Janda Bolong Tukar Avansa, Mau?

Olih: I Gusti Lanang Sutéja Narendra

Sumber Gagambaran: id.pinterest.com

Ada mobil avansa marérén di malun umah tiangé. Ané nyupir tuun, nolih nolih umah, pakarangan muah tanaman hias ané di natah tiangé. Telektekanga saka besik, lantas ngandeg di tanaman janda bolongé. Ia anggut-anggut cihna demen nolih tanaman tiangé.

Ibi tiang mamaca di pisbuk, ada anak nyilurin tanaman hias aji montor avansa. Béh... Jani mirib gantina tiang lakar maan pasilur montor avansa.

“Durusang cingak-cingakin Pak. Wantah wénten cumpu, tiang siap nukarang sareng avansa.” Ajér pesan tiang nyapa. Anaké ento makenyem masaut manis.

“Kentén sampun maksud tiangé Pak!”

Mbééé... Nagih makecos papusuhé mireng pasaut anaké ento.

“Sané kén kayunang, Pak? Rarisang!”

“Makasami!”

Mimih... Makejang tagiha. Nah... Lakar baang. Kadung kayang potné, kadung kanti punyan kelampuaké jangkaha lakar baang. Apang nyidang ngelah avansa, lakar anggo nganggurin Dik Stévy. Sing misi nawahin, tiang masaut semangat pesaja.

“Gih, Pak! Ambil ampun sami. Silurang sareng avansané. Hhhmmmm... avansa tahun kuda duéné?”

Anaké ento nyautin, agolné mrekak gigis, “Avansa keluaran terbaru nike, Pak. Mara ibi jemak tiang di déler!”

Piiih... Sayan lega kenehé. Suba ngenah-ngenah asané Dik Stévy nyalédoh di samping tiangé nyupir.

“Gih... Dil Pak. Tiang setuju!” Masaut tiang kadroponan, jejeh yening anaké ento mabalik itungané.

Ia mendep. Toliha makejang bilang bucu. Apakpakan basé ia ngaraos.

“Kudang are pekarangan duéné, Pak? Indayang icén tiang nolih sertifikatné!”

Mbééé... Celekotokané... Kadén nak janda bolongé tagiha... Pekarangané tagiha nyilurin.

(Macang Rumah Cinta Seribu Jendela)