Jikét Pelung
Olih: Agus Sutrarama
![]()
Agus Sutrarama
magenah ring Tabanan. Kakawiannyané naanin kawedar ring Bali Orti Sampun ngamedalang cakepan pupulan satua cutet “Bulan Satwak”.
 |
| Gagambaran Manik Sudra |
Yén tusing demen kel miara, kel nguda ngaé.. Kel gena ngantén!!
Sémér yéh mata miribang suba tuh, kecangcang bara sigsigan, mangantosang
labuh telan né tuara lakar ada. Numitis dadi rasa gedeg ngurek, yén kaliwatan
lakaran ngendukang, sakabedik ngengsapang, Bapa. Kadadua kuping ipunné uli
cenik tan padaya, suba biasa lan ngaénang dadi kebal, kala ningeh raos senglad
anak mabibih lebian ngortaang unduk kaluargan ipunné.
Tuara ja salah, tuara masih pelih anaké demen ngerimikang, demen
ngortoang, jaman jani anak mula sinétron né dadi idola, dramané laku kaburu,
apaké ulian carita idup-ipun né pas sajan yén dadiang sandiwara, kéto masih
masa depan ipun né, suba pantes san dadiang nomor togél ané katohin abanjaran?
Lacur idup anaké dadi bahan penimpal sepi kala magibung ngarumpi.
Men, kel kudiang! Budi ipun lakar mekaik di jalané! Sebak, sebak
ngerérénang mekejang montoré, ipun tuara lakar nyidang buin nagih apang buung
kalekadang, lan Bapan ipuné tetep tuara lakar ada!
…
Lilin-lilin telah kadampeh, andusné ngerejit angit, dot san ngeliwatin
muncuk hotél Taman Langit. Para staff waiter muah waitress-é ngajangin piring
lan makejang set up-an dinner-é, kluntang klanting munyin peraboté kapilpil,
ada a méter sekan gambelé milu kasusu magegampil.
“Lin, kamu tondén mulih?” Anak kitchen né ané madan Angga ento maekin
Érlin.
“Tondén Ngga, buin kejep.”
“Nau jani di Sales o? Engsap uba kamu jak gaé di FB, héhé.”
Tondén seken petakon né Angga maan pesaut uli Érlin, peliat né Érlin
malunan kekaukin ngajak rawat muani lingsir di malu né. Krasak-krosok,
ungkuk-ungkun nyiksikin, tuara nyidang ngengkebang, ngenah inguh ngalihin. Ada
ané kecag. Kala paekin ipun, ngansan jelas kulit né I Bapak ento selem
melengis.
“Bapak, Pak ngereh niki ngih? Niki malih siki panggul nika Pak,” Érlin
ngenjuhin bapaké ento abesik panggul gangsa né kecag di betén, mirib ulian saru
tuara tepukina tekén Bapaké. Jail sajan staf Engineering-é, kondén pragat sekaa
gongé magegampil, suba sépanan kajangin né lampu-lampu soroté. Tusing masih
pelih, ulian uli selidan suba tuyuh ngitungang Balinese Candle Light Dinner-é
mara. Nah, masan hari raya buka kéné, pedalem masih maan giliran megaé, di
swasta kekéné mula mekejang tanggal kalénderé mewarna selem. Kanggoang kuangan
rapi buin abedik tetampedan né, ulian magrudugan.
“Yéh, suksma Gék,” Bapak ento makenyem nyemakin panggulé.
“Bapak sané makta penari lan sekaa tabuhé ngih?”
“Nggih, Gék ..”
“Bapak saking napi?”
“Tyang saking Tabanan, Gék.”
Érlin rumasuk pegawé ané jemet, mara ada duang taun maangkat dadi staf
permanén. Dugasé enu di FB ipun maan nominasi karyawan teladan, lan bulan ipidan
dugasé mara kapromosiang ka bagian Sales, ipun buin masuk nominasi lan
pamuputné dadi pemenang karyawan teladan. Angayu bagia kerasayang, kéto masih
ulian acara dinner-émara suba majalan lancar. Diapi unduk panyusunan acara lan
unduk ngalihang penari muah sekaa tabuhé enu kabantu baan atasané di Sales,
manian sakabedik Érlin sinah lakar kalébang padidian.
