Album Foto Gus Dé
Olih:
Madé Argawa
![]()
I Madé Argawa
magenah ring Tabanan, mangkin makarya dados wartawan Témpo.
 |
| Sumber Gagambaran; https://pixabay.com |
Dugasé ené, tiang maan
ngeliput paméran seni kontemporer. Téma pamérané tuah menggali ingatan
yang diwujudkan dalam berbagai macam karya seni.
Saderana, indik
ingetan. Dikénkéné, ingetan tuah indik déwék pedidi lan sifatné pribadi. Unduké
totonan tuah nyidaang karasaang lan karawatang pedidi.
Nanging, yéning
ingetané totonan kepesuang laut kadadiang karya seni, suba pasti sanget perlu
lan melah.
Ada masih anaké ané
miara ingetan indik kejadian-kejadian ané taén liwatina utawi asanina lan
kadadiang tulisan, foto wiadin vidéo.
Tulisan, tusing
makejang anaké biasa mupulang kruna-kruna laut kadadiang catetan utawi buku.
Sakadi catetan harian contoné. Sapanawang tiangé, unduké ené suba langah.
Yéning kadadiang foto,
manut tiang ené paling liu kaanggon nyimpen ingetané totonan. Mirib ulian
aluh. Ulian ento, di jumahné liu anaké ngelah album foto anggona
panginget unduk-unduk ané suba liwat. Yéning vidéo, tusing liu ané tepuk
tiang.
Nglimbakné teknologi
lan aluhné ngaksés média sosial, ngaénang liu anaké ngejang ingetan di dunia
maya.
Ngédéngang kahanan
idupné ané paling anyar, mirib jani suba tusing dadi tawah. Dikénkéné, tiang
kanti tusing nyidaang ngaresepang ané kén ranah pribadi utawi privat lan ané
kén masuk ranah publik di média sosial.
Ada ané
ngorahang, save aja di sini (simpen gén dini). Unduké totonan tepukin
tiang rikala ada ané masang foto di facebook. Tiang makeneh-keneh, facebook
ternyata suba nyidaang ngentinin album foto anggon nyimpen kenangan.
Nanging tiang sing bani
ngawag-awag masang foto pribadi di facebook, krana jani (tiang sing nawang apa
istilahné totonan) facebook nyidaang nyocokang muané nyén ané pasang tiang di
sistem facebook. Tiang jejeh tekén sistemné ené.
Rasa jejeh tiangé
totonan ulian sistemé ené nyidaang nawang muan tiangé, tuah uli foto ané pasang
tiang setondéné.
Tiang ngelah catetan
minor indik facebook, ngenénin indik skandal data warsa 2014. Kasusé ené
ngaénang biur krana data facebook bocor lan kaanggon olih politisiné ngalih
suara lebihan.
Ulian ento facebook
kena denda kanti 5 miliar dollar AS. Dendané ené tuah ané paling gedé yén
tingalin uli sejarah Komisi Perdagangan Federal AS utawi FTC.
Mula saja iraga ané nganggon
facebook tusing marasa rugi ulian kasusé totonan, nanging ada anak lén ané maan
keuntungan. Lan jelékné, iraga tusing nawang unduké totonan (setondéné ada ané
nawang).
Yasraf (2004, 63)
ngorahang yéning jani iraga suba ngalahin dunia réalitas. Dunia réalitas suba
mati. Ané jani dunia réalitas utamané réalitas sosial suba dadi dunia virtual.
Bisa-bisa buin mani
puan, tusing lakar ada anak ané mukak tumpukan albun foto tur metakon tekén
nyamané di jumah ngenénin indik potrékan ané ada di albumé totonan.
Nyén ento, anak
ngujang, lakar kagentosin olih lima ané ibuk ngusap layar HP. Tutur indik i
bapa, sandingan, nyama tugelan lakar maganti dadi satua ngenénin indik youtuber
ané mara suud ngaé sénsasi, kontrovérsi sétingan artis ibu kota utawi gosip
anyar akun Instagram kabupaten.
Sakéwala, tusing kerasa
baan tiang, foto-foto pianak tiangé, Gus Dé suba suud macétak. Album fotoné
masih suba ada. Jani tinggal masang lan ngias, apang buin mani puan ada satua
ané tepukina uli albumé totonan.
magenah ring Tabanan, mangkin makarya dados wartawan Témpo.
No comments