Puisi-puisi I Wayan Redika; Réklama ring Margi Agung

Sumber Gagambaran: o-s-a-k-a.tumblr.com

Réklama ring Margi Agung

 

/i

“lanjaran sampuna

mapuhara mar ring peparu

lingga mati tan paguna”

 

sekadi pituduh

saking pantaraning sunia

sastra mahurip kesurat

nyaga raga éling ring angga

 

ring margi agung jajar mangulapin

nyanggra sekatah sang mamargi

ngalam-alam makenyem mapiolas

nudut niténin pekayunan

 

nanging

mawetu tan éling ring lanjaran

mapuhara mar lingga tan paguna

 

/ii

nancep mépét sisi kaja kantor gubernur

réklame mawarna selem jimbar tur sangar

magambar anak siteng matato macan galak

aéng, nakutin gumi mirip jagal ngamah api

briuk siu mapi sakti tabeng wijang gumi bali

tan kémad, sagét masiat sareng semeton

 

lek, lek pisan manah déwéké

mawastu jerih jagi pesu mulih

rumasa satya sampun capuh

antuk tabuh ngedah péndah

 

/iii

“ki ageng nambanin sakancan sungkan

malarapan tirta hayu saking gigir bukit”

 

duh déwata agung

puniki wénten manusa mapi pradnyan

ngangken utusan dewa mapaica tamba

asing ketiwakin tamba seger sadya rahayu

sawatek lara sidha mapulih égar sumingar

 

paket asasih tan dados kirang taur ring ajeng

limang yuta limangatus séket jinah tegep sari

mata gosok matané pastika ilang pawasan

 

/iv

pilih tityang ring galahé mangkin

jadma jujur seneng madana punia

setata dabdab angawé sukaning lén

propaganda politik

ngejengit magigi emas

pedas pongah nyéwaka

nyakupang tangan

welas ugi mangda kasudi kapakusara

dados wakil krama saking pitung désa

tan péndah gegéndong mapayas agung

ngajum déwék, ngura janji melajah bogbog

nungkalik ring jati awak belog sesai punyah

ngutah mebo lintah matandang bungah

 

réklame ring margi agung makalukan

genahnyané sambrag tan manut perarem

mategep gatra akéh sané maparna corah

 

;

tan pikanten murdaning gumi amukti trepti

nguratinin makardi resik palemahan agung

éling ring sajeroning angga

munyi manis muponin pahit

ngeh maring dharma sesana

tan lali ring pedharman

 

 

 

Gegéndong Main Gitar

 

rauh ring pahempatan margi sanur

anak istri katon makidung muceh sepi

majujuk nampek ring ban truké gedé

sambil ngejengit nnadahang tangan

pengodal gending régé ala bob marléy

gegéndong dekil main gitar

nyelimbar ring lampu merah

sekadi masolah gagésonan nutug endih

lampu pengatur margi matimbal gadang

rikala montoré jagi mesat nunut tatujon

lanang dekil punika makakeb nyelek bayu

gitaryané benyah lilig montor lemousin

natah tanah dénpasar

masuuk antuk gegéndong

 

 

 

Sunia Suwung Mangmung

kadaut antuk gatra layu

nemonin sasih kasa jagi mamargi

nuut rurung nyuwun suratan karma

banban benang kangin nyujur kubu

suwung mangmung

 

nénten maduluran antuk japa mudra

tan kaweweh antuk mantra tan matra

mapamit ring guna pakemit gunakaya

wisaya sekala napkala rauhing niskala

patapan suwung mangmung

;

waneng sasangi duké rihin ngayat ngastawa

luwas mapegat tuwas mogi lawas tan matilar

mantuk matemu rasa nindihin pakardi

 

kebanda antuk belog dama tuna tatwa

tan hidep ring artos wangsit panutug mati

risampun tengah wengi kajeng kliwon buda

tan katemu sasuluh langit tampak pamargi

sunia suwung mangmung

 

 

 

Perapén ring Manah

 

perapen ring manah

upinin mangda pastika

ngendih nyuluhin sunia

nakti bakti mapuja genta

wak bajra ring shiwadrawa

 

pasupati

taksu ring raga nyanyap landep

rauhing jejeleg lawat mati raga

mentas nyaluk taksu dasakshara

nangiang perapén ring manah

 

japituwi matemu ring margi

anak sugih ngastawa ring sekaya

montor masaput songkét sutra

canang sategep maprani agung

mesin natab banten sarwa phala

bé guling nomor satu saking ubud

becik sekadi branangan pikanten

 

padupaan telenging kayun

ilihin antuk tatwa kadharman

mangda setata masepuh sari

 

landep nyanyap

ririhé magenah ring pabaan

janten tan katemu selehin

ring mesin montoré