Ngantosang Matan Ai
Olih: Rambut Kristinta
 |
| Gagambaran Wayan Jengki Sunarta |
Leguné galak nyegut pipin tiangé.
Kunang-kunang ngambang di duur sirahé mirib ia dot ningehang isin keneh tiang.
Jangkrik ngering saha ngendingang petengé punika di balé bengong. Ngericik
munyin yéh mancur di kolam tiangé miribang lakar nganyudang rasa sebet tiangé.
Bé di kolam tingalin tiang pada macapatan saha ngortaang déwék tiangé ané
padidian di peteng dedeté puniki. Kesiran angin dingin niman kulit tiang.
Sayong nundunin tiang uling lamunan. Lantas bli Gusti ngelut tiang uling duri.
“Luh Tu, ados deriki meneng? Ngiring ka
tengah.” Bli Gusti ngerayu tiang.
“Nggih Bli Gus. Bli Gus dumunan. Tiang
ngunci pintu dumun.” Tiang ngewales sareng kenyeman.
Bli Gusti kurenan tiang sané rajin, ipun
makarya dados pegawai tata usaha ring sekolah menengah atas. Rauh uling sekolah
ipun malih ngerapiang barang dagangan ring toko bangunannyane. Ebokné inggel,
kumisné tipis tur kulitné selem manis. Asliaban mirip cara artis hengki
kurniawan. Bli Gusti anak lanang sané banget tresnain tiang. Sané prasida
sareng ring suka lan duka.
Tiang wantah rabi saking anak sudra. Sané
mangkin dados Jro Putu iriki. Sabilang wai tiang nyaga bisnis Bli Gusti ting
toko bangunan. Dumunan tiang makarya ring hotel bintang lima ring Kuta,
sakewala tiang dot ngewantu Bli Gusti ring toko apang tiang prasida nguwangun
bisnis sareng-sareng buina meweh pesan ngrereh pegawai jujur. Ipidan sampun
dadua pegawainé kena PHK ulian tusing jujur pas nyaga toko. Ulian punika tiang
ngurus toko padidian dipété libur, Bli Gusti nyarengin.
Uusan ngunci pintu gerbang, tiang negak
di kamar tamu sareng Bli Gusti mabalih film favorit cara dugasé nu bajang.
Sagét suba jam dasa peteng. Panyingakan tiang sampun kiap. Matuan tiang teka
uling kamarnyané lakar nyemak yéh anget. Ten wénten ujan, ten wénten angin,
biang ngeraos.
“Panak gaé kan luung. Pragat mabalih
film engkénang nyak ngelah panak.” Biang ngeraos tur majalan ka kamar.
Tiang lan Bli Gus buka jangrik kapacek.
Saling sledétin tur tusing ngeraos napi. Lantas tiang lan Bli Gus ka kamar. Bli
Gus matakon tekén tiang.
“Luh Tu, maan ada tamu melali?”
“Dibi wénten timpalné biang bli, Bu Jro
Jepun. Wénten napi Bli Gus?” tiang ngalanturang matakén.
“Suba kudang tahun biang ajak bareng,
biang tingalin bli berubah. Cara wénten anak ngomporin ulian bli ajak luh
durung madué oka.”
“Bli Gus sabar. Biang mungkin suba edot
pesan ngembu cucu. Cara timpal-timpal arisané liunan sampun ngempu cucu. Bli
sabar tur lan nunas ica sareng-sareng dumogi Ida mapaica”.
Bli Gusti makenyem tur ngusap sirah
tiang. Sujatiné penyingakanné tusing prasida ngidem.
Benjanganné jam 08.00 semeng tiang
sampun uusan makarya masakan, umah sampun bersih, bekel Bli Gus sampun sayaga.
Bli Gus majalan makarya. Tiang muka pintu toko, sagét sampun wénten pelanggan
di arep tokoné.
“Om Swastyastu gék, numas napi?”
“Om Swastyastu, tiang nénten matumbasan
nika. Tiang jagi ngrereh Bu Jro Sekar. Wénten Bu Jro nggih?”
“Oh, ngrereh biang. Ngiring ngeranjing.
Deriki malingih, tiang ngrereh biang dumun.”
Tiang penasaran tekén anak bajang
punika, nanging tiang ten bani matakén sareng biang. Tiang ngelantur ngerapiang
toko tur mabanten canang sari. Sampun wénten a jam biang ngeraos sareng anak
bajang punika. Dapetang tiang suba atehina ka toko.
“Gék numas napi?” Patakon tiang santukan
ipun macelep ka toko.
“Mulai mangkin Manik magaé dini di toko
Tu, nulungin Luh Tu apang wénten sané nyarengin.” Lamun nika biang nyautin tiang.
Ngelantur ngipekin nak bajang punika
sané mawasta Manik. Tiang merasa wénten sané maelénan. Miribang biang wénten
sané engkebanga. Nanging tiang meneng manten, apang ten mauyutan. Lantas Manik
orahin tiang ngerapiang barang-barang di toko sakadi, balon, baut, cat lan sané
tiosan. Tingalin tiang Manik jemet nyemak gegaén, sakewala tiang tusing bani
matakén uling dija tur ring dija meneng.
