Satuan Ati (1)

Olih: Agus Sutrarama

Gagambaran Wayan Jengki Sunarta

Tan ja suud-suud. Uli kapertama dosén mata kuliah Tour Guiding-né nyambatang di tengah kelas yén program minggu depan tuah Dénpasar City Tour, kletug jantung ipunné makerug tan parérénan. Kelasé kadum dadi duang kelompok, lakaran magilir dadi guide-né lan dadi tourist-né. Ipun tuara sanget ngenehang sangkaning apa dadi ia bisa girang gargita kakéto, ané penting jani suba lakar kapraktekang téori di kelasé.

“Nada.”

Degg.

Mara ja ipun mancitan uli tegakanné lan lakar pesu uli bus kampusé, sagétan suara ento ngentenin ipun.

“Buku kamu...”

“Oh, makasi Ra..” Kala téjaning mata mapapas, miik angkihné tan buungan mentas, agigis guat kenyem suba nyidayang anggon bekel. Svarra, luh né mirib dadi keranan ketug jantungné Nada dadi ngarudug tan suud-suud.

Hyang Raditya mungahang kawisésan Ida baan cahyané meliah buka mastikayang sakancan murip molihang paica turin nyidayang cedang ningalin, patra-patra utama wawangunan maha carita ngiterin para mahasisya Kampus Pariwisata Bali, semeng nyaluk tengai ento.

“Baik, anak-anak, sési Dénpasar City Tour kita mulai dari sini, Taman Budaya atau lebih dikenal sebagai Art Centre. Silakan kelompok satu memulai, dan kelompok dua bersiap sebagai tourist dengan pertanyaan-pertanyaannya. Let’s practice your English and your knowledge as a Profesional Tour Guide…” Ibu Surni, dosén mata kuliah Guiding mungkah papelajahanné.

Ari Kusuma, ketua kelas B lan ané milu dadi grup guide kala ento majalan kamalu, ipun makenyem ningalin makejang,

“Good morning ladies and gentlemen. Profesor Mantra started a great project in 1969, a palace of Balinese arts and cultures, it’s called Werdhi Budaya, here, now we know as Art Centre..” Nada makenyem ningalin Ari, kéto masih timpal-timpalné makejang, para calon guide. Nada percaya yan iraga urati ngajak sejarah, tuara ja lakar dadi calon guide Bali né andel dogénan, lén ento mula iraga ané beneh kacagerang dadi duta budaya Baliné.

Duta budaya, sang pradnyan ané nawang carita sahananing kriya, boya ja tuah bisa nyaurin baan kruna ‘nak mula kéto’. Tusing ja masih carita kakarangan padidi, kéwala makejang carita ento patut madasar baan sumber né nyidang kapertanggungjawabang. Sajan mula penting tau filsafatné, kéwala tetep lebih penting yan makejang filsafat ento, saja!

“This is Ardha Candra…” Mira, ngendih paningalanné kala nujuhang ikon Art Centre-é ento. Nada manggutan, desir semilir nedehang ingetanné tiban-tibanan ipidan, duk SMP, ipun milu dadi sekaa gong kebyar anak-anak ngawakilin kabupaténné, ditu di sisi kaja kalanganné, kala lampu soroté nujah, lan andup panyiuan panontonné ngentenin, ngisinin abesik ipian ipunné.

