Lawat-lawat; Sarin Sirah

Olih: IGA Darma Putra

Sumber Gagambaran; id.pinterest.com

Cara majalané, pasti iraga taén élah, pasti taén likad. Di aluhé iraga ngidang majalan becat, kanti tusing rungu tekén tindakan. Wiréh tusing rungu, bisa di jalané elah ento iraga katanjung. Di jalané likad iraga melah pesan nindakang batis, kanti grapa-grépé ngalih pangancan. Éngkén ja caranné apang iraga selamet, apang neked. Cutetné sing dadi iraga bes ampah yén majalan. Likad élah pada-pada misi sengkala ajak rahayu.

Majalan ajak mamunyi masih patuh apang plapan. Suba liu ada wimba di shastra, pelih baan mamunyi bisa iraga kena sengkala. Sengkala totonan bisa ngaminin, kanteg nyama-nyama ane sing nawang unduk bareng ajak sengkala. I Nyoman Karang di satuan Basuré masih keto ngemang panglémék. Éngkén ja carané apang iraga tiaga ngaba munyi. Ngaba munyi bas mudah sing luung, ulian munyiné mudah ento liu anak tersinggung. Nak sing tawang apa ané ada di tengahan basang anaké. Bisa misi nasi, bisa masih tai.

Isin sirah masih tusing tawang. Mulan di sirahé tongos jelé melah magumblengan, campuh dadi besik. Wiwéka anggon milihin apanga bakat saring-sarin sirahé. Mesib cara anak nandusin, melah-melahang milihin apang bakat lengis-lengisné. Lengis ento sari.

Belogé boya tusing ada gunané. Gunan belogé dadi anggon ngarahayuang gumi aji bebelogan. Munyi ané matandalan aji bebelogan, liunan munyi entel misi sari. Artiné sing liu lakar pesu munyi uli bunguté, kéwala ngenén amun kenehé. Pamragat munyi buka kéné, jani suba sing liu bisa ngadokang. Liunan jani saling paliunin mesuang munyi apang ngenah kaduegan ngitukang layah. Makejang ngaba pabeneh ané tusing karoan beneh.

Malajahang raga yén idep-idepang, cara ngalih uyah di pasih. Anak ané jemet dogén ané makatang uyahe ento. Disubané bakat, dadi anggon ngamertanin anak apang nyak ngedénan bayunné. Apang nyak marasa apa ané ajenga. Kéto patapan anak ngalih uyah, sing ja ia dogén lakar makatang. Maan ia selah lakar ngayadnyang kabisan.

Belogé mulan saja mapunya. Akahné nyeluksuk di sirahé kanti tusing ngidang ngenehang magenepan. Akah ento mentik kanti mabunga misi mabuah. Iraga idup musti malajah, idepang cara ngabasin punyan belog ané mentik di sirahé. Buah ajak bunganné abasin kanti telah sakabedik. Sik duri mara iraga ngidang ngebét akahné. Akah belog tuah males.

Kéto mulan patapan anak makeneh, misi ruang musuhin. Nyén ada di guminé nénénan lakar ngidang makeneh keto, sinah ia ané makatang sarin-sarin gumi. Sarin gumi madan boga. Boga saluir ané ngaénang lega bagia. Lega bagia layahé yén suba maan ngajeng ajeng-ajengan ané jaen-jaen. Ukudané lega bagia yén nganggon panganggo ané nyak anut amun kenehé. Kéto masih upastané nyak lega bagia yén maan mesuang smara. Ento madan lega bagia. Lega bagia ané ngilit awak iragané kanti sing ngidang makiba. Makejang ento kasengguh boga.

Ané madan boga sing makejang lakar telah. Manut katuturan para panglingsiré, ada boga ané tusing telah-telah. Boga ané sing pegat-pegat. Bogané ento madan Ananta Boga. Ananta artiné sing pegat-pegat, sing telah-telah. Bogané ené koné ané ngaraksa guminé di sapta patala apang tusing benyah latig. Nyén ané makatang boga sing pegat, sinah ia bagia. Bagia len raosné Wisata!

IGA Darma Putra
embas lan magenah ring Bangli. Kakawiannyané kawedar ring makudang-kudang média, minakadi Bali Post, Pos Bali, Tatkala.co, Suara Saking Bali, miwah sané lianan.