Krisdayanti vs Aurel, Ngudiang I Déwék Nguél?

Olih: I Gusti Lanang Sutéja Naréndra

Sumber Potrekan; www.liputan6.com

“Tidakkah ada tontonan, atau berita lain yang lebih berkelas, lebih berbobot, lebih menarik, lebih mendidik, selain tentang masalah Krisdayanti dan Aurel? Piiiih.... Nyai ai kyu jongkok! Bagaikan katak dalam tempurung! Gaok nepukin urusan anak lénan!”

Piiih... Yan Saplag sagét bermatbat, brangti tan kadi-kadi dugasé nepukin kurenané nuléngék acara infotainment di tiviné. Rémot tiviné perengkahina, lantas ngalih chanel lénan. Kurenané sing nawang unduk, bingung kisap kisap matakon.

“Nak kénkén né? Ngujang Bli ber sagét matbat? Apa masalahné?”

Nyangetang buin Yan Saplag matbat, “Ento, masalah Krisdayanti!”

“Kenapa Krisdayanti?” Kurenané nyansan bingung.

Yan Saplag nyedot angkihan lantang pesaja, lantas ngaraos.

“Kéné kawitné ento. I malu, Anang Hermansyah makurenan ngajak Krisdayanti. Ngelah pianak dadua, Aurél tekén Azriél. Lantas Krisdayanti mamitra ngajak Raul Lémos...”

“Mimih... Mimih....” kurenané klemah klemih dogénan.

“Pamragatné Krisdayanti cerai ngajak Anang Hermansyah. Laut ngantén ajaka mitrané I Raul Lémos.”

“Terus?”

“Piiih... Pedalem Anang Hermansyah nyakit ati kalahin kurenan sayang. Ia dahat kelara-lara, frustrasi berat!” Mbééé... Yan Saplag ngawirasayang pesaja nutur, kanti misi nekep tangkah yéh paningalané ngembeng-ngembeng. Pang gondong buka ia ané dadi Anang Hermansyah.

“Terus?” kurenané ber begbeg ma”terus” dogénan. Yén isinin ngupin empringan apang berek buka tukang parkiré di peken.

Buin Yan Saplag nutur.

“Lantas Anang Hermansyah matemu Ashanty. Ditu mara presida uas tatu kenehné, wiréh Ashanty ané nyidang dadi kurenan sujati, dadi mémé buat Aurél lan Azriél.” Jani Yan Saplag nutur sambil makenyem.

“Terus?”

“Dugasé nénénan, Aurél nga chat Krisdayanti, nagih apang sida matemu, tusing walesa. Lantas pianak kalawan mémé matungkas di médsos. Ento ngeranayang dadi biuta buka jani. Nyén pelihang? Bes pianak buah basang, pastika kangen tekén mémé. Celekotokané I Raul Lémos, ber brangti. Sahasa matbat pianak kualoné. Piiih...pang gondong Bli gedeg nepukin anak muani buka kéto. Suba mémén anaké juang, jani misi matbat! Makita Bli ngalawan mapuntel I Raul Lémos!” Kadirasa ngendih paningalané Yan Saplag kabatek gedeg basangné ngorta. Mirib ia buka wirang tekén I Aurél!

Kurenané nuléngék....pabaliha muan muaniné ané baag nangges gedeg basang.

“Kéto ceritané, Bli?”

“Ae!”

“Piih... lengkap panawang Bliné. Icang sing nawang apa-apa. Nyén ngorahin?”

“Mabalih di tiviné, mamaca berita di pisbuk, portal beritané makejang nuturang unduk ento. Masa Nyai sing nawang? Ish.. Ish...katrok Nyai!”

Sing ada ujan sing ada angin, sagét kurenané brangti ngapi! Mabalik jani ia ané marebutin rémot tiviné sada pantiganga!

“Tidakkah ada tontonan, atau berita lain yang lebih berkelas, lebih berbobot, lebih menarik, lebih mendidik, selain tentang masalah Krisdayanti dan Aurel? Piiiih.... Bli mula ai kyu jongkok! Bagaikan katak dalam tempurung! Gaok nepukin urusan anak lénan! Cuiiih... Celekotokan bané!”

Yan Saplag makesiab, kamemegan ia masaut pegat-pegat, “Sing ja kéto Luh... anu... a... a... anu... nak... anu...”

Kenyanya-kenyunyu raosné tuara maunduk, kabilbil laut nyaru ngenjit roko... Béh potokané i puan buin lipetina!

(Macang Rumah Cinta Seribu Jendela)