Di tongos ané tuara joh, Angga, i pegawé kitchen ningalin ipun suba ada
makelo, buka tuara lakar ngemaang angin pasihé dingin lakar ngampehang lawat anak
luh di aepné ento. Érlin makipekan laut ipun nawang yén uli tunian déwékné
katingalin baan muani Angga ento, ané jani ngenyemin ipun, manis. Érlin prajani
nguntul, tan patawanga déwékné sujatiné, milu makenyem.
Mara ja Erlin lakar megat jalan nuju tongos parkir karyawané, misi
gagéson gigis kepungin angin petengné tumbén dingin menulang, kala ipun
makipekan kaja ipun ningalin Bapak ané ituni, Bapak ané ngaba sekaa tari lan
penabuh itunian ento,sedek ngembus baju jikét ané neket di awakné. Jikétné ento
lantas kaserahang turin kasaluk baan anak luh, ané tuah sekaa tariné. Penariné
ento menék ka montor, kagandéng baan anak luh, peturu penari. Setondén ipun
ngalahin I Bapak, ipun makadadua nyemak liman I Bapak turin niman nyalimin. I
Bapak medadaan kanti lawat anak cerik kedadua ento ilang. Sirr, anginé nebek
keriput ipuné, I Bapak sépanan masedakep. Dah, tusing ja nyidaang Érlin
nepangin unduk ento, melaib ipun, nyagjag maekin.
“Bapakk..”
“Yéh, Gék.. jaga budal niki?”
“Pak, niki anggén jikété. Mara tingalin tyang Bapak ngemaang penari
Bapaké nyilih jikét Bapaké. Niki anggén Pak, Tabanan nika nak joh.”
“Men, Gék nyanan napi anggén? Ten, bangiang Gék, tyang pun biasa. Héé.”
“Pak, mangkin dumun, diolas dingehang ja tyang. Jikét pelung niki nak
tyang mara tuni maan duman, hadiah ulang taun uli hotél. Jikét tyang ada di
montoré, Pak.” Kéwala I Bapak lantas nindakang baisné, nuju montorné ané suba
ngetor ngantiang dangin penyengker hotélé.
“OK, lamun Pak tetep bengkung, tyang di Sales, tyang nyidang ngalihang
sekaa lénan anggon ngisi acara dinner-é minggu depan. Punapi, Pak? Hmm.”
I Bapak mara merérén, buka kablengek ningeh munyi siduri né Érlin, guat
kisut di kenyemné buka macarita, “Oh, ngih, yén kénten tyang nyelang dumun
jikét Gék é, suksma banget, buin mani abaang tyang mriki ngih .”
“Pak! Minggu depan kan malih Pak mriki, kayang nika gén bakta.”
Érlin ngerasaang lega sekayang di tangkahné, apa ya mekada buka menang
ukupan, disuba ya nyidang suksés mapitulung tekén Bapak ento, diapi seselné
ulian macepol munyiné misi ngemaang ancaman anak lingsir né demen mamengkung.
Ah, suba pasti Bapaké ento tuara nawang yén sujatiné Érlin mogbogin, tuah ento
abesik jikét ané abana tekén Érlin, tuara ja ada jikét lénan buin di montor
ipuné. Ané penting I Bapak, sinah tusing payu ngilgil dinginan ngojog umahné di
Tabanan. Kabayah suba peluh kenyel. Di tuuh tuané, enu ngerambang nantangin
peteng.
.. astungkara di jumah suba ada pianak lan kurenan kesayangan Bapak ané
satya ngantiang ..
Érlin makenyem.
“Lin ..” Érlin tangkejut ningalin timpalné, I Ratih ngaukin.
