEBOTOH I

“Dasa Juta”

PAN BANGGRAS

“Oke, ne I Banggras kades Desa Bangbunge ngetohang tegal ane ada di tanggun desane makejang, kenken lébang?”

(Bebotohe sami mesuryak)

BEBOTOH I

“Dasa juta maimbuh carik ane di bongkol gununge badauh makejang, léb.”

(Bebotohe sami mesuryak malih)

PAN BANGGRAS

“Tegal maimbuh carik ane di samping pura pusehe lan pipis selae juta.”

BEBOTOH I

“Pas!”

PAN BANGGRAS

“Bagus, Wirya pesuang I Ijo Gading. Jani lawanang apang taen I Ijo Gading ngaud carik ajak pis dasa juta!”

RISAMPUNE SIAPE PADA-PADA MATAJI TUR KAADUANG, SURYAK-SURYAK BEBOTOHE MABYAYUHAN. SIAPE SALING GEBOG SALING GENCER, NANGING MAKELO-KELO SIAPNE PAN BANGRAS NYASAN LELEH TUR BAONGNE PEGAT KENI TAJI.

I IJO GADING MATI BAONGNE PEGAT GETIHNE NGEBYOR. BEBOTOHE MASURYAK.

PAN BANGGRAS

“Bangsat, adi bisa kalah I Ijo Gading. Kenken ne undukne.”

BEBOTOH I

“Menang raga jani hahahaha......! Tumben kades Bangbunge kalah.”

PAN BANGGRAS

“Cang sing trima ne, eh Wirya kenken sangkal bisa siape kalah? Kenkenang cai tunyen?”

NYOMAN WIRYA

“Sing kenken-kenkenang raga bos!”

PAN BANGGRAS

“Bangsat cai (Ngapuakin I Wirya kantos nyelempoh) Yen sing ulian endahang cai siap cange tusing ja lakar kalah (Nyekuk baong bajune I Wirya, bebotohe makejang bengong) cai jelema begug tusing nawang balas budi.

NYOMAN WIRYA

(Bangun nampokang limane I Banggras)“Eh Banggras aluh cai mamunyi tusing medasar, celangan ke bibih cai, konden seken nawang apa suba ngawg-awag mesuang munyi, cai tusing nawang balas budi, yen tusing ulian cang, cai tusing lakar dadi kades dini. Eda tawah cai dadi jelema!”

PAN BANGGRAS

“Melaang cai mamunyi nah, ngendah cai ngajak cang. Yening tusing ulian cang maang cai pipis anggon baas jakan, mirib cai ajak keluwargan caine makenta sabilang wai. Uli jani diolas magedi cai! Magedi eda buin paak ngajak cang.”

NYOMAN WIRYA

“Uli jani, uli dinane jani, cang suud idup ngajak cai, cang nu nyidaang ngalih gae len.” (Ngentungang krepe tur magedi)

PAN BANGGRAS

“Bubar-bubar, apa ketingalin dini,demen ningalin pisaga miyegan? Bubar..........!”

(Samian bebotohe biur magedi ngalain Pan Bangras)

Bangsat! Ketumbenan cang kalah, kalah........! Eh angin nglinus, matan ai diolas orahang! Orahang! Nguda tumben cang kalah.....! Orahang.......! Apa ulian I Wirya, Wirya bangsat!”

SEMENG LUH SULASTRI NEGAK ALEP RING BALENE MASAMBILAN NAPINANG BERAS SANE JAGI KEANGGEN NASI. SEBEBNGNE SEDIH, UCEM SEKADI TAN PABAYU. LIMANE LAYU NGOREK-NGOREK BERAS NGILNGANG LATAHNE.

NYOMAN WIRYA

“Luh Sulastri, apa megae luh?”