Motorné Bli Gusti dingeh tiang sampun
magerung di parkir. Tiang kari mabersih ring toko santukan sampun sanja. Bli
Gusti sakadi biasanné, neked di puri tusing ja masalin pakaian nanging nelokin
tokonnyané.
“Luh Tu, punapi lancar di toko? Pasti
sampun kenjel niki.” Bli Gusti nampekin tiang sambil ngusap-usap sirah tiang.
“Lumayan nika Bli Gus. Ten kenjel tiang.”
Tiang ngewales.
Uling di rak kayuné tingalin tiang Manik
nyingakin tiang sareng Bli Gusti. Nanging Manik mapi-mapi ten nyingakin. Manik
lantas pesu lakar pamitan budal. Bli Gusti bingung nyingakin sagét wénten anak
baru di toko. Bli Gusti penasaran tur nakénin Manik.
“Numas napi Gék?”
“Ten Pak, em.. tiang.” Durung uusan
ngewales petakén Bli Gusti, biang sagét rauh saking pintuné duri.
“Né Manik, keponakan timpal biang. Uling
jani dini magaé di toko marengin Luh Tu.”
“Oh, nggih biang. Tiang ka belakang
dumun.” Bli Gusti masaut sambilanga majalan.
“Tiang pamit dumun bu.” Manik gagésoan
nyemak tas tur majalan muliha.
Biang ka puri nénten ngeraos napi. Tiang
nutup pintu toko lantas mulih. Kenjel sampun awai ngayahin langganan aget
wénten sané nulungin. Tiang majalan sambil ngemel nota tur penghasilan dina né
sané mangkin lakar icen Bli Gusti. Wawu neked ring arep pintu, dingeh tiang
biang lan Bli Gusti maraosan. Tiang meneng sambil mirengang napi sujatinné
raosanga.
“Biang ngajak pegawai baru ka toko dados
ten ngorahang ngajak tiang? Sampun lali biang, indik ipidan toko sampun
kamalingan tur katipu olih pegawai sané ten jujur?”
“Jani biang jamin tusing lakar kéto
malih. Manik ento keponakan timpal biang. Mara sajan tamat kuliah administrasi,
nanging ipun tusing demen merantau joh. Timpal biang ngidih gaé kan baang
biang.”
“Patutné biang matimbangan dumun sareng
tiang, ajak Luh Tu masih biang nénten wénten ngeraos napi.”
“Suud suba ngitungang Luh Tu, ané tusing
ngemaang biang cucu nganti suba limang tiban to.”
“Boya ja Luh Tu ngelah pelihé, ti….”
Durung uusan ngewales biang, tiang teka ngambil tangan bli Gusti tur mapi-mapi
wénten telpun penting.
“Bli Gus ampura niki wénten telpun
penting uling supplier barang dagangan.” Tiang lan bli Gus langsung ka kamar.
Bli Gusti ngelut tiang tekek. Nganti
kerasa sesek tangkah tiangé. Tiang ngerti teken rasa sané karasayang Bli Gus.
Suba limang tiban nyalanang grhasta, nanging durung kapaica anak alit.
Sampun telu bulan magae di toko. Biang
mabaos sareng Bli Gusti, nikanga ngerereh anak luh elénan. Tusing ejoh-ejoh.
Bli Gusti nikanga nyuang Manik. Sesek tangkah tiangé mireng raos biang.
“Gus, jani biang ngidih apang Gus nyuang
Manik. Manik nak bajang jemet, polos tur seleg ngalih gagaén. Manik keponakan
timpal biang. Tusing buin ragu suba pasti lakar ngemaang keturunan. Tusing cara
kurenan Gusé, kayang jani tusing ngemaang keturunan.” Biang ngeraos sada keras.
“Biang, tiang sareng Luh Tu boya ja
nenten wénten utsaha. Biang terus nyalahin Luh Tu. Nanging suba kudang dokter
sané rauhin, ngecék kondisi tiang sareng Luh Tu. Samian dokter sampun mabaos
yéning tiang sané bermasalah. Tiang polih ngorain Luh Tu mulih. Nanging Luh Tu
tan prasida. Tresnan ipun seken tekén tiang.”
Biang tengkejut, ngisiang tangkah tur
nyelempoh mirengang indik sané nibenin Bli Gusti. Sampun sué biang melihang
tiang sawiréh durung kapaica anak alit, nangih tiang ngengkebang tekén Bli
Gusti apang nénten mauyutan. Biang nénten prasida ngeraos malih. Lantas gelut tiang
biang apang biang tenang.
“Biang tiang sareng Bli Gus lakar ngantosang matan ai, yadiastun meweh, tiang lakar ngantos. Dumogi matan ai punika rauh yadiastun nénten buah basang tiang.”
Singaraja, 20 Januari 2021
maduwé aran sujati Ni Wayan Kristina. Embas warsa 1991 ring Gianyar, mangkin makarya dados guru Bahasa Inggris sekolah pariwisata ring Singaraja. Seneng malajah nulis puisi anggén nyelimurang manah rikala enek tangkah.
No comments