“Hai, Tih ..”
“Kadén aku kamu uba neked di kost, kan aku dadiné maan bungkusan ené,
aba aku mulih, lumayan héhé.”
“Apa to Tih?”
“Angga nitip mara, nitip baang kamu koné. Apang ada ajenga di kost koné.
Ehmm...”
“Ah, héhé, makasii...”
“Lin, Angga to baik anak né, ganteng buin, coba aku enu jomblo, aku
masih mekeneh sayanganga jak Angga, héhé.”
“Héhé..”
“Érlin.. kamu to jegég, liu lho nak mekeneh jak kamu. Kamu uba pantesné
ngelah tunangan Lin..”
“IIh… uba cara mémé-mémé kamu Tih… Ok, byé..” Saha nyimpit lengen
timpalné ento lan nyemak bungkusan titipané Angga, Érlin melaibin Ratih nuju ka
parkir.
Neked di kostné, Érlin negak di kursi kamarné, ngambang pepineh né, buin
kenehné menceg di Bapak ketua rombongan sekaané ané mara katulungin ipun baan
manyilihang jikétné, buin inget ia ngajak munyin timpalné I Ratih ané ngemaang
ia tutur ibusan.
“Angga….” Tipis bibihné Érlin ngemikang. Laut ipun inget ngajak
bungkusan né mara, sépanan gagaha. Di tengahné misi sosis panggang, jak bé
guling mimbuh kulit né ngeritik.
“Waw… makannn…”
Jaen san kinyukan né Érlin, kéwala kondén ngelekang, ipun merérén makinyukan,
né jani makedua peningalanné ngembeng, buka ada ingetan ané nekanin tanpa
uleman, yéh peningalan ipunné ngrécék,
“Maem Pak …”
Nyumunin masuk TK, kala makejang timpal-timpal né manying katehin baan
Bapak lan Ibukné, pepineh polosné Érlin cerik setata katuyuhin, to nguda tuah
déwékné pedidi né malénan. Di sampingné tuah ada I Pekak ngajak I Mbah dogénan.
Lawat I Mémé mula enu nyidang tepukina, ulian méméné kapah masih nyidaang ada
jumah, luas magaé semengan dikénkénné setondén Érlin bangun, yén di petengné,
kiapné Érlin cenik tuara sanggup ngantiang I Mémé teka mulih. Suara sigsigan di
tengah peteng, di pesirepan, anak luh di sampingné, ané ngelut sikian ipun né
uli dingin, tuara kapah neket di ingetan ipunné kayang kajani. Nguda asibak,
ipun terus ngenehang, buin pidan Bapakné teka, joh sajan mirib Bapakné luas,
buin pidan galeng gulingé lakaran keganti, dadi Bapak.
“Bapak Tu é suba mati!! Kemu alih pedidi, nak suba mati!!” Maket-ketan
buka ukud awakné Érlin cerik ané duk ento suba ada di kelas dua SD. Kadengkik
baan Méméné, ulian terus nakonin, dija Bapak, dija Bapak. Ipun sigsigan,
kesaup, kausap tungkulange baan Dadong ne.
“Ning, Dadong ngidih pelih ken cening Putu.. Ené mekejang pelih dadong,
dadong mekeneh apang makejang nuutin keneh dadongé, abedik melenan lakar
tembahang dadong, dadiné tan perasa dadong suba lebian ngatur idup pianak
dadongé, mémén ceningé, suba tawang dadong yén mémén ceningé mentik dadi anak
leklekan, manying, kéwala dadong buka ngelidin pelih, mebalik melihang yén
pilihan ne tusing buka ne kenehin dadong. Dugas Memen ceningé melingang cening,
tur payu lakar ngantén ngajak muani ane tonden setujuin dadong, ditu sangkal
dadongé nyajan, ngembros nyebengin, rusit ngalihin né nyidang pelihang, rasa
tuara terima ento ning! Menehang muwikin warang, sing pelih nyebengin mantu!