LUH SULASTRI

(Tengkejut) Wirya? Ngujang cai mai, ngujang cai orahina mai ken I Bangras? Ker nyakitin keneh awake? Diolas, magedi cai jani! Magedi (nagel Nyoman Wirya nganggo sambuk)

NYOMAN WIRYA

 “Nden-nden malu Luh, pasti I Luh salah paham ne!”

LUH SULASTRI

“Salah paham apa? Tiang suba med ningalin manusa cara cai! Magedi uli dini, magedi.......!”

NYOMAN WIRYA

“Adeng-adeng Luh, tetujon raga mai luung tusing ja lakar ngawi I Luh sebet Luh. Percaya ajak raga Luh.”

LUH SULASTRI

“Men apa tetujon caine mai? Yen sing lenan teken ngae sakit hati. Tiang suba nawang bikas caine!”

NYOMAN WIRYA

“Raga mai lakar ngorahang apa ane sujatine ngenenin indik kurenan luhe Nyoman Ringring!”

LUH SULASTRI

“Suud kurenan tiange ubat-abita buin. Depang ia tenang di kedituan.”

NYOMAN WIRYA

“Nah luh, raga suba nawang ene makejang. Raga ngidih pelih Luh yening raga ngubat-abit kurenan I Luhe. Sakewala ne seken-seken ngenenin indik ane makada kurenan I Luhe ngalain.”

LUH SULASTRI

“Suud-suud cai ngubat-abit kurenan tiange, tiang suba ikhlas ngelebang kurenan tiange kemu ke gumine wayah, sawireh ento suba tuduh Widhi. Jani eda buin cai, ngaenang tiang engsek. Diolas......! (Magedi ngalahin Nyoman Wirya)

NYOMAN WIRYA

(Ngedeng limane Luh Sulastri) “Dingehang malu Luh, dingehang akesep dohen! Sujatine ane ngematiang kurenan I Luhe ento tuah I Bangras.”

LUH SULASTRI

(Nyelempoh tur ngeling) “Apa orahang cai?”

NYOMAN WIRYA

“Sujatine I Bangras ane ngematiang kurenan I Luhe. Raga ane nulungin I Bangras ngalih balian kemu. Raga masih ane milu nyaksiang ditu!”

LUH SULASTRI

“Manusa jalir, jalir....! magedi cai uli dini, eda pesan cai ngenjek natahe ne buin. Magedi, magedi manusa jalir........! Biadab cai.....!”

NYOMAN WIRYA

“Raga ngidih pelih Luh. Sakewala jani raga suba suud sekongkel ngajak I Banggras, raga tobat Luh tobat...!”

LUH SULASTRI

“Tiang sing perduli, pokokne diolas cai magedi, da buin cai ngedengang awak dini.... magedi......!” (Ngeling sigsigan)

(Nyoman Wirya magedi ngaba keneh sebet sawireh ipun wau uning tingkahne salah)

LUH SULASTRI KNTUN MAKEPU RING NATAHNE SAMBIL NANGIS, SAGET RAWUH PAN BANGGRAS SARENG KETUT WIRANG MERIKA

PAN BANGGRAS

“Luh, kenken Luh? Adi I Luh ngeling makepu di natahe? Suba keneh-kenehang I Luh pangidih beline ento Luh?

LUH SULASTRI

(Ngenengneng paningalane Pan Banggras raris matangi maakin) “Manusa jalir iba Banggras. Dadi ati iba ngae idup kaine sengsara. Iba suba ngematiang kurenan kaine! Jani cara manusa tusing ngelah rasa lek iba mai. Misi ngelemesin kai. Magedi iba uli dini, kai sing dot ningalin jelema corah cara iba, magedi uli dini magedi!”

PAN BANGGRAS

(ngedengang gemelan tur nyagur limane) “Bangsat iba Wirya! Cai pasti ane suba ngorahang unduke nenenan. Sing ada anak lenan ane nawang! Antiang dogen malu!