Nada, Gdé Nada Aksara wit né tuara ja nawang yan lakaran makuliah di Jurusan Pariwisata. Dugas ipun SD, kala makejang sisyané katakonin unduk cita-cita baan guruné, ipun inget nyambatang cita-citané tuah guru lan seniman, hah, kija ya lakun yéh membah, bapak ipunné magaginan guru. Yan unduk seni, utamané sasolahan, mirib ipun ngarasaang rasa ané malénan, rasa gargita ané mabunga api yén tuturang, kala maan andupan nuju kapertama masolah ngayah duk piodalan di pura, kanti lantas neket dademenanné di widang kasenian. Setata kaajumang baan guru seni tariné ulian koné demen ningalin agem ipunné ngenah seken, kéto masih nuju di kelas seni menabuh, pelatihné nyumbungang ipun di aep timpal-timpalné makejang, koné apang cara Nada, becat nangkep gending. Duh, SMKI, marawat-rawat di muncuk matan ipunne, dadi tatujon ipun satamat SMP. Buka dot nyaingin kabisan Bapakné ané taén masih ngecapin sekolah menengah kesenian ento ané ipidan maadan KOKAR. Kéwala.

“SMA Taruna nak alih! Apang terbuka wawasan kamu-é.” Kéto ipidan taén abesik guru SMP-né ngomong tekén ipun. Guru ané sakancan tutur lan tingkah ipunné setata dadi gagisian nuluh titi di idupné Nada. Yén kénkén kadén, tutur guruné dugas ento tusing enyak dadi ‘tis’ di atinné, tusing enyak dadi ‘wicaksana’ nuju ibah tatimbanganné lakar nentuang kija nugtugang masekolah. Nguda mesti SMA Taruna? Tusingké i guru ngeh ngajak préstasi ipunné di widang kesenian? Apaké i guru masih nyampahin yan seken masekolah di kesenian ento mani puanné lakaran tusing nyanjiang apa? Apang terbuka koné wawasané! Hah, Nada tuara ngelah dukungan, apa mirib masih ulian préstasiné di widang kesenian, ngamilunin lomba mapupuh, maca puisi, ngalukis, ngigel, lan siduri dadi duta kabupatén ring lomba gong kebyar anak-anak ento tuah biasa? Tuara ja madan prestasi ané nadiang anaké di samping nundén apang ia ngelanjutang ka SMKI? Nada dot ada anak ané nukung ia lakar nuju cita-citané dadi seniman.

“SMA gén nak alih..” Kéto macepol munyin ibunné Nada dugas ento. Buin cepok Nada tuara maan kendel, ibunné padidi jani nundén apang ia milih ngalanjutang ka SMA, buka penyaur rasa ragu ipun ané taén maan nyambatang unduk nentuang apaké musti ngalih SMKI apaké SMA. Ipun jelas nawang uling kendel ibunné kala ada anak ngortaang kéto masih ngajumang i pianak dikala péntas masolah, lan kéto masih dugas katonton panyiuan anak di Art Centre.

I Bapak, ané nginspirasi ipun ngelah rasa tresna kapining seni ento, mamolos, “Nah, di SMA masih ada ékstra kesenian..” Atumbegan tanah suba kaurugang, ka tengahing bolongan sema, nanem cita-citanné, makejang??

“Nada.” Makesiab Nada, kala suaranné Mira ngentenang baan kenyem bungah calon guide professional, nundunin yan jani suba duman paletné Nada lakar nugtugang ngatehang tamiuné napakin paileh Taman Budayané. Téjané numpel di ubun-ubun, Nada nyunggiang kenyung,

“Spirit is immortal, and today we’re lucky to be able to learn those all great spirits inside. Ladies and Gentlemen, we are entering Mahudara Mandara Giri Buana Art Museum..” Kala ento tan panyelapan ipun ningalin Svarra, abesik rambutné neket di tipis bibih ipunné, ngarenyi.

Mahudara Mandara Giri Buana, adan lan jaegné sajan adung. Undagan tegeh, ukiran Hyang Naga di kiwa lan tengenné, buka ngingetang iraga dikala napak undag Penataran Agung Pura Besakihé.

Bapak, yang jani dini, di tongos ipidan Bapak ngalih pangupa jiwa

Ketug jantung Nada ngansan ngerasang, ngejer rasa bibihné kala ngemikang English Guiding-né, ngarasayang jiwatman ipunné jani kadedehang baan sang jiwa nguda ia i bapak, ané ipidan dugas enu truna maan ngalih bekel masuk ipunné dini, nyaga pameran di Gedung Museumé.