Sakabesik metékin gelah pisaga ané tuara nyidang kebaang Bapan ceningé buat
mémén ceningé, ngawai nyaihang, tusing pegat-pegat nyelselin idup di entud
mémén ceningé, nguda lacuré kakéné, ngiriang pisaga ané prejani nyidang idupné
santai terjamin ulian ngelah mantu sugih, abesik tetujon dadongé, apanga buin
acepok mémén ceningé ngakuin yén suba pelih pilih-pilihanné, apanga ja ngidih
pelih tekén dadong, Ning..”
Makejang munyin dadong ne dugas ento, tuah kruna-kruna ane keweh
karesepin baan Erlin cenik kutus tiban, diapi sakabedik Erlin cenik mentik
ngelihang lan nawang yen Bapak ne tuara je luas megae joh, tonden masih mati,
Bapak jak Meme ne tuah suba palas. Cerai, anak ke ngorahang.
Pangidih pelih dadongné kapining cucu kesayanganné ento lantas
katugtugang baan janji lakar ngajak ipun ngalih Bapak ipunné ka umahné di
Tabanan, diapi joh, Karangasem ka Tabanan, numpang bémo, payu kel jalanin.
Jalan pedésan cenik, bémo né ngerépé ngalih umah palekadan bapanné Érlin,
né sujatiné masih umah ipunné. I Dadong mamengong buka togogé, miribké enu ada
sisa rasa elek, apaké tusing enu, dikala buin teka ka tongos ipidan pianakné
Érlin katitipang, ka tongos ipidan ipun ngidih tulung ring penyama braya lan
kramané, apang milu ngarunguang belog pianakné, lakar milu mekrama ditu. Besik
dadua anak di sisin jalanné ningalin, miribké enu ada inget tekan déwékné.
Érlin cenik, anak cenik polos tan pedosa, tuah nuutin munyin dadongné, lakar
kaajak koné ngalih bapakné.
“Yeh, raga sira ngih??” Erlin tusing nawang enyén ento, majujuk
metungked bangkiang, seinget né dadong né ngaukin anak ento, Bli.
“Bli, Mbok.. ampurang tyang, tyang kaluargan Bli né uli kangin, niki I
Luh, Bli, ponakan Bli né, suba kelih Bli. Ning, Érlin.. salim malu paman jak
bibi é..”
“Yéh, ampurang, deriki nak ten medué pisaga uli kangin.”
“Bli!” Anak luh ané kasambatang bibi né Érlin ento maekin Érlin cerik,
“Mih, ratu .. Putu muan Putuné muan Bapak putuné sesajan..” Lantas melekuk
Érlin.
Tuah I Bibi ané enyak nerima laut ngajak negak ipun ngajak dadua. Érlin
negak di pabinan bibiné, kausap-usap ebokné, kisi-kisi ané tuah nyidaang
karekam di ingetané dugas ento, Bapak ipuné suba makelo luas ka tongos né madan
Sulawesi, nutug pekak jak dadongné ané malunan ada ditu, lan makejang tondén
taén buin mulih ka Bali, tusing masih ada mekabar.
Diapi bibiné nyidang nerima Érlin, bangras pamanné, nyisaang jejeh, tuah
ento acepok Érlin nawang umah Bapakné, palekadan Bapakné, tanah tongos ipidan
Bapakné meguyang meplaléan. Tuara masih taén buin I Dadong ngajakin ipun melali
kemu,mirib ulian tongosné joh,mirib ulian I Dadong tusing ngelah pis anggo
nyéwa bémo, mirib kerana kapok lan tusing karwan yén Bapakné Érlin suba mulih
uli Sulawesi, mirib ulian elek ngajak pamanné Érlin, mirib ulin elek ngajak
déwékné pedidi.
Selak-seluk limanné Érlin, limanné paling kélangan.
“Bu Érlin, éh, selamat siang, masuk siang niki?”