(Mawali mawicara alus ring Luh Sulastri) Adeng-adeng Luh, da kenyat ngajak beli Luh! Beli ngaku, beli saja ane ngematiang kurenan I Luhe. Sakewala ento makejang krana solah kurenan I Luhe ane ngae beli sakit hati. Nanging ulian kurenan I Luhe mati, idup I Luhe lakar tenang. Sawireh ane jani beli lakar ngajak I Luh nganten. Hahahahah.....!

LUH SULASTRI

“Bangsat cai manusa jalir (Nyemak sampat tur mutput Pan Banggras) Magedi cai! Magedi.....!”

(Pan Bangras sareng Ketut Wirang magedi ngalahin Luh Sulastri, Luh Sulastri macelup ka kamarne sambil ngeling)

RING GENAHNE NYOMAN WIRYA. NYOMAN WIRYA NYODOG RING BALENE SAMBIL BENGONG MELOK-LOKANG NINGALIN AWANG-AWANGAN. IPUN NYESELIN DEWEK SAWIREH TINGKAH PARISOLAHNE SAMPUN IWANG.

PAN BANGGRAS

(Pan Bangras kasarengin Ketut Wirang saking pamesun umahne Nyoman Wirya) “ Wirya.....wirya, pesuang iban caine. Da cai mesekep di jumah. Pesuang iban caine. Da cai wanen di bengbengan!”

NYOMAN WIRYA

(maakin Pan Banggras lan Ketut Wirang) “Kenken keneh caine ngalih cang mai?”

PAN BANGGRAS

“Cai jelema bangsat, bani cai ngorahang teken I Sulastri unduk kematian kurenane! Cai manusa sing pantes idup di gumine, luungan suba cai mati. Wirang.......! (Nuding Nyoman Wirya)

KETUT WIRANG

“Oke bos! (maakin Nyoman Wirya, raris nebek baongne Nyoman Wirya) Bangka iba Wirya, kene jani nasib caine!” (Getih muncrat saking baongne Nyoman Wirya)

NYOMAN WIRYA

(Mamunyi terbata-bata)”Bangsat cai! (Raris nyelempoh makalang tanah nenten makrisikan, getih ngebyor medal saking baongne Nyoman Wirya tan rerenan)

PAN BANGGRAS

“Hahahahaha.........! Bangka ibaWirya, kene suba panadine yen bani ngajak I Banggras kades Desa bangbunge. Hahahahah.....!

KETUT WIRANG

“Kenkenang ne bos, cang takut. Nyanan ada anak nawang cang ajak bos ane ngematiang I Wirya.”

PAN BANGGRAS

“Masalah kene gae cenik. Mai oros bangkene I Wirya entungang ke jurange di dangine. Tusing ja ane ada lakar nawang.

KETUT WIRANG

“Lamun keto jalan jani kutang apang tusing ada anak nawang!”

PAN BANGGRAS

“Lan majalan jani!”

(Pan Banggras sareng Ketut Wirang ngoros bangkene Nyoman Wirya tur kaentungang ka jurange dalem ane ada di dangin umahne Nyoman Wirya)

RARIS SANE MANGKIN PAN BANGGRAS SARENG KETUT WIRANG NUJU KA UMAHNE LUH SULASTRI. DAPETANGA IRIKA SUWUNG.

PAN BANGGRAS

“Sulastri...! Sulastri....! Sulastri....! Dija nyai, mai jalan nganten ngajak beli, mai jalan nganten. Mai Luh pesuang ibane jalan maliang-liangan ngajak beli!”

KETUT WIRANG

“Bah suwung dini bos, mirib ia suba magedi!”

PAN BANGGRAS

“Onden I Sulastri nu dini! Alih ia di kamarne. Pasti ia ditu. Men ada jeg paksa orahin pesu!”

KETUT WIRANG

“Oke bos sing masalah (Ketut Wirang macelup ka kamarne Luh Sulastri) Ne ia bos dini!”

PAN BANGGRAS

“Paksa ajak mai, pang tawanga!”

