Puisi-puisi Ni Luh Putu Puspita Agustini; Manyantos Sang Raré
 |
| Sumber Gagambaran; id.pinterest.com |
Manyantos Sang
Raré
Ring dija I Déwa Ning?
Kadi ya I Bojong ngantosang ulung ya I Bulan Ibu,
Ning
Paketéltél paes ibuné
Doté suba kaliwat..
Gelis idéwa rauh Ning…
Mriki ring pabinan ibuné meneng…
Peteng lemah, sedih kingking
Megaleng-galeng yéh mata
Sampun sué ibu nyantos sapengrauh idéwané ning
Mailehan suba ibu ngruruh idéwa, nanging tuara tepuk
Mailehan suba ibu matakon, nanging tanpa gatra
Dija idéwa ning?
Gelis idéwa rauh
Apang suud ibu tuyuh
Yan sampun idéwa dini lakar gendingang ibu
pupuh-pupuh
Sabilang wai lakar sayagayang ibu bubuh
Lakar jaga ibu pang ten idéwa kanti labuh
Gelis idéwa rauh Ning….
Ibu Rindu……..
Anggara, Pon, Langkir
14/11/2017
Semara Ratih P.A
Rerama
Mémé sané banget tresnain
Bapa taler sane sayangan
Dahat tuna ya titiang manados pianak
Tambeté kalintang….
Kadi ya anak buta, nénten nyingakin napi
Kadi ya anak bongol, tuara bisa ningeh
Kadi ya anak lumpuh, tusing ngidang majalan
Lekadé ka gumi malalung, tuara mabekel apa
Mémé lan Bapa satmaka reraman titiang tuyuhé
kalintang
Mémé megantung bok akatih nglekadang titiang
Kekantenang bocok ring anaké siosan, santukan waduké
ritatkala mobotang titiang
Nanging, tan ja mrasa sebet, santukan Mémé merasa
bagia ring kawéntenan titiang
Bapa sané tuyuh ngrereh pangupajiwa anggén kauripan
titiangé
Mangkin, napi sané sida aturang titiang anggén
ngwales punika?
Kadirasa angkian titiangé katur tuara ja nyidang
masaih
Tekéning napi sané sampun picayang Mémé lan Bapa
ring padéwékan titiang
Asapunika sayang I Rerama maring I Tuna puniki
Diastun makéh kaiwangan titiang, nanging nénten
ngawé sungsut ring manah
Ampurayang titiang Mémé lan bapa
Sasidan titiang subakti ring linggih Sang Rerama
meraga Guru Rupaka
Astungkara stata bakti, stata satinut maring bebaosé
Nénten tulad napi malih alpaca
Riantukan I Rerama satmaka angkihan I Pianak
Wrehaspati, Kliwon, Langkir
16/11/17
Semara Ratih P.A
Ibu
Angkianné ngangsur..
Getihé ngecor…
Tur ngetelang yeh mata
Kadirasa pacing megatin angkihan
Ngembasang titiang I Jadma Tuna
Sayangé tan patandingang
Tresnané tan pasaihang
Kadirasa melalung, makenta, tusing kenapa
Sané utama wantah titiang, satmaka ipianak
Munyiné stata nglangenin, ngawé rindu
Tuturné satmaka senjata anggén nyalanang kauripan
Ibu………..
Kadirasa nglintangin tambet titiangé
Tan sida ngwales napi sané sampun kapica
Ibu boya ja mekelin titiang kasugihan idup di guminé
Kaweruhan sané kapica puniki, satmaka bekel titiang
sané nénten telas nyantos kawekasan
Ibu………….
Wantah suksma sané sida aturang titiang
Stata ngrastiti ngaturang bakti
Mangda Ibu stata kénak rahayu lan panjang yusa
Tresna lan sayang ibu kapining titiang lakar aba
titiang kantos titiang mati
Ibu………….
Ampurayang titiang I Tuna
Titiang uning makeh kaiwangan titiang dados pianak
Baktin titiang tan lémpas ring linggih Ibu
Stata tuntun titiang Ibu
Stata élingin titiang
Mangda kawekas sida titiang dados ibu sekadi ibu
Sukra Umanis Merakih
22/12/2017
Semara Ratih P.A
Semaya Urip
Sedih tanpa pegatan rasayang jani
Nyingakin beli sirep ring baléné
Beli makenyem kerasa bagia
Tur mesaput kasa kuning
Tauké beli tiang sebet?
Tauké beli nu liu janji beliné kén tiang?
Lakar hidup bareng natadin tis panese padaduanan
Beli…..
Sepiné jani rasayang titiang
Tanpa ragan beli, apaké gunané titiang ada di guminé?
Kadi kaputin gulem idup tiangé
Peteng dedet tanpa kenyuman beliné
Jani….
Beli suba bagia dikadituan
Sampun nunggal ring Hyang Kawi
Beli…..
Bakta tresnané beli..
Ajak tiang sareng beli
Jalan bareng-bareng ngerasayang bagiané
Diastunké mamesik ring niskalané
Nak tuah beli ané edotin tiang
Krana, tiang tanpa beli patuh tekéning mati
Wrehaspati Wagé Medangkungan
4/1/2018
Semara Ratih P.A
embas ring Dénpasar tanggal 16 Agustus 1991. Makarya dados Penyuluh Basa Bali sané polih amongan ring Kelurahan Panjer. Puisi sané kakawi puniki kangkat saking pengalaman pribadinnyané.
No comments