Gagéndong
 |
| "Pengemis Tua" AnggaraPHW |
Nyambat
gagéndong, prajani inget tekén anak ngidih-idih. Ngidih-idih di rurungé.
Ngidih-idih ka umah anaké. Raos ané katah pesu di katujuné ngidih : Tiang nunas
Jero, titiang nunas Tu. Yén sing ngaraos kéto, mesuang raos kéné: Pak tiang
nunas Pak. Utawu Buk tiang nunas, Buk. Ada ané sing mesuang raos apa. Nundikin,
natakang lima, ngantiang apang kanti enjuhina.
Parilaksana
di katujuné ngidih, ada ané sing magedi yén sing baang. Ada ané maksa apang
baang. Ada masi ané nglingus, tindakan batisné biasa dogén yén sing enjuhina
apa-apa. Tur, ada ané majalan nguntul sakéwala sebengné biasa yén sing baang
ngidih.
Apang
ané idihina madalem mategep trik ané
laksanaanga. Ada bajunné sétsét pasranting nyinahang déwék tiwas nékték. Ada
bokné sumbrang-sambring tur awakné maong makodongan nyinahang déwékné lacur tan
kadi. Ada ngajak anak cerik masebeng kecud. Ada ngajak raré maréngés cunguhné
bek misi ngéngés. Anak cerik miwah raré ané ajaka, bajunné mablolotan uyak
daki. Awakné bengil. Bokné gading cara bok jagung. Giginné kuning tur maong.
Unduk
gagéndongé, sing suud-suud dadi sesambatan gumi. Ada ané nyambat anaké ngagéndong
ulian males magaé. Meled apang énggal maan sakéwala ulian sing mesuang peluh.
Ada ané nyambat, anaké ngagéndong dot énggal ngelah sakéwala ia ulia pajalan élah.
Ada masi nyambat, anaké ento ngagéndong mula uli leluhurné kakéto. Yén sing
nyalanang ané laksanaanga tekén leluhurné bisa gelem wiréh bani piwal tekén
pajalan leluhurné ané suba kéto uli malu.
Lénan
tekén sesambaté baduur, ada nyambat, ngagéndong anggona ngalih pangupa jiwa.
Artinné, anggona gegaén. Wiréh yén madagang kemulan sing ngelah. Dadi petani,
tanah sig désané sing dadi tajukin. Buina, pipis meli wiwit tetanduran miwah
rabuk sing ngelah.
Ada
masi nyambat, ngagéndong anggona daya apang liu ngelah pipis. Disubané liu
ngelah pipis, anggona meli barang ané
dotanga. Koné, taén ada anak nepukin gagéndong ABG ngaba HP. Koné, dugas anaké
nepukin nakonin, gagéndongé ento ngaku meli HP ulian munduhang pipis. Pipis
ulian ngagéndong.
Tur
ada nyambat nganggon patakon: ngudiang kanti ada gagéndong? Apa sujatiné
ngranaang? Kénkénang apang sing nu ada gagéndong? Patakon ané sambatanga ené
sing kalanturang dadi laksana. Patakoné, nongos tur kambang, tegteg tur begbeg
dadi patakon. Pak Téori, kéto guminé nyambat anaké ané nyambat gagéndongé aji
patakon.
Yén
duluh soroh patakon baduur, sing ada anak nyambat: padalem anaké ngagéndong.
Wiréh paturu wong bali lan tulungin. Apa makada? Taén dingeh raos kéné: madalem
lan mapitulung tekén gagéndong patuh tekén madalem lan nulungin anak sing bisa
ngajiang déwék. Patuh tekén madalem lan nulungin anak sing nawang ngelah karang
di awakné ané dadi pulain. Karang di awakné ento marupa kabisan. Kabisan ané
dadi anggon sanjata nyiatin tiwas déwékné. Tur anggon cangcang nyegjegang
jengah apang sing kajengahan. Dadi anggon nundunin lek keneh apang sing ngaé
lek: kemu-mai natakang lima, kemu-mai ngorahang nunas, kemu-mai ngasorang awak
nyungjungang anak apang banga ngidih, apang enjuhina ja. Apang tlapakan limané
cekolina ja.
Yén
keneh-kenehang, raosé inucap melah pasaja. Melahné sakéng silib ngorahin gagéndongé
apang marasa tekén déwék bisa ngidupin padéwékané uli kabisan padidi. Bisa
ngidupin padéwékané aji pangupa jiwa uli peluh padidi. Sakéwala, nawang ya gagéndongé
tekén awakné kakéto? Satus persén sing. Keneh ngagéndong sadarana gati. Ngagéndong
lan ngagéndong. Sing misi étéh-étéh apa buin di ngagéndongné, maan sing maan
sing lega tur sing sebet. Maan payu. Sing maan sing kénkén. Anaké cara jani
ngorahang: no problém. Unduk awakné ngelah kabisan sing pesan taén
kenehanga.
Unduk
ngagéndong, taén ada anak ngraos kéné. Anaké ngagéndong ento jujur. Ngidih ngéténg-ngéténg.
Sing mengkeban. Joh para padaang tekén maling, rampok, juru pirat, juru lamit,
copét. Pelih gedé ngurusang gagéndong ané ngidih di rurungé tur ka umah anaké.
Padaang tekén nguyutang gagéndong kéto, adénan nguyutang gagéndong madasi miwah
gagéndong malipstik. Gagéndong ané silib-silib tur pongah juari ngidih-idih
jabatan. Disubané maan jabatan sing suud-suud korupsi. Sing suud-suud nyaplok
pis gumi. Sing suud-suud ngeruk pis gelah rakyaté. Pokokné, sing suud-suud AAC.
Artinné : Apa Ada Celepang.
Gagéndong
madasi, gagéndong malipstik, seken ya ada? Jalan alihin bareng-bareng. Da
joh-joh. Alih sig déwék iragané suang-suang. Dadi kéto? Yén alih dija-dija,
satunggal anak madasi utawi malipstik bakat adanin gagéndong ané silib-silib
tur pongah juari ngidih jabatan. Aa yén saja? Di singé? Sing buungan kena pasal
pencemaran nama baik di pengadilan. Jalan alih sig déwék iragané
suang-suang. Dumadak énggal tepuk.
No comments