KETUT WIRANG

(Saking kamarne Luh Sulastri)” Pesu nyai sulastri, pesu!”

LUH SULASTRI

(Saking kamarne Luh Sulastri irika uyut mabyayuhan, suaran botol,suaran piring, suaran kaca belah maadukan)” Manusa jalir, jalir iba....magedi iba, magedi!”

KETUT WIRANG

(Saking kamarne Luh Sulastri)”Mai nyai pesu nyai pesu!”

LUH SULASTRI

(Saking kamarne Luh Sulastri)”Bangsat cai manusa jalir! (Memberonyak)

KETUT WIRANG

(Pesu uli kamarne Luh Sulastri sambil ngedeng Luh Sulastri) “Ne bos I Sulastri” (Luh Sulastri ngelawan, nanging kagisiang tekek olih Ketut Wirang)

PAN BANGGRAS

“Hahahah.....! Lebang ya, apang tawang apa ane lakar gaena!”

KETUT WIRANG

(Nagelang Luh Sulastri kantos makasahan ring natah umahne, Luh sulastri ngeling samian sandingane ningalin nanging nenten sida nulungin)

PAN BANGGRAS

“Luh....Luh Sulastri. Jani suba nyai lakar dadi kurenan beline. Tusing ada ane bani lakar numalangin (Luh Sulastri magaang kirig-kirig, nanging Pan Banggras nutugin) Ker kija I Luh jani, ker melaib? Lamun nyidaang muh melaib. Hahahaha......! (Luh Sulastri mangunang dewek lantas matindakan adeng-adeng, Pan Bangras nutugin di durina saha ngampok muane Luh Sulastri kantos Luh Sulastri nyelempoh di natahe) hahah....! Mai luh jalan jani nganten ngajak beli! (Luh Sulastri magaang kirig-kirig lantas melaib nyemak saang tiing, Pan Bangras ngemiluin Luh Sulastri, nanging Luh Sulastri nebekang tiing punika ring awakne Pan Bangras) Aak....! Luh Sulastri! (Lantas Pan Bangras nyelempoh di natahe)

KETUT WIRANG

(Nyagjagin Luh Sulastri saha ngapuakin Luh Sulastri) “Bangsat nyai Sulastri! (Ketut Wirang maakin Pan Bangras sane sampun maguyang di natahe, tiing sane nanceb ring awakne Pan Bangras keabut lan kedagelang) Bos! Bos! Bangun bos, bangun! (Ketut Wirang ngoyagang awakne Pan Bangras, nanging Pan Bangras tan makrisikan. Uli bibih pesu getih tur awakne telah urab getih)

LUH SULASTRI

(Bangun alon-alon lantas ngambil tiing sane kedagelang Ketut Wirang. Uli durine Ketut Wirang ia majalan alon tur nancebang tiing punika ring awakne Ketut Wirang) Mati iba Wirang.....!

KETUT WIRANG

“Aaaaaaaa........kkkkkkkk! (Ketut Wirang nyelempoh, getih ngebyor uli awakne Ketut Wirang)

LUH SULASTRI

(Sekadi anak paling sambil nangis, raris macelup ka paonne. Raris medal malih  saking paonne makta tiyuk belati. Ipun raris nebekang tiyuk belatine ring awakne Ketut Wirang lan Pan Bangrah sane sampun sekarat) “Niki bli tiyang sampun ngewalesang sakit hatin beline! (ngedengang muncuk tiyuk belati sane urab getih) Anyosang tiang irika bli, tiang mangkin nyarengin beli! (Alon-alon tiyuk belati punika katebekang ring baong ipune, getih ngerecek membah melusin awakne Luh Sulastri. Lantas Luh sulastri nyelempoh nenten makrisikan malih)

GUMINE MENADOS GULEM, TATIT MACEBET KASARENGIN ANTUK KREBEK. RARIS SAKING LANGIT MEDAL TOYA SABEH TAN RERENAN

*****PUPUT*****