Puisi-puisi I Nyoman Sutarjana; Puisi Alit

Sumber Gagambaran; id.pinterest.com

Puisi Alit

Puisi alit saking anak alit

Ngulat kruna sulat salit

Raos makulit nglilit arti

Tusing sulit ngalulut ati

ngulati pangapti

ngruruh kanti

Jejeh

Yén enu jejeh sinah kajajah

yén kajajah kéweh nyujuh

nyujuh sakancan ipian

gedénang bayuné

lawan  jejehé

jujuh pangaptiné

Makecuh

Caah cauh raos nyangluh

Élah aluh ngitukang layah

Sakadi makecuh ka baduur

Krunané cicih ngrananin raga

Sepi

Apa makrana rurungé sepi

Gelar-gelur kraung-kraung

Tusing karungu

Tusing nyama tusing timpal

Tusing rungu

Apa makrana

Ulian lima pepes sing ngisi pipis

Tusing mapipis idupé tan sipi sepi

Ngantos

Uripé ngantos

Galah magentos

Matinggal genah

Magentos angga

Cakupang bhaktiné

Saking puyung nuju puyung

Masuluh

Mula aluh nyuluhin anak

Sakancan berek ngenah élah

Tusing karasa nyuluhin

Ulian banyuné berek

Nanging nyuluhang raga

ngalih lawatan padidi

yén lawatané ngenah jelék

mekané bakat pantigang

I Nyoman Sutarjana
Guru ring SMAN Bali Mandara, nulis puisi anggé sarana ngubadin tatu-tatu tangkah