Puisi-puisi Ni Putu Artiasih; Janji Manis Ngamanesin

Sumber: id.pinterest.com

Jro Ketut

 

Jro Ketut …

Napi sujatiné kaalih

Napiké wantah pipis lebih

Sing ngarasa pelih

Sing takut sing jerih

Kipak-kipek tolah-tolih

Ngalih selah ngaku tindih

Kasa-kisi laut korupsi malih

Madasar pongah

Nyetir mobil kelas méwah

Yén pesu ngenah méwah

Tusing nyak kalah

Jeléké saputin bungah

Bungah ngenah melah

Ané melah pang ngenah

Jeléké engkebang di tengah

 

 

Janji Manis Ngamanesin

 

Baliho spanduk makenyem manis

Ngebekin rurung madérét mabaris

Masimakrama ngecik manggis

Mapula janji manis

Tatujoné mamuas ngilis

Gumanti maan tegakan tis

Kantong kembung mobil malengis

Disubané maan tegakan tis

Mecik manggis janji manis

Ten wénten janji sané manis

Ni Putu Artiasih
embas ring Pempatan, 26 Januari 1998, dados mahasisia ring Prodi Pendidikan Bahasa Bali, STKIP Agama Hindu Amlapura.