“Pidan ditu Bapak nyaga paméran, di Gedung Mahudara adanné, apang ada ngentugin bekel masuk ngalih S1, apang sing bas baat blin bapaké, Bapa Mané miyanin, haha, kéwala sajan kéweh magaé misi masuk, kenyelé ngaé kiap di kelasé, bapak lantas suud masuk, apang seken nyidang magaé dogén..” Kéto buin Nada inget kén satuan bapakné taén ipidan.

“Alit!” Suaranné Svarra ngaé makejang makipekan.

“Kenapa to?” Ari Kusuma nyagjagin.

“Alit, Ri..” Sautné Svarra masuara jejeh, ngisiang Alit peluhné nyrétcét di gelutanné Svarra.

Alit kenyelan, sinah ia maksaang raga ngamilunin program City Tour-é ené, ulian maan gelem lan kondén pulih kondisiné, mimbuh semeng né ia tuara sarapan.

“Makasi, Arra..” Munyinné Alit adéng lemet kapining Svarra ané negak di sampingné, di tengah bisé jani. Svarra setata satya nampingin, li tunian, li sekat ipun kadakep baan Svarra kala masriut nagih pungkat di tengah museumé.

“Mm, minum Coco Water nih Lit..” Svarra ngenjuhin Alit minuman sari kelapa.

“Makasi..”

“Alit, jajak roti lembut, maem naé bedik nah..” Mira masih milu ngenjuhin.

“Suksma ya Mir..”

“Éh, Mira.. nih, bang jep Alit permén…” Munyinné Ari Kusuma, sang ketua kelasné negak di samping supiré.

“Thanks Ri,” abetné Alit tuara nyidang baas keras.

“Okéh, teman-teman.. untuk menghibur Alit, dengan penuh ketulusan ijinkan saya menyanyi dangduttt… DJ Ari.. tolong musiknya, please…”

“Okeh, siap Inul dara Arra….!!”

“Assyikk.. Arra magending, digoyang…” Munyinné I Gobér né negak di duri, nylengking.

Svarra, haha, jani ipun majujuk ngisiang mic-é, makiré lakar magending, ngaé Alit di sampingné nakep bibihné, buka nyaruang kedékné, baan polah timpal di sampingné ento.

Jurusan Perjalanan Wisata kelas B, buka ngaénang Nada engsap ngajak telung tiban rasa gabeng ukudanné nyalanin sekolah SMA-né. Telung tiban ané baat kala inget suba ngalébang ipianné serius niti jalur seniman. Telung tiban ané nemuang ipun ngajak akesitan sisin sigin sentir jiwatmanné, sastra. Adaké rasa raguné ipidan ento kaubadin abedik ulian payu nuntun ka sakolahan ané nyidayang kabéanin baan béasiswa ipun, ngisinin dademenan ipun ngajak sastra lan basa Inggris lan mesuang cita-cita anyar ipunné, profesional guide in Bali. Ramia di tengah bisé, buka Alit engsap ngajak gelemné. Svarra magending girang, buka adan ipunné, sajan ngelangenin yén magending. Adaké ané lénan aluh ngaénang muaniné ngulayang, tuah manis kenyem gigi gingsul ipunné. Acepok pindo paliat ipunné jak dadua mapapas tan panyelapan. Nada ngalébang ketug ipunné ané ngansan sing karwan kasisi, ka linggah Tukad Badungé membah, di sisin jalan Imam Bonjol nuju By Pass-é. Yéhné sajan tuara nyidang kasambatang cedang, nganyudang sakabesik carita, lan carita, nuju muara ané mula tondén madan jelas. (masambung...)

Agus Sutrarama
magenah ring Tabanan. Kakawiannyané naanin kawedar ring Bali Orti Sampun ngamedalang cakepan pupulan satua cutet “Bulan Satwak”.