“Éh, Pak Yan, ngih niki, hé.” Sépanan Érlin nyautin salamné Pak Wayan,
satpam hotélé, sambilanga limanné ngecék absén di sampingné.
“Érlin, niki wau wénten titipan, katanya niki jakét nya Érlin, tadi
bapak sané kemarin bawa penari nika bawa meriki.” Mirib mula madukan kéto
Bahasané Pak Wayan satpam yén matepuk jak nak bajang jegég.
“Oh, ngih makasi Pak Yan.”
Sengkal gigis kenehné ulian enu masih mesisa bengkungné I Bapak ento,
suba orahina apang ngabaang di pas acara dinner-é dogén, jeg jani suba abana,
mimbuh suba kenceng materik, miik, lan.. ada amplop.. Penasaran, apaké ada di
tengah amplopé, Érlin mukak, makesiab. Jikét pelungé ento ulung ka tanah! Di
samping jikété milu jani mebrarakan foto-foto. A lembar ento gelahné Érlin,
foto ipuné dugas umurné sawetara telung tiban, kedék kesangkol baan Bapak
ipuné, tuah ento ané mara busan selak seluk paling alihinna. Tuah foto ento ané
nyidaang ngatepang kenangan ipun ngajak Bapakné, ané setata abana di kantongné,
kanti kaengsapang enu ada di kantong jikétné kapesilihang ka Bapak ketua sekaa
uli Tabanan ento. Ané jani foto
kesayangan ipunné ento sagétan manakan,dadi foto-foto ané lénan ané milu ulung
uli tengahin amplop. Ada foto anak luh muani sedeng natab banten penganténan,
ada masih foto-foto kala ipun nyangkutin pianak ipunné ané enu cerik barak.
Ngetor, yéh peningalanné Érlin nerébes pesu, paras anak luh di makejang fotoné
ento mesaih san ngajak muan Méméné, kéto masih muan ané muani, tuah…
Nuju acara dinner-é, sajan I Bapak tusing ada teka, abesik sekan tariné
nyambatang yén I Bapak sedek gelem.
Mani semengné Érlin nabyeng ka gumi Tabanan, nuluh alamat ané kabaang
olih sekan tariné. Mabekel nomor HP ané kebaang olih atasané.
“Namanya Pak Putra, Lin. Ini nomor HP-nya, semangat ya sayang.”
“Iya, makasi Bu ..” Di kenehné menehang raos atasané. Namanya Putra, Bu.
I Wayan Putra Arsana…
Jalan-jalan cerik ené, tuah jalan ané ipidan taén kaentasin ngajak
dadongné. Panggilan télpon ipuné tuara kaangkat-angkat, Érlin marérén di malun
gang ané misi plang adan sanggar. Apaké ené tuah madan rasa rindu, ané suba
nengsek bais ipuné ngaliwatin jejeh, nyelepin umah suung mapagehan baan punyan gamal, umah ané tondén madan
pragat lan menatah baan tanah. Di kenehné jani sambrag madukan, apaké ia dini
nongos kadidian? Nyalanin sepi idupné pedidian?? Apaké Ia ada di tengah jani?
Apaké miriban suba ngantén lan ngelah pianak, buin??
“Putu …”
Yén sajan ené mekejang tuah di pengipian, Érlin dot terus kel mengipi,
ulian di ipianné ené ipun suba katemuang malih ngajak né paling sayangang. Di
aepné jani tuah ipun I Bapak tua, di sampingné makenyem méméné, saput asibak di
pesirepané, ané di sigsigan peteng-petengné masih enu nyidaang nuturin i pianak
apang setata mapitulung tekén anak lén. Tutur ento, tutur ané ngentenin ipun
apanga masilihang jikétné tekén I Bapak tua, ané tuah, sang sané kaantiang.
260819
magenah ring Tabanan. Kakawiannyané naanin kawedar ring Bali Orti Sampun ngamedalang cakepan pupulan satua cutet “Bulan Satwak”